منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
بەیاننامەی ڕێکخراوی بەدیلی کۆمۆنیستی لە عیراق
ڕۆژی (٢٠)ی ئۆکتۆبەری (٢٠٢٤) هەڵبژاردنی خولی شەشەمی پەرلەمانی هەرێمی کوردستان بەڕێوە چوو، ئەمەش پاش کەمپێنێکی ئینتیخاباتی دەیان ملیۆن دۆلاری چەند هەفتەیی نێوان حزبە بورژوا قەومی و ئیسلامی و نیولیبرلەکان کە لیوانلێو بوو لە چەواشەکاری و وادەی درۆ و کۆنەپەرستی سیاسی و دژە ژنی و مۆڕاڵی دژە ئینسانی ئیسلامیزم.
لەنێو ئەم کەمپینەدا ئاکامی هەڵبژاردنەکەش بە جۆرێک دیاربوو کە هیچ ئاڵوگۆڕێکی جیدی لە هاوکێشە سیاسیـیەکانی هەرێم و هەیکەلی دەسەڵات و دوو ئیدارەیی و تەنانەت پێگەی ئۆپۆزسیۆنیش ڕوونادات، جگە لە جێگۆرکێ بە چەند کورسییەکی پەرلەمانی بۆ ئەم حزبی دەسەڵات یا ئەوی تریان، و بۆ ئەم حزب و لایەن لە ئۆپۆزسیۆن یا ئەوی تریان. ئێمە لە بەیاننامەی پێشترماندا دەربارەی بانگەشەی هەڵبژاردن جەختمان لەسەر ئەوە کردووە کە “هیچ خۆشباوەڕیـیەک برەو پێنادەین لەبەرامبەر ئەم هەڵبژاردنەدا، کە هیچ گۆڕانکاریـیەکی نە ڕیشەیی و نە تەنانەت جدی ئەنجام بدرێ لە ڕێگەیەوە”.
ئەنجامەکانی هەڵبژاردن، بەدەر لە هەر ساختەکاریـیەک کە لە دەنگەکاندا کرابێت، هەر دوو حزبی بورژوا ناسیۆنالیست میلیشیایی دەسەڵاتداری (پارتی و یەکێتی)، وەک حزبە براوە سەرەکییەکانی هەڵبژاردن، لە جێگەی پەرلەمانیی خۆیاندا هێشتەوە، بەزیادبوونی چەند کورسییەک بۆ (یەکێتی) و کەمبوونی چەند کورسییەکی (پارتی). و (نەوەی نوێ)ش، لە کەمپی بورژوا ئۆپۆزسیۆنی نیولیبرالی ناو هەمان سیستەم، بووە حزبی سێهەم. بەمەش بەشی یەکەمی شانۆی هەڵبژاردنی ئەم جارەی پەرلەمان کۆتایی هات.
ئەم ئەنجامانە بۆ هەر چین و توێژێکی کۆمەڵایەتی مانای چینایەتی تایبەتی خۆی هەیە و لەم پێگەیەوە هەڵیاندەسەنگێنێ. بۆ توێژی ووردە بورژوا ناسیۆنالیستەکان و ڕۆشنبیران و چاکسازخوازانی ئەم تۆێژە کۆمەڵایەتیـیە و ئەوانەشیان کە بەس بەناو سۆشیالیست و شیوعیین، کە هەردەم دادوفیغانیانە بەدەست دەسەڵاتی دوو حزبی میلیشیایی و مافیایی، و گەندەڵی و دوو ئیدراەییان، ئەنجامەکانی ئەم هەڵبژاردنە شۆکێک بوو بۆیان و بێـئۆمیدی کردن و لە خەوێک ڕایپسکاندن کە بەهەڵبژاردنەوە دەیانبینی.
بۆرژوا ئۆپۆزسیۆنی قەومی و ئیسلامی و نیولیبرالیش گومانی لەوەدا نەبوو کە ئەنجامەکانی هەڵبژاردن هەمان ئەم دەسەڵاتە دوو حزبیـیە لە جێگەی خۆیدا دەهێڵیتەوە، و ئەم ئۆپۆزسیۆنەش لەم گەمەیەدا ئەو جێگەیەیان دەبێ کە ئیستا هەیانە بە کەمێک گۆڕانکاریـیەوە، و دەتوانن پشکی خۆیان لەم گەندەڵکاری و ڕژێمەدا درێژە پێبدەنەوە. گەر ئەمڕۆ هەر پرتەوبۆڵەیەکیشیان هەبێ لە بەرامبەر هەڵبژاردن، بۆ خۆئامادەکردنیانە بۆ (٤) ساڵی داهاتوو تا دریژە بدەنەوە بەم پیشە سیاسیـیە مشەخۆریـیەیان کە شتیک نیـیە جگە لە تەواوکاری ڕژێمەکە و ئیحتواکردنی وزەی شۆڕشگێڕانەی جەماوەری زەحمەتکێش و ناڕازی، و بردنی پشکەکانی خۆیان لە دەسەڵات و سەروەت.
بۆ چینی کرێکار و گەنجان و ژنان و خەباتکارانی ناڕەزایەتـیـیە جەماوەریـیەکانی ئەم چین و تۆیژانە، گەر هەر ئۆمێدێکیان هەبووبێ بە هەڵبژاردن ئەوە لە پیناوی چاکتربوونی ژیانیاندا بوو نەک گۆڕینی دەسەڵات و ڕووخاندنی ڕژێم، وەک ئەوەی (یەکێتی) و بورژوا ئۆپۆزسیۆن تەپڵیان بۆ لێدەدا، بۆیە بەشێکیان کەوتنەژێر کاریگەریـیەکانی وەهمی ڕیفۆڕمخوازی و چاوەڕوانی لە بورژوازی و حزبەکانی، و وەهمەکانیان شوێنی بەرژەوەندیـیە واقعیـیەکانیانی گرتەوە.
پاش شەش ساڵ درێژەدانی هەرچی زیاتری باری سەختی ئابووری و نەداری و مووچەبڕین و بێکاری بۆ جەماوەری زەحمەتکیش لە هەرێمی کوردستان، و تێکڕماندنی خزمەتگوزاری تەندروستی و پەروەردە و خوێندنی گشتی، ئەنجامەکانی هەڵبژاردن بەو مانایەیە کە سەرلەنوێ جەماوەر دەکەوێتەوە بەردەم چەند ساڵی تری هێرشی ئەم حزبانە بۆ سەر گوزەران و مافەکانیان و چارەنوسیان.
لەم هەڵبژاردنەدا (پارتی) و (یەکێتی) خۆیان جێگیرتر کرد و تەنانەت ئۆپۆزسیۆنیش شوێنی خۆی خۆشترکرد، بەڵام کومەڵگەش لە ئاکامی ئەم هەڵبژاردنە و ئەم پرۆسە سیاسیـیە، واقعی تر ڕووبەڕووی ئەو تەنگژەیە بۆتەوە کە تێیکەوتووە، و زەمینە لەبارترە بۆ ئینسانی زەحمەتکێش و ستەمدیدە لە هەرێم تا تەمومژێک کە چینە داراکان و حزبەکانی پێکیان هێنابوو بۆی، لە بەرچاویاندا بڕەوێتەوە.
دیارە ڕژێمی سیاسی میلشیایی هەرێم لە هەوادا هەڵنەواسراوە، بەڵکو پێی لەسەر زەویـیە و لەناو پرۆسەی کەڵەکەبوونی سەرمایە و بازاڕی جیهانی و سیستمی سەرمایەداری دایە، و لەناو نیزامی سیاسی نیودەوڵەتی بورژوازیدا جێگەیەکی هەیە.
قۆرغکاریـیەکانی بۆ سەروت و سامانی هەرێم و تاڵانوبڕۆکانی جێگە و پێگەی تایبەتی پێداوە لەناو ئەم سیستمە ئابووریـیەدا، و هێزە میلیشیاکەی لە پەیوەند بەم سیستمەوە و ڕاگرتن و پاراستنی لەم هەرێمەدا مانای هەیە. هەر بەم پێیەش سەرکوتی سیاسی لە هەردوو زۆن و دوو ئیدارەیـیەکەشیان هەر لەسەر ئەم بنەمایەوە بەرهەم دەهێنرێتەوە، ئەمە سەرباری ئەوەی کە چارەنوسی سیاسی کۆمەڵگە و ڕەوەندە سیاسیـیەکانی خروانەتە ژێر ڕكێفی بەرژەوەندە جیۆپۆلیتیکسەکان و نفوز و هیژمۆنی ئەمریکا و هەردوو دەوڵەتانی ئێران و تورکیاوە.
ئیستا ئەو ڕاستیـیە بە پێداگریـیەکی زیاترەوە بەرەو ڕووی پرۆلیتاریا و ژنان و گەنجان جەماوەری ناڕازیـیە لە هەرێم کە خەبات بۆ گۆڕینی بارودۆخەکە لە بەرژەوەندی خۆیان ئەوە دەخوازێ کە لە پێگەی چینایەتی خۆیانەوە دەستپێبکەن، و لە دەوری بەرنامە و سیاسەت و فیکری سەربەخۆی چینایەتییان ڕێکخراو بن و خەباتیان بەرەوپێش بەرن.
(ڕێکخراوی بەدیلی کۆمۆنیستی لە عێراق) پەیگیرانە تێدەکۆشی تا ئەم خەباتە چینایەتیـیەی پرۆلیتاریای کوردستان هەرچی پتەوتر و خێراتر بەرەوپێش بچێت، وە ئەرکی سیاسی و فیکری و ڕێکخراوەیی خۆی بە ئاڕاستەی شکڵگیری ئەم هێزە چینایەتیـیە ڕزگاریخوازانە بە ئاسۆ و ئامانجی کۆمۆنیستی پیادە دەکات.
٢٤ی ئۆکتۆبەری ٢٠٢٤
