منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ڕۆژی (٢١)ی کانوونی دووەمی (٢٠٢٥) پەرلەمانی عێراق دەنگی دا بە هەموارکردنەوەی یاسای باری کەسایەتی ژمارە (١٨٨)ی ساڵی (١٩٥٩)، وەک بەشێک لە کۆمەڵە یاسایەک، کە یاسای لێبوردنی گشتی و یاسای گەڕاندنەوەی زەویوزار بوو بۆ خاوەنەکانیان، ئەمەش لە ڕێکەوتنێکی نێوان هێزە ئیسلامیـیە- تایەفگەری و ناسیۆنالیستەکانی باڵادەستی ناو پەرلەمان، کە گوزارشێکە لە کۆنەپەرستی و هەلپەرستی و بە دواداچوونی دەسکەوتی سیاسیی ئەم هێزانە لەسەر حیسابی ژنان و منداڵان و کۆمەڵگا بە گشتی.
ئەم هەموار کردنەوەی یاسای باری کەسایەتییە، سیاسەتێکی دوژمنکارانەی هێزە فەرمانڕەواکانی ئیسلامی سیاسییە دژ بە ژنان و منداڵانی عێراق، و گورزێکی کوشندەیە لە ماف و ئازادییەکانیان، ئەمەش لە سایەی کۆنتڕۆڵی نیمچە ڕەهای ئەو هێزە میلیشی و خێڵەکی و ئایینییانەی کە دەستیان داگرتووە بە سەر چارەنووسی کۆمەڵگە و جەماوەردا، و فەرمانڕەوایەتیشیان دەکەن لە ڕێگەی دەزگاکانی دەوڵەتی بۆرژوازی و ڕژێمە سیاسی ئیسلامی و قەومیـیەکەیەوە.
ئامانجی ئەم هەموارکردنەوەی یاسای باری کەسایەتیـیە، کە ئیلهامی لە مەزهەبی فیقهی جەعفەری وەرگرتووە و لەسەر بنەمایەکی تائیفیانە داڕێژراوە، بریتیـیە لە پتەو کردنی کۆنتڕۆڵی دەزگا ئایینی و مەزهەبییەکان بەسەر ژیان و چارەنووسی ملیۆنان هاوڵاتیدا، ئەمەش بە هاوبەش لەگەڵ هێز و لایەنەکانی ئیسلامی سیاسی، کە لە ڕێگەی ئەم یاسایەوە، ئەم حیزب و هێزانە، خۆیان دەکەنە بەرپرسیار لە هاوسەرگیری و جیابوونەوە و سەرپەرشتیکردنی منداڵ و میرات و هتد.. و لە ئەنجامدا بەکۆیلەکردنی ژنان و تاوانکاری بە شوودانی کچانی منداڵ و پەرەپێدانی دڕندایەتیـیەکانیان لە هەموو بوارە جۆراوجۆرەکانی کەسێتی و گشتی ژناندا، و کوشتنی هەموو هیوایەکی منداڵان بە چێژوەرگرتن لە ژیانێکی ئاسوودە و ئازاد، جگە لە قووڵکردنەوە و فراوانکردنی جیاوازی تائیفی لەناو کۆمەڵگەدا.
(هاوپەیمانی ١٨٨) کە چەند مانگ لەمەوبەر درووست بوو بۆ وەستانەوە بە دژی پەسەندکردنی هەموارکردنەوەی ئەم یاسایە، و چەندین کەمپەین و چالاکی چڕ و فراوانی ئەنجامدا، بەڵام نەیتوانی بەم ئامانجەی خۆی بگات، ئەویش بە شێوەیەکی سەرەکی بەهۆی پێداگریی سەرسەختانەی هێزە بۆرژوا ئیسلامیـیە فەرمانڕەواکان و بەرژەوەندیـیە سیاسی و ئایدیۆلۆژیـیەکانیان کە پەسەندکردنی ئەم هەموارکردنەوەیە بەشێکی ڕیشەییەتی، هەروەها بەو هۆیەشەوە کە بلۆکە پەرلەمانیـیە جۆراوجۆرەکانی خاوەن ئاڕاستەی ناسیۆنالیستی و ئیسلامیستی ڕێکەوتن و گرێبەستی ڕیسوای دژە ژنیان ئەنجامدا لەگەڵ بلۆکە پەرلەمانییەکانی ئیسلامی سیاسی شیعەدا، بۆ پەسەندکردنی هەموارکردنەوەکە. ئەم ئەزموونە ئەوەی نیشانداین کە خۆشباوەری پەنابردن بۆ پەرلەمانتاران و لایەنەکانی ناو حکومەت چەند زیانبەخشە بۆ خەبات بە دژی هەموارکردنەوەی یاساکە.
ئەم دەسەڵاتە خۆی دەرگیری چەندین قەیران و دابەشبوونی ڕیزەکانیەتی، و هەر کاتێکیش بکەوێتە بەر فشاری جەماوەری کرێکاران و زەحمەتکێشان و ژنان و گەنجان بە دژی هەژاری و بێکاری، بۆ بەدەستهێنانی ماف و باشکردنی باری ژیان و دابینکردنی خزمەتگوزارییە گشتییەکان، یان هەر کاتێک هەست بکات بە مەترسی لە ئەنجامی سەرهەڵدانی بزووتنەوەی ناڕەزایەتی ئازادیخواز و شۆڕشگێڕانە، زیاتر پەنا دەبات بۆ دەمکوتکردن و سەرکوتی مافەکان.
وەستانەوە بە دژی هەموارکردنەوەی کۆنەپەرستانەی یاسای باری کەسایەتی یەکێکە لە گرنگترین ئەولەویەتی هێزە سۆشیالیست و کرێکاریـیەکان و بزووتنەوەی ئازادیخوازانەی ژنانە، نەک تەنها لە سەر ئاستی عێراق، بەڵکو لەسەر ئاستی ناوچەی ڕۆژهەڵاتی ناوەڕاستیش کە تیایدا جەماوەر دەناڵێنێت بەدەست باڵادەستی هێزەکانی ئیسلامی سیاسی و باڵادەستی پیاوسالاری بە سەر لایەنە جۆراوجۆرەکانی ژیانی ئابووری و سیاسی کۆمەڵایەتی و ڕۆشنبیریدا.
(ڕێکخراوی بەدیلی کمۆنیستی لە عێراق)، پەیگیرانە خەبات دەکات شانبەشانی بزووتنەوەی ڕزگاریخوازانەی ژنان و بزووتنەوەی کرێکاری و گشت کۆمۆنیست و ئازادیخوازان و هەموو ئەو توێژانەی کە زەرەرمەندن لە پەسەندکردنی ئەم هەموارکردنە، لەپێناو پاشەکشەپێکردنی حکومەت و پەرلەمان و شکستپێهێنانی هەموارکردنەوەی یاساکە.
ڕێکخراوی بەدیلی کمۆنیستی لە عێراق
٢٢ی کانوونی دووەمی ٢٠٢٥
