دەسەڵاتی”دوو ئیدارەیی” وسەرمایە، قۆڵپی شۆرش لە کۆمەڵگەی چینایەتی کوردستاندا

موئەیەد ئەحمەد

ناڕەزایەتی و خۆپێشاندانی کرێکاران و زەحمەتكێشان و کارمەندان و  گەنجانی کچ و کوڕی تامەزرۆی ژیانێکی ئاسوودە و ئازاد و یەکسان، لە کوردستانی عێراقدا، بەردەوامە، هەم لە بەرامبەر مووچە بڕین و بێکاری و بێ خزمەتگوزاری و نەبوونیدا، و هەم بە دژی ستەم و گەندەڵی و سەرکوتی دەسەڵاتی مافیایای و میلیشیایی حزبەکانی دەسەڵات.

دیارە ئەم ڕووبەڕوبونەوە و بەرهەڵستکاریە جەماوەریە لە هەردوو ناوچەی ژیر دەسەلاتی یەکێەتی و پارتیدایە، وە ئەمەش لە کاتێکدا کە هەر یەک لە پارتی و یەکیەتی، بە گۆیرەی قورسایی هیزیان لە ناوچەکانیاندا، بە سەرکوت و گرتن و کوشتن وەڵامی جەماوەری ناڕازی و داواکاریەکانیان ئەدەنەوە. هەر بۆیە، ئەمڕۆ لە هەر کات زیاتر هیواو و ئارەزووی جەماوەر بۆ باشتر کردنی ژیانیان و فەرهەمهێنانی “چاکسازی” سیاسی و ئیداری و نەهێشتنی گەندەڵی بە بنبەست گەیشتووە، وە رێگەیەک لە بەردەمیاندا نەماوەتەوە جگە لە هەوڵوتەقەلا بۆ ڕاماڵینی ئەم رژێمە و هیز و حزبەکانی و پاشەکشەپێکردنیان لە ژیانی سیاسی و کۆمەڵایەتی کۆمەڵگەی کوردستاندا.

لە بەرامبەر ئەم بارودۆخەدا، چێنی کریکار و تۆیژە نەدارەکان و ڕەوتە سیاسی و فیکری و رێکخرەویەکانی، ڕووبەرووی ئەرکی هەمەلایەنن. لەم راستایەدا، ناسینی دەسەڵات و نیشاندانی ماهیەتی چینایەتی بورژوازایانەی خاڵی دەست پێکردنە بۆ دەست راگەیشتنیان بە سیاست و تاکتیک و خۆیندەوەی دروستی بۆ دۆخەکە، وە بۆ  گەلاڵە و پراتیککردنی ستراتیژی شۆرشگیرانە و فەراهەمهێنانی ئاڵوگۆڕی سۆشیالیستی و ڕیشەیی لە کوردستاندا.

ستراکچەری رژیمی سیاسی کوردستان و

“دوو ئیدارەیی”

پەیەکەری رژیمی سیاسی لە سەر کار بوو لە کوردستاندا وە بڕبرە پشتی ئەم رژیم و دەسەڵاتە، هەردوو حزبی بورژا ناسیونالیست و میلیشیایی کوردە؛ پارتی دیموکراتی کوردستان (پارتی) و یەکیەتی نێشتمانی کوردستان (یەکیەتی)، کە بۆ خۆشیان بە سروشتی دوو ئیدارە و دەسەڵاتن و مۆرکی ئەم دابەشبوونەیان لە سەرتاپێی رژێمەکە داوە.

میژووی ئەم دابەشبوونە حزبی و میلیشیایەی دەسەڵاتداری و ناوچەگەری و نەخشەكێشانی کۆنە، و ئەگەڕیتەوە وە بۆ ساڵی ١٩٦٤ و ئینشقاقی ناسراو بە “مەلایی” و “جەلالی” لە ناو بزوتنەوەی  کوردایەتی و چەکداری پارتیدا، کە دواتر لە پاش هەرەسی ١٩٧٤ و دروست بوونی یەکیەتی، لە ١حوزیرانی ١٩٧٥دا،  لە فورمی ئیستایدا، وەک دوو حزب و بە دوو ناوی جیاوازەوە؛ پارتی و یەکیەتی، جێکەوتووە.

ئەوەی کە زیاتر پێویستە لێوەی دەست پێبکەین ئەو قۆناغە تازە چۆنایەتیەیە لە پرۆسەی ئەم دابەش بوونە کە لە دوای شەڕی ناوخۆییەوە (١٩٩٤-١٩٩٨ ) جێگیر بووە. ئەو شەرە ناوخۆیەی نیوان ئەم دوو حزبە کە بە کوشتنی هەزاران لە خەڵكی هەژار و بێدەرتانی کوردستان لە ناو بەرەکانیدا  تەواو بوو، و ئامانجە سیاسی و ستراتیژەکانی لە فۆرمی ئەم دوو ئیداریی و دەسەڵاتە میلیشیایەدا  تۆمار کرا و سنووری ئەمرۆی ڕاکێشرا،  وە هەروەها  لە ژێر سایەی ئیتفاقیەی واشنتۆن و ئیدارەی دەوڵەتی ئەمریکادا لە ١٩٩٨ دا  ئیعترافی  نێودەوڵەتیی وەرگرت.

ئەو دابەشبوونەی دەسەڵات و دوو ئیدارەیەی کوردستان دواتر لە گەڵ داگیرکردنی عیراق لە لایەن ئەمریکاوە و رۆخانی رژیمی بەعس و دامەزراندنی ڕژیمی سیاسی ئیسلامی و قەومی لەسەر بنەمای دابەشبوونی قەومی و تایفی عیراق، بە شیوەیەکی کۆتایی جێگیر بووە وە  بوەتە بەشیک لە خۆدی نیزامی سیاسی لە سەرتاسەری عیراقدا. ئەمە جگە لەوەی کە  بۆ خۆشی دەسەڵاتە لە کوردستاندا و بڕبڕەپشتی رژیمی فەرمانڕەوای  بورژوا ناسیۆنالیستی کوردە. داینامیزمی سەرلەنوێ بەرهەمهینانەوەی ئەم رژێمەی کوردستان و ئەم دوو ئیدارەییە لە ئەمڕۆدا، بەدەر لە فاکتۆرە سیاسی و سەربازیەکانی، لە ناو پەیوەندەیە ئابووریەکانی کۆمەلگەدایە و پیداویستەیە سیاسیەکانی حەرەکەتی سەرمایە و سەرمایەداری ئەمڕۆیە بە شکلی کۆنکریتی لە کوردستاندا کە فەراهەمیان ئەهێنیتەوە.

بەرچاوڕوون بوون و دەستنێشانکردنی واقعیەتی سیاسی و سەربازی کوردستان و خۆی چۆنە ئاوابینینی و نیشاندانی پەیوەندی ئەم رژیمەی ئێستا و “خێروبێری” بۆ بۆرژوازی ئێمیریالسیتی و ناوچەیی و ناوخۆیی، سەنگی مەحەکە بۆ بەرگری  کردن و خەبات لە نیو بەرەکانی جەنگی شۆرشگێڕانەی کریکاران و نەدارنی کوردستان.

دیارە سەرلەنوێ بەرهەمهێنانەوەی دەسەلاتی میلێشیایی ئەم دوو حزبە، پارتی و یەکیەتی،  و تەنانەت دوو ئیدارەکەشی، لە کەش و هەوای جیۆسیاسی و جیۆستراتیژی دەولەتانی ناوچەکە و کێشمەکێشی نیوانیان هەردەم ووزە و توانا وەرئەگڕیت بە تایبەت بۆ ڕاگرتنی تەروازووی هێزی نیوانیان. نمونە هەر نزیکەکان لەم بارەیەوە، پەنا  بردنی  پارتیە بۆ رژێمی بەعسی فاشی، و یەکیەتیش بە دوایدا بۆجمهوری ئیسلامی ئێرانی ئیعدام و کوشتار، لە ٣١ ئابی ١٩٩٦، و هەروها هاوپەیمانی پارتی و تورکیایە بۆ داگیرکردنی داعش بۆ موسڵ سالی ٢٠١٤، و هاوکاری یەکیەتیە لەگەڵ قاسم سولیمانی، بۆ هێرشی سەربازی و مێلیشی عیراق بۆ کرکوک و دەوروبەری لە ١٦ ئوکتۆبەری ٢٠١٧ .

مەسەلەی سەرکی ئەوەیە کە ئەم دابەش بوونە و ڕزگار بوون لە دوو ئیدارەیی و دامەزراندنی حکومەت و ئیدارەیەکی سەرتاسەری لە کوردستاندا ئەمرۆ گەێشتۆتە پلەیەکی ئەوتۆ کە کۆتایی هێنان پیی گرێدراوە بە سەرجەم تێکڕمانی ڕژیمی سیاسی فەرمانڕەوا لە کوردستاندا. وە نەک ئەمش بەڵکو پەیوەست بوەتەوە بە ڕزگار بوون لە ئاسۆ و سیاسیەتی  بۆرژوا ناسیونالیزمی کورد و کۆتایی هێنان بە زاڵی  ئەم ئاسۆیە لە کۆمەڵگەی کوردستاندا. گەر ڕوون تر بڵیم،  کۆتایی هێنان بە دوو ئیدارەیی و دوو دەسەلاتی نەک هەر بە چاکسازی و دەوڵەتداری بورژوا ناسیونالیست ناکریت بە هەموو بالەکانیەوە  بەڵکو لە چوارچیوەی ئاسۆی ناسیونالیزمێشدا ئەنجام نادرێ.

بزوتنەوەی ناسیونالیزمی کورد لە کوردستاندا وەک بزوتنەوەیەکی سیاسی و کۆمەڵایەتی چینی بورژوازی کورد وە وەک  ووزەی ئەم چینە بۆ دامەزراندنی نەزم و نیزامی بورژوا ناسیۆنالیستی کورد لە کوردستاندا، هەتا ئیستا توانیویەتی لە دەسەلاتداریەتی ئەم دوو حزبە میلیشیەدا خۆی بەرجەستە بکاتەوە و بەم تاڵان و بڕۆیە کریستەڵایز ببێ. ئەم دوو حزبە دەسەلاتدارە بۆ خۆیان جگە لەوەی کە میژووی هەوڵ و تەقەلا سیاسیەکانی ناسیونالیزمی کوردیان بەرجەستە کردۆتەوە و بە زەبری چەک و ئیمکانات و ساتوسەودای نیو دەوڵتی کردویانە بە هیزیکی سیاسی چەکدار هەم لە بەرامبەر دەوڵتی مەرکەزی و هەم وەک  ئامرازی دەسەلاتداری و سەرکوتی چینی چەوساوەی کوردستان.

ئەوەی کە پاکانە ئەکات بۆ بزوتنەوەی ناسیونالیزمی کورد و بەجیا ئەیبینێ لەم دەسەلاتە و لەم گەندەڵکاریە، ئەوە وەهم و فریوکاری پەخش ئەکات لە ناو جەماوەردا و رەخنەی باڵی لیبرال قەومیەکانە کە ئەیانەوێت دەوڵەتی کوردی بورژوازی دروست بکەن بەلام گوایه بەبێ هیزی مێلیشی و گەندەڵی. ئەزمونی دەسەڵاتی پارتی و یەکیەتی دروست کردنی دەوڵتی نەتەوەیی بورژوازیە لە کوردستاندا ئەوە گرنگ نیە کە لە کۆیووە هاتوون بەڵکو ئەوە گرنگە کە چۆن سەرلەنوێ خۆی بەرهەم ئەهێنیتەوە.

هەڵبژاردن و پەرلەمان و کابینەسازی بۆ وەلانانی

دەسەڵاتی دوو ئیدارەیی نیە

هەڵبژاردن و پەرلەمان و کابینە دروست کردن لە کوردستان کە لە پاش ساڵی  ٢٠٠٣ و ڕوخانی ڕژیمی بەعس دێتەئاراوە، بۆ دەستکاریکردنی ئەم واقعیەتە سیاسی و سەربازی و ئابووری و دوو ئیدارەیی و دەسەڵاتە حزبیە نەبووە و نیە، بەڵکو بە پێچەوانەوە ئەوە دەسەڵاتەکەیە کە ئەم ئاریشە پەرلەمانیە لە جەستەی خۆیدا هەرس ئەکات و ئەم رەنگ و ڕوخسارە سیاسیە “دیموکراسیە” بە خۆی ئەدا.

پرۆسەی هەڵبژاردن و پەرلەمان ئامرازی سیاسی بورژوازیە بۆ “شەرعیەت”! وەرگرتن لە جەماوەر، نەک مەبەست لێی هەڵپێچانی دەسەلات و گۆڕینی بێت وەک ئۆپۆزسێۆنی قەومی “نەوەی نۆی” و “گۆڕان” لە قەڵەمی ئەدەن.  تێکەڵکردنی ئەم دوو مەسەلەیە، واتە پرۆسەی هەلبژاردن و پەرلەمان و کابینە سازی وەک گۆڕینی دەسەڵاتی”دەوڵەت” لە کوردستاندا شتیک نیە جگە لە فریوکاری بە دژی کرێکاران و چەوساوەکان و مەبەست لێێ  ئامانجی سیاسی و ستراتیژی ترە.

لەگەڵ ئەوەشدا کە پرۆسەی سیاسی و هەڵبژاردن و پەرلەمان و کابینە دروستکردن بۆ خۆی پرۆژەی ئەمریکایە بۆ رژیم سازی لە کوردستان و عیراقدا، بەڵام  لە لایەن ئەمریکاشەوە ئەم پرۆسەیە بۆ ئەوە نەبووە و نیە کە دەسەڵات و دوو ئیدارەیی بگؤڕیت بەڵکۆ بۆ جوانکردنی دیمەنیەتی بەم دیمۆکراسیە پەرلەمانیە. گەر وەک ئاکامی لاوەکی ئەم پرۆسەیە ئەم حزب یا ئەو حزب لە دەسەلاتدا بەهیز تر ببێ یا لاواز تر ببی ئەوە ‌هیچ لە ئەسڵی مەسەلکە ناگۆڕێ.

ئامانج و ستراتیژی دەوڵەتسازی و رژێمسازی بورژوازی،

 بە پۆششی “چاک سازی” و “باشبژێوی” جەماوەر

“بزوتنەوەی گۆران” و کاریکاتۆرەکەی ئەمرۆشی، حزبی “نەوەی نۆێ “، کە لە بنەڕەتدا بۆ بە ئاکامگەیاندنی ئامانجی  سیاسی و ستراتیژیان بۆ بونیاتنانی دەوڵتی بورژوازی کورد و دەوڵەتسازی بورژوازی هاتونەتە گۆڕەپانی سیاسی و کۆمەڵایەتیەوە، و فەلسەفی هەبوونیان لیرەوە بووە و هەیە، ئەیانەوێت ناڕەزایەتی خەڵکی کوردستان بکەنە سووتەمەنی جیبەجیکردنی ئەو ئامانجە سیاسی و ستراتیژیانەیان.

بە کەمێ ووردبونەوە ئەبینین کە ئەو “چاکسازی”یەی ئەم ئۆپۆزسیۆنە باسی لێوە ئەکات پاشکۆی شتێکی ترە، وە بۆ شتیکی تر و ئامانج و سیاسەت و ستراتیژیەتێکی تر هاتۆتە ئاراوە. وادەدانیان بەوەی کە ئەمان خۆشگوزەرانی و باشبژێوی و “چاکسازی” و “گۆڕانکاری” ئەنجام ئەدەن، لە ڕاستیدا بۆ هاندانی سیاسی و هەڵخڕاندنی خەڵکی ناڕازیە بە دەوری ئامانجە سیاسی و ستراتیژیەکانیان. واتە بۆ دەوڵەتسازی بورژوا ناسیونالیزم تا بتوانن لە ڕێگەیەوە گەشەی سەرمایە و سەرمایەداری لە کوردستاندا هەرچی زیاتر بەرەوپێشبەرن. وە ئەمەش هێج پەیوەندیەکی بە دابین کردنی باشبژێوی و یەکسانی و ئازادی خەڵکی کرێکار و نەداری کۆمەڵگەوە نیە.

ئاشکرەشە ئەم ڕەوتە سیاسیە ئۆپۆزسیۆنەی بورژوازی بە دیاریکراوی ئەنجامدانی ئەم گەشەسەندنە ئەبەستێتەوە بە پیادەکردنی هەرچی خیراتر و هەمەلایەنەتری مۆدیلی ئابووری سەرمایەداری بە شیوازی  نیولیبرالیزم، واتە گەشەدان بە جوڵە و کەڵەکەی سەرمایەی کەرتی تایبەت و خەسخەسەی کەرتی ئابووری و خزمەگوزاری گشتی و بێبەشکردنی زیاتر و چەوساندنەوەی توندوتیژ تری کریکاران و زەحمەتکێشان و بیکاری زیاتر …هتد.

ئەوانە هەمووی  لە باری سیاسی و ئابووری و کۆمەڵایەتیەوە  یانی، هەم  سەقامگیرکردنی دەوڵەتی بورژوازی کورد، کە شتێک نیە جگە لە ئامڕازی سەرکوتی چینی کریکار و نەدارنی کوردستان، وە هەم تەختکردنی ڕێگەی بەردەم کەڵەکە و جوڵەی سەرمایە کە پیکەوە لە گەڵ دەوڵەتدا بە هەردوولایان یەکەیکەن و سیستمیکی سیاسی و کۆمەڵایەتی فەراهەم ئەهێنن. ئەمە کاكڵەی مەسەلەکەیە. دەوڵەت و دەوڵەت سازی بورژوازی و تەنانەت رژێمسازیش کە هەندی بە ناوی  سۆشیالیزمەوە هەوڵی بۆئەدەن هەر لەم تەوەرەیەدایە، واتە دروست کردنی نەزم و نیزامی سیاسی سەرمایەی نەتەوەیی لە کوردستان و دابەش بوونی زیاتری “نەتەوە” بە دوو “نەتەوە”ی دژ بەیەک؛ بورژوازی و کرێکار و چەوساندنەوە و بێبەشکردنی هەرچی زیاتری دووهەمیان.

ئەم فریوبازیەی بورژوا ناسیۆنالیستی ئۆپۆزسیۆن وەک ئەوانەی ئێسلامیستەکانی کوردستان وایە، دیارە بە  ئایدیۆلۆجیەکی ترەوە. لای هەمووان ڕوونە کە واژەکانی وەک “باشبژێوی” و “چاکسازی” و “گوڕانکاری”، بۆ حزب و ڕەوتە ئؤپؤزسینۆنە ئیسلامیەکانی ئەمڕۆی ئەم کۆمەڵگەیە، لە پەیوەند بە ستراتیژی بونیانت نانی دەولتی ئیسلامی و بە ئیسلامیکردنی کۆمەڵگە و ڕژیمی فەرمانڕەواوە مانای هەیە. هەر قسەوباسێکی ئیسلامیەکان لەوێوەیە کە “چارەسەری” مەسەلەکان لە هینانە سەرکاری ڕژێمێکی ئیسلامیدایە!!، واتە لە چەشنی ئەو دۆزەخەی کە زیاتر ل ە٤ ساڵە کۆمەڵگەی ئیرانی بەدیل گرتووە یا لە چەشنی ئەوەی کە ئوردوگان ئێستا کەوتۆتە سەر چەسپاندنی و یا دەوڵتی داعشی.

ئیسلامیزم لە کوردستاندا وەک هەر شۆینیکی تر لە جیهانی سەرمایەداری ئەمرۆدا بەر لە هەموو شتیک بۆ خنکاندنی وزەی شۆرسگیڕانەی جەماوەری کرێکار و زەحمەتکێشان لە ئارادیە و هیزی دژە شۆرش و کوتەکی فاشیستی بورژوازیە بۆ سەر سەری چەوساوە و نەدارن. ئەمرۆ کە بورژوا ناسیونالیزمی دەسەلاتدار و ئۆپۆزسیون لە هاوکاریدان لە گەڵیاندا، لە بنەرەتدا لە سەر ئەم هاوپەیمانیە موقەدەسەوەیە بە دژی شۆرشی کریکاران و چەوساوەکان لە کوردستاندا، ئەمە نیشانی ئەدا چی لە هەبگەی ئۆپۆزسیۆنی بۆرژوا ناسیونالیستدایە بۆ نەداران و زەحمکێشان.

باشبژێوی و ئازادی و یەکسانی بۆ خەلکی نەداری کوردستان لە شۆینیکی تری کۆمەڵگەوە سەرچاوە ئەگرێ و بە هیزی  چینایەتی سەربەخۆی کریکاران و نەداران و لاوانی کچ و کوڕی ئەم چینە فەراهەم ئەهێنرێ.  بۆ ئەمان  ئەنجامداندانیان هەم ستراتیژ و هەم ئامانجی سۆشیالیستی خەباتی چینایەتیانە وە پەیوەست بوەتەوە بە هیز و توانای  سیاسی و فیکری و ریکخراوەیی سەربەخۆیان.

نەک هەر پرۆپاگەندەی باشبژێوی و ئاسودە بوون لە چوارچێوەی ستراتیژی و ئاسۆی ئۆپۆزسێۆنی بورژوا ناسیونالیست و هاوپەیمانانی کۆنەپەرستی ئیسلامیان، فریودان و خەڵەتاندنی جەماوەری نەداری کوردستانە، بەڵکو ئاسۆ و سیاسەت و ئامانجی ڕیفۆرمخوازی چەشنی (حزبی شیوعی کوردستان) و باڵی چەپی ناسیۆنالیزمی کورد لە چەشنی  لایەنگرانی “کۆنفیدرالیزمی دیموکراسی” سەروو چینایەتی هاوبیرانی (پ.ک.ک)ەش پەردەپۆشی و بەلارێدابردنی جەنگی چیناتی کریکارە بە دژی بورژوازی.

دەسەڵاتی دوو ئیدارەیی وسەرمایە،

 خەباتی  کرێکاران و زەحمەتکێشان لە سەرتاسەری کوردستاندا

دوو ئیدارەیی و دوو دەسەڵاتی حزبی و مێلێشیایی، بە سروشتی، بۆ چەندین ساڵە بوەتە هۆی پەرژوبڵاوی ڕیزەکانی خەباتی جەماوەری کرێکار و زەحمەتکێشی هەردوو ناوچەکە. پڕوپاگەندەی ژەهراوی ناوچەگەریەتی و دووبەرەکی و كێشمەکێشی هیزەکانی بۆرژوا ناسیونالیزم و شەڕ و پێکدانەکانیان، بۆ خۆیان کاریگەری نێگەتیڤیان هەیە لەسەر هوشیاری جەماوەری چەوساوە و نەدار لە هەردوو لادا. ئەمە جگە لەوەی کە کۆنترۆڵی ژیان و چارەنوس و ئاسودەیی ئینسانەکان لە لایەن هیزی مێلیشیای ناوچەیەوە، خۆی لە خۆیدا، تیکدانی نۆرمی ژیانی ئاسایی دانیشتوانە. بە تیكرا هەموو ئەمانە ڕیگری دروست ئەکەن لە بەردەم خەباتی شۆرشگیرانە و ئازادیخوازنەی ناو کۆمەڵگە و کاری کۆمۆنیستەکان و سۆشیالیستەکان و چالاکەوانانی بزوتنەوەی کرێکاریش قورستر ئەکا.

هەر بۆیە دوو ئیدارەیی نەک هەر واقعیەتیکی سیاسی کوردستانە بەڵكو ستراتیژیەکی حوکمڕانێشە بۆ دریژەدان بە رژێمی ئیستای کوردستان و پاراستنی بەرژەوەندی دەسەلات بە گشتی و کۆنترۆڵ و سەرکوتی جەماوەری ناڕازی. پارتی توانیویەتی بە سەرکوت و کوشتوبڕ دەسەلاتی خۆی بە ڕووی خەلکی ناڕازیدا بسەپێنی و یەکەیتیش بە هەمان شیوە و تا بۆی لوا بێت ئەو کارەی کردووە.

مەسەلەی جەوهەری ئەوەیە:  ئەم دوو ئیدارەیە لە فۆرمی ڕەسمی حکومەتی هەریم  و پەرلەمان و دامودەزگاکانی تریدا، بواری ئەوەی خۆڵقاندووە کە کەسب و کاری ئەو سەرمایەیەی کە پەیوەستە بە دەسەڵاتداری ئەم دوو حزبەوە،  و هەروەها سەرمایەکانی دەوربەریشیان، لە برەودا بێت و سوود لە  چوارچیوەی ڕژێمێکی سەرتاسەری بکات کە حکومەتی هەریمی کوردستانە، ئەمە لە لایەک. لە لایەکی ترەوە تاڵان و برۆی سەروت و سامان و سەرچاوە سروشتیەکانی ناوچەکانی ژێر دەسەلاتیان بە ئازادانە بکەن و بە زەبری هیزی چەکداری میلیشیایی و هیزە ئەمنیەکانیان درێژەی پێبدەن.

ئاشکرایە کە ئەم دابەش بوونە ناوچەیە بە گۆیرەی پەرەسەندنی دوو قۆناغی جیاوازی  ئابووری ئەم دوو ناوچەیە سەریهەڵنەداوە، بە پێجەواونەوە دابەشبوونی ناو یەک قۆناغی ئابووری و کۆمەڵایەتیە کە سەرمایەداریە. لە هەردو لایاندا سەرمایە و سەرمایەداری لە کاردایە و تۆیژەکانی سەرمایەی مالی و پێشەسازی و بازرگانیە کە ژیانی ئابووریان بەدەستە، وە بە هەزارو یەک پەتەوە بەستراونەتەوە بە سەرمایەی جیهانی.

دەوڵەتی دیفاکتۆی کوردستان و سەرمایە لە کوردستاندا وەک هەر شۆینیکی تری جیهان لە یەکەیەکدان. هەر بۆیە سەرلەنوێ بەرهەمهێنانەوەی ئەم دوو ئیدارەییە، یا ڕونتر بڵیم، ئەم دوو دەسەلاتە مێلێشیەی بورژوا ناسیۆنالیست، هەر بە زەبری چەک و میلیشیا و هیزە ئەمنیەکانیانەوە نیە، وە تەنانەت بە هۆی فاکتۆری ئایدیۆلۆژی و سیاسی و حزبی  و ناوچەگەریەتیشەوە نیە، کە سەرلە نوێ بەرهەم ئەهێنرێتەوە، بەڵکوئەمڕۆ بە دیارکراوی بە هؤی ئەوەوەیە کە لە باری ئابووریەوە ئەم دابەشبوونە ئیداریە تەبایە لەگەڵ کەڵەکەی سەرمایە و سەرمایەداری لە کوردستاندا و بەم فۆرمە کونکریتەیەوە.

هەربۆیە سەرهەڵدانی ڕاپەڕینی گشتی لە کوردستاندا و سەرکەوتنی بە کردوەی گرێدراوەتەوە بە هیز و توانای سیاسی و ڕێکخراوەیی و فیکری چینی کرێکار و زەحمەتکێشان و نەداران، و بە پلەی رێکخستن و یەکگرتنی ڕیزەکان و ئۆرگانەکانی خەباتیان لە سەرتاسەری کوردستان و عیراقدا.  ئەم ئاڵۆگۆریە تەنها وەک ساتیک لە شۆرشی کۆمەلایەتی چینی کریکار ئەتوانی سەرکەوتوو بێت.

بورژوا ناسیونالسیتی ئۆپۆزسیون و ڕەوتە بۆرژواکانی تر نەک هەر لە توانایاندا نیە دوو ئیدارەیی و دەسەلاتی میلیشییایی کۆتایی پیبهێن بەڵکو دەستەوسانیشن لە بەرامبەر هەڵخراندنی جەماوەر لەسەر ئاستی سەرتاسەری کوردستان، چونکە بە کردەوە قوڵپی شۆرش لە شۆینیکی تری کۆمەڵگەی چیانیەتی کوردستانەوە لێئەدا.

٥ ئەیەلولی ٢٠٢٠

عن Albadeel Alsheoi

اضف رد

لن يتم نشر البريد الإلكتروني . الحقول المطلوبة مشار لها بـ *

*

%d مدونون معجبون بهذه: