منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
بەیاننامەی ڕێکخراوی بەدیلی کۆمۆنیستی لە عێراق
بەرەبەیانی ڕۆژی (٨)ی کانوونی دووەمی (٢٠٢٤)، بەشار ئەسەدی تاوانبار و سەرۆکی ڕژێمی بەعس لە سوریا، شاری دیمەشق و تەختی دەسەڵاتی بەجێهێشت بەرەو مۆسکۆ، بەدوایدا ڕاگەیەندراوێکی سەرۆکوەزیرانی ڕژێمەکەی هات کە ئامادەیی ڕاگەیاند بۆ ڕادەستکردنی دامودەزگاکانی دەوڵەت و حکومەت لە سوریا بە فەرمانڕەوا نوێیەکان، کە ئەمەش بە واتای ڕادەستکردنیان دێت بە ئیسلامیـیە تیرۆریستەکان لە (دەستەی ڕزگاری شام-هيئة تحرير الشام) و ئەوانی تر.
بەم جۆرە، ڕژێمی فاشیستی بەعس لە سوریا و دیکتاتۆریـیە خوێناویـیەکەی ئەسەد کە (٥٤) ساڵی خایاند، بە شێوازێکی دراماتیک و خێرا ڕووخێندرا، ئەویش لە جەرگەی بەرفراوانترین و قووڵترین ناڕەزایەتیـیەکی جەماوەریدا بەرامبەر بەم ڕژێمە، و بە هێرشێکی سەربازیی لەناکاوی هێزە ئیسلامیـیەکان، لە سەرووی هەمووشیانەوە (دەستەی ڕزگاری شام) و هاوپەیمانەکانی، کە تەنها (١٢) ڕۆژی خایاند.
بە ڕووخانی ڕژێم، هەم سوریا و هەم ڕۆژهەڵاتی ناوەڕاست چوونە ناو سەردەمێکی نوێی ڕاگوزەر و دۆخێکی نوێی سیاسی و سەربازی، بەم پێـیەش چوونە ناو قەیرانێکی سیاسی تایبەتی پڕ لە مەترسی و چەڵێنچ (تەحەددا) بۆ زۆربەی جەماوەر، و هاتنەئارای هاوسەنگیـیەکی نوێ لەنێوان هێزە بۆرژوا ناوخۆیی و هەرێمی و جیهانیـیە بەشداربووەکان لە شکڵ پێدانی بارودۆخی سیاسی ئەم وڵاتە و باقی ناوچەی ڕۆژهەڵاتی ناوەڕاست.
ساڵانێکە حکومەتەکانی وەک تورکیا بە پلەی یەکەم و ئیسرائیل و ئەمریکا و زلهێزە ئیمپریالیستەکانی ڕۆژئاوا و دەزگا هەواڵگرەکانیان، بەهەموو شێوەیەک چ بە ئاشکرا یان بە نهێنێ، پشتگیری لە گروپە ئیسلامیـیە تیرۆریستیـیە جیاجیاکان دەکەن، بە تایبەتی (دەستەی ڕزگاری شام)، بە مەبەستی ئامادەکردنیان لەڕووی سیاسی و سەربازیـیەوە بۆ بەدیهێنانی ئەوەی لە چەند ڕۆژی ڕابردوودا جێبەجێیان کردووە. هەروەها یارمەتیشیان دان بۆ ڕەواج پێدانی گوتارێکی سیاسی درۆینە و چەواشەکارانەی ساختە و ڕووکەش بە ئامانجی جێگیرکردنی خۆیان لەم قۆناغە ڕێگوزەردا.
گومانی تێدا نییە کە کۆتایی هێنان بەهەبوونی سەربازی و هێزی میلیشیایی، و هەژمونی سیاسی و ستراتژیکی ئیمپریالیزمی ڕووسیا و ڕژێمی فاشیستی ئێران لە ناوخۆی سووریادا، یەکێک لە گرنگترین ئامانجە سیاسی و ستراتیژیـیەکانی ئیسرائیل و تورکیا و ئەمریکا و دەوڵەتەعەرەبییە هاوپەیمانەکانی بووە، و مانەوەی دەسەڵاتی ڕژێمی ئەسەدیش ڕێگر بوو لە گەیشتن بەم ئامانجە ستراتیژیـیە، بە تایبەت بۆ ئیسرائیل.
هێرشە بەردەوام و گورچووبڕەکانی ئیسڕائیل لەم دوایـیانەدا بۆ سەر (حزبوڵا-حزب الله) لە لوبنان و بۆسەر سوپای سوریا و میلیشیاکانی ئێران لە سوریا، هێز و توانای سەربازیی ئەو هێزانەی زۆر لاواز کرد، بەجۆرێک کە هەلومەرجی لەباریان فەراهەمهێنا بۆ (دەستەی ڕزگاری شام) و هاوپەیمانەکانی تا دەستبدەنە ئەنجامدانی هێرشە سەربازییەکانی ئێستایان. ئەمه جگه لە ناڕازیەتیـیەکی بەرینی جەماوەریی بەڕامبەر بەڕژێمی بەعسی دەسەڵاتدار بەهۆی داڕمانی بارودۆخی ژیانیان و ئەو سەرکوتکردنه دڕندانەیەی کە ئەم ڕژێمە تا دوا ساتەکانی مانەوەی بەردەوام بوو لەسەری.
بەم پێیە ئەم پێشهاتە سەربازیـیانە پەیوەندیـیەکی ڕاستەوخۆیان هەیە بەشەڕی کۆمەڵکوژی (جینۆسایدی) بەردەوامی ئیسرائیلەوە بۆ سەر غەززە لە ماوەی پانزە مانگی ڕابردوودا، وە پەیوەندیداریشە هەم بە تاوانەکانی ئیسرائیل لە لوبنان و هەم بە سیاسەت و ستراتیژە فراوانخوازیی و تەماحە ناوچەیـیەکانیـیەوە، بە پشتیوانیـیەکی تەواوەتی ئیمپریالیزمی ئەمریکیـشیەوە بۆ کێشانی نەخشەیەکی نوێ بۆ ڕۆژهەڵاتی ناوەڕاست.
هەروەها ئەوەی لە سوریا دەگوزەرێت، ڕەنگدانەوەی توندتربوونەوەی هەرچی زیاتری قەیرانی سەرمایەداریی جیهانی و هەڵکشانی هەرچی زیاتری ململانێی جیۆپۆلەتیکییە لەنێوان جەمسەرە ئیمپریالیستیـیە جیهانیـیەکان، بەتایبەتی لەنێوان ڕووسیا و چین لە لایەک و ئەمریکا و ئیسرائیل و زلهێزە ئیمپریالیستەکانی ڕۆژئاواش لە لایەکی ترەوە.
لە ساڵی (٢٠١١) و بەدوای ئەوەدا کە ناڕەزایەتیـیەکان و هەوڵە شۆڕشگێڕانە جەماوەریـیە سەرەتاییەکانی دژ بە ڕژێمی سوریا لەباربران، کرێکاران و زەحمەتکێشانی ئەم وڵاتە، ژنان و گەنجان و زۆربەی جەماوەری هەژار و چەوساوە لە تاریکترین بارودۆخ و هەلومەرجی جەنگێکی ماڵوێرانکەر و خۆیناویدا ژیانیان بەسەربردووە. ئەوان هەم بوون بە نێچیری ژێر چنگی توندتیژترین جۆرەکانی سەرکوت و تیرۆر و کۆمەڵکوژی لەسەر دەستی هێزە سەربازیـیەکانی سوپای سوریا و میلیشیاکانی ئێران و هێرشە ئاسمانیـیەکانی ڕووسیا، وە هەم بوون بە نێچیری ژێر چنگی تیرۆر و سەرکوتی دڕندانەی گرووپە تیرۆریستیـیە ئیسلامیـیە جیاجیاکانی وەک (ئەلقاعیدە) و (داعش) و (جەبهەتول نوسرە-جبهة النصرة) و (دەستەی ڕزگاری شام). لە ڕەوەندی ئەم ئاگردانە کارەساتاویەشدا (المحرقة المأساوية) سەدان هەزار کەس بوونە قوربانی، و ژیانی مەدەنی کۆمەڵگا وێران کرا و ملیۆنان کەس ئاوارە کران بۆ دەرەوەی سوریا، یا ناچارکران بە کۆچی زۆرەملی لە ناوخۆی وڵات و بەسەربردنی ژیان لە ئۆردوگای چادرنشینیدا.
ناڕەزایەتیـیە جەماوەریـیەکانی ساڵی (٢٠١١)، ئامانجیان ڕزگاربوون بوو لە ڕژێمی ئەسەد و گەیشتن بە ئیرادەی سیاسی سەربەخۆی خۆیان بۆ دەستەبەرکردنی ژیانێکی خۆشگوزەران و ئازادی و یەکسانی، لە چوارچێوەی ئەو شەپۆلە شۆڕشگێڕیـیەی کە لەو کاتەدا ڕۆژهەڵاتی ناوەڕاستی گرتبۆوە، بەڵام ئەم ڕاپەڕینە شۆڕشگێڕیـیە هەرزوو پاشەکشەی کرد. ئەمڕۆ بە ڕووخانی ڕژیم، یەکێک لە گرینگترین بەربەستەکانی بەردەم هەوڵ و کۆششی جەماوەر بۆ گەیشتن بە ئامانجە ڕزگاریخوازانەکانیان لاچووە، لێرەوە ئەم هەوڵ و کۆششە بەناچاری جارێکی دیکە خۆی دەخاتەوە ڕوو، ئەگەرچی لەم دەورەیەدا بە فۆرمێکی جیاوازتر و بە پێداگریـیەکی زیاترەوە، ئەمەش پرسێکی سیاسی زۆر گرنگە، چونکە سەرهەڵدانەوەی ئەم هەوڵ و کۆششە، ئەگەرێکە بۆ شکڵ پێدانەوەی پەرەسەندی مێژووی خەباتی سیاسی چینایەتی لە کۆمەڵگای سوریا، لە ئێستا و لە داهاتوویدا.
بەم پێـیە، ئەم هەلومەرجە نوێـیە، کە ڕژێمی ئەسەدی تێدا نەماوە، ئەگەری زۆرە جەماوەری کرێکاران، خەڵکی چەوساوە و ژنان بخاتەسەر هێڵی ڕووبەڕووبوونەوە لەگەڵ دەسەڵاتە نوێیەکان، بەڵام ئەو جەماوەرە ناتوانن ئەم خەباتە بەرەو سەرکەوتن بەرن بەبێ خۆ ڕێکخراوکردن بەپێی بەرژەوەندیـیە چینایەتیـیە سەربەخۆکانی خۆیان، وە بەبێ بەرجەستەکردنی دیدگا و بەرنامە کارێکی سۆشیالیستی شۆڕشگێڕانە. ڕێگای ڕزگاربوون لە چنگی هەلومەرجی ئێستا، گواستنەوە نیـیە لە زیندانی ڕژێمێکی دیسپۆتیکەوە بۆ زیندانێکی دیکەی هێزەکانی دژە شۆڕشی بۆرژوا ئیسلامی و پشتیوانە نێودەوڵەتیـیەکان، بەڵکو ئەم ڕێگای ڕزگاربوونە بە خستنەڕووی ئەڵتەرناتیڤی سۆشیالیستی شۆڕشگێڕانە و بە پشتبەستن بە بەرنامەکارێکی چینایەتی سەربەخۆی جەماوەری کرێکاران و زەحمەتکێشان و ژنان و هەموو ستەملێکراوان، فەراهەمدێت.
(ڕێکخراوی بەدیلی کۆمۆنیستی لە عێراق) هاوپشتی پتەوی خۆی ڕادەگەیەنێ بۆ جەماوەری کرێکار و زەحمەتکێش و ژنانی ستەملێکراو و گەنجان و بەهەژارکراوان و هەموو ئاوارەبووەکانی سوریا، لە خەباتیاندا بۆ هەر باشترکردن و چاکسازیـیەک لە بارودۆخی ئابووری و ژیان و گوزەرانیاندا. هەروەها هاوپشتی تەواوی خۆی دەردەبڕێت بۆ هەر دەستپێشخەریـیەک بۆ ڕێکخستنی خەباتی چینایەتی سەربەخۆیان، و هەر هەنگاوێک کە بەرەو گەیشتن بە ئامانجە ڕزگاریخوازیـیە سۆسیالیستیـیەکانی چینی کرێکار و زەحمەتکێشان دەیگرنەبەر.
هەروەها ئێمە وەک ڕێکخراوێکی کۆمۆنیستی شۆڕشگێڕی نێونەتەوەیی، هاوخەبات و هاوکارین لەگەڵ هەموو ئەو مارکسیست و کۆمۆنیستە شۆڕشگێڕانەدا کە هێڵی مارکسیستی و هێڵی خەباتی چینایەتی سەربەخۆی پرۆلیتاریا لە ناوجەرگەی دۆخی ئێستای سوریادا دەگرنەبەر و هاوخەباتیانین لەگەڵیاندا بۆ گەیشتن بە ئامانجەکانی شۆڕشی سۆسیالیستی و ڕووبەڕووبوونەوەی هەموو ڕەوتە بۆرژوا ناسیۆنالیست و ئیسلامیـیەکان و پشتیوانەکانیان لە وڵاتانی جۆراوجۆری بۆرژوازیی.
(٩)ی دێسمبەر (کانوونی دووەم)ی ٢٠٢٤
