منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ساڵانە لە مانگی ئایاردا ڕێكخراوی “مارکس ٢١” هەڵدەستێت بە ئەنجامدانی كۆنفرانسێكی گەورە لە باڵەخانەى (ڕێكخراوی ڕۆزا لۆکسمبۆرگ) لە شاری بەرلین. لەم کۆنفرانسەدا چالاكوانان، نووسەران، سیاسەتمەداران، و سۆسیالیستەكانی گەلێک وڵاتانی جیهان بەشداریی دەكەن.
لەو باسە گرنگانەی کە لە کۆنفراسی ئەمساڵدا تیشکی خرایە سەر:
- پرسەكانی بەشی ئەڵمانیای خۆرهەڵات
ئەڵمانیای خۆرهەڵاتیی، واناسراوە، كە بووە بە مەیدانی گەشەسەندنی ڕاسیستەكان، گفتوگۆیەک لە میدیای ئەڵمانییدا هەیە، كە دەڵێت، هەژاری و بندەستی ئەڵمانیای شەڕقیی سەر بە سۆڤێت، بۆتە هۆكارێک بۆ سەرهەڵدانی فاشیستەكان. بەڵام هەموو چیرۆكەكان و بەڵگەنامەكان دەیسەلمێنن كە هیتلەر لە 1930 زۆرترین دەنگی لە ناوچەى سەكسۆنیا هێناوە، كە ئێستاش بووەتەوە بە مەیدانی ئەوان. (شارلۆتە پاپكە)، ئەندامی هاوپەیمانیی (ئونتایلبار) (کە بەرەیەكی یەكگرتوو دژی فاشیزمە) دەڵێت: “ئەوەى لە سەكسۆنیا بەم دواییانە ڕوویدا [واتا بەرزبوونەوەى فاشیستەكان بۆ ڕیزی یەكەم] كاریگەریی لەسەر هەموو ئەڵمانیا دادەنێت”. هەروەها شارلۆتە بەدووری نازانێت هاوشێوەى 1933 هاوپەیمانیی نێوان پارتی فاشیستەكان و كۆنزەرڤاتیڤەكان ئەنجام بدرێت لە هەڵبژاردنی ئەم پاییزەی هەرێمەكەدا. دەڵێت “كاریگەریی لەسەر هەموو ناوچەكان دەبێت. بەشداریكردنی بەشێكی پارتە فاشیستەكان لە حكومەتدا چیتر شتێكی دوورەدەست و مەحاڵ نییە لە حكومەتی فیدراڵدا نەك تەنها لە حكومەتی هەرێمایەتییدا”. بەشی ئەوەى پێیدەگوترێت ئەڵمانیای خۆرهەڵاتیی، وەك تورینیا، براندنبۆرگ، هاوشێوەى ساكسۆنیا، فاشیستەكان چوونەتە ڕیزی سەرەوەى حزبەكە. ئەمەش ئەزموونی ساڵی 1933مان بەبیر دەهێنێتەوە.
وەك هەنگاوێك بۆ ڕووبەڕووبوونەوە و دەرخستنی ئەم مەترسییە، هاوپەیمانێتیی (ئونتایلبار) کە ساڵی ڕابردوو لە بەرلین، بە خۆپیشاندانی نیو ملیۆنی بەشداریی كرد، بڕیاری داوە و ئامادەكاریی دەكات بۆ خۆپیشاندانی بەردەوام.
- گۆڕانی كەش و هەوا
بەشێكی سەرەكیی كۆنفرانسەكە میوانداریكردنی كەسانی پسپۆڕ و زانای بواری كەشناسیی و تێكچوونی ژینگە و كەش و هەوا بوو، کە باسیان لە ئاڵوگۆڕە مەترسیدارەكانی بەردەممان كرد، هەروەها باسیان لەوەش كرد ئەگەر بێتو بەزووترین كات شۆڕشگێڕانەترین پلان بۆ ڕزگاركردنی مرۆڤایەتیی دانەنرێت و مۆدێلی ئەم بەرهەمهێنانە نەوەستێنرێت كە لەسەر بنەمای سووتاندنی زیاتری وزەى سووتەمەنیی و گازی ژەهراوی و پلاستیك بەندە، ئەوا بە ماوەیەكی كەم، كۆتایی ژیان لەسەر زەوی نزیك دەبێتەوە، ئەڵبەت نەك بەهۆى پێشبینیی ئایینەكان، بەڵكو بەهۆى حوكمڕانیی 150 ساڵەى سەرمایەدارییەوە.
- ئیمپریالیزم
بەشێكی دیكە بریتیی بوو لە باسكردن لە پێشهاتەكانی ئیمپریالیزم و جەنگی ئیمپریالیستەكان لە ناوچەكە و جیهان و شەڕی بازرگانیی چین و ئەمریكا و تێكدانی زیاتری خۆرهەڵاتی ناوەڕاست. لەم بەشەشدا كەسانی چالاكوانی ئەنتەرناسیۆنالی دژە ئیمپریالیزم بەشداربوون، هەروا چالاكوانانی بواری دژەجەنگ.
- یەكێتیی ئەوروپا و دەرچوونی بڕیتانیا
ئەم بابەتە بەهۆى هەڵبژاردنی چەند ڕۆژی ڕابردووی پەرلەمانی ئەوروپا و هەڵكشانی پارتە فاشیستە دژە ئەوروپییەكان و دژە دیموكراتییەكان و نەرمینواندنی كۆنزەرڤاتیڤەكان بۆ فاشیستەكان، و دەرچوونی بڕیتانیا و بردنەوەى پارتی “برێكسیت” و نایجڵ فەراج، فاشیست، پرسێكی دیكەى گەرمی ناو كۆنفرانسەكە بوون.
- خۆرهەڵاتی ناوەڕاست
بەشی خۆرهەڵاتی ناوەڕاست بەشێكی ئێجگار سەرەكیی كۆنفرانسەكە بوو، بۆ نموونە پانێڵەكانی وەك “ئیسلامی سیاسیی: لێكدانەوەیەكی ماركسیستیی ” بۆ حوسام حەمەلاوی، پرسێكی گرنگ بوو… توركیا لە ژێر چنگی ئەردۆغاندا، سیمینارێك بۆ ڕۆن مارگولیسی سۆسیالیستی توركیی، پرسێكی دیكەى گرنگ بوو…. هەروەها شۆڕشی سودان و هەلومەرجی هەنوكەیی ئێران، سیمینارێك بۆ پەیمان جەعفەری، سۆسیالیست و مامۆستای زانكۆی ئەمستردام، و پرسی كورد لە سوریا بۆ من و چەندان بابەتی دیكە.
هەروەها هاوڕێ پێشڕەو موحەممەد، هەڵسوڕاوی مارکسیستی بە پانێڵێك بەشداربوو بە ناوی “ڕۆژاڤا و ڕوانگەكانی خەباتی ڕزگاریی نەتەوەیی كوردیی” بەشداری كرد.
