بارودۆخی سیاسی عێڕاق و سیاسەتی ئێمە

پەسندکراوی پلینۆمی سێهەمی کۆمیتەی ناوەندی (ڕێکخراوی بەدیلی کۆمۆنیستی لە عێڕاق)

هەڵبژاردن و پەرلەمان، زەوتکردنی مافی جەماوەرە لە پیادەکردنی ئیرادەی سیاسی خۆیان

لە ساڵی (٢٠٠٣)وە تاکو ئێستا، لەڕێگەی داگیرکاری و بەکارهێنانی هێزی سەربازی و میلیشیایی و دارایی و هەروەها لەڕێگەی کاریگەری دەوڵەتان و شەڕی بەوەکالەت و بەرژەوەندی جیۆپۆلیتیکی جەمسەرە ناوچەیـیەکان و ئیمپریالیزمی ئەمریکیـیەوە، ژیانی سیاسی لە عێڕاقدا نەخشەی بۆ کێشراوە.

لەو ماوەیەدا، دیمەنە سیاسیـیە دراماتیکی و تراژیدیـیەکانی عێڕاق، بریتی بوون لە شەڕە تیرۆریستییە تاوانکارەکانی (ئەلقاعیدە) و (داعش) و هاوشێوەکانیان لەدژی دانیشتوان، بریتی بوون لە شەڕی میلیشیاکان و تیرۆرکردنەکانیان و خنکاندنی ئازادیـیەکان، هەروەها بریتی بوون لە بەکارهێنانی سوپا و بۆردومانی ئاسمانی و شەڕە خوێناویەکانی ئەمریکا و هاوپەیمانانی، لەگەڵ شەڕی بەوەکالەت و شەڕی تایەفی و تیرۆر و کۆمەڵکوژی، ئەمە وێڕای وێرانکاری و ئاوارەبوون و هەژاری ملیۆنان لە هاووڵاتیان کە هاوپێچی هەموو ئەو دیمەنانە بووە.

ئەم جەنگ و کوشتار و تیرۆرانە، بەشێک بوون لە سیاسەت و ستراتیژی ئیمپریالیزمی ئەمریکا و هەوڵوتەقەلاکانی لەگەڵ هەوڵوتەقەلای وڵاتانی تری ناوچەکە بۆ چەسپاندنی دەسەڵاتی بۆرژوا ئیسلامی و قەومی لە عێراقدا پاش داگیرکردنەکەی.

هەر ئەو هێزە کۆنەپەرستە بۆرژوازیانە پەرلەمان بەڕێوە دەبەن و دەیکەنە بۆرسەی سیاسی بۆ دابەش کردنی پشکەکانی دەسەڵات و سامانی دزراوی کۆمەڵگا لەنێوان باڵە جیاجیاکانی ڕژێمەکەدا، کە خۆیان کۆنتڕڵی وەزعی وڵاتەکەیان بە دەستە و هێشتا هەر عەسکەرتاریەت و میلیشیاگەری و سەرکوت و ستەم بەرجەستە دەکەنەوە، بۆیە هەر ئەم هێزانەن کە پەرلەمان و هەڵبژاردنیان پاڵ پێوەناوە بۆ پەراوێزی ژیانی سیاسی و لە هەموو مانایەکی سیاسی بەتاڵیان کردۆتەوە بۆ زوربەی هەرە زۆری دانیشتوان. ئەمە کردەی خودی بۆرژوازی ناوخۆ و نێودەوڵەتیـیە کە پەرلەمان و هەڵبژاردنی کردۆتە قەشمەری، بەر لەوەی (ڕاپەڕینی ئۆکتۆبەری ٢٠١٩) پاڵی پێوە بنێ بۆ پەراوێزی گۆڕانکاری و ئاڵوگۆڕە بنەڕەتییە سیاسیـیەکانی ئەم وڵاتە.

پەرلەمان و هەڵبژاردن خۆی هەر لە سەرەتاوە ئامرازێک بوو بۆ زەوتکردنی مافی جەماوەر لە بەرجەستەکردنەوەی ئیرادەی سیاسی خۆیان.

دەوڵەتی بۆرژوازی لە عێڕاق

ناوەڕۆکی چینایەتی بۆرژوازی دەوڵەت و سیستەمی سیاسی لە عێڕاق و ئەم حکومەتەی ئێستا و ئەوەش کە بە دوایدا دێت، بەناو حکومەتی “زۆرینەی نیشتمانی” یا حکومەتی “توافقی”، لە بنەڕەتدا بەو پەیوەندییە زۆرەملێیی و سەرکوتگەریـیە دیاری دەکرێت کە ئەم دەوڵەتە هەیەتی بە چینی کرێکار و جەماوەری زەحمەتکێش و نەدارەوە. هەر ئەم پەیوەندیـیەشە کە فاکتەری هاوبەش و یەکلاکەرەوەیە لەوەی هێزە بۆرژوا قەومی و تائیفی و لیبراڵ و چاکسازیخواز و تەنانەت (تشرینیەکان)ی هاوپەیمانی ڕژێمیش، پەیوەست دەکاتەوە بە یەکەوە لە بەرامبەر کرێکاران و زەحمەتکێشاندا.

پەرتەوازەیی سیستەمی سیاسی وڵات و ڕۆڵ دابەشکردن لەسەر بنەمای نەتەوە و تائیفەی دینی جیاواز و لەم ڕێگەیەشەوە بە تاکخستنەوەی هاوڵاتیانی ئەو ناوچانە کە لەم بەناو “پێکهاتانە”ی تێدایە بۆ چەوساندنەوە و خەفەکردنی چینی کرێکار و جەماوەری زەحمەتکێش و چەوساندنەوەی ژنان و لاوان، خۆی درێژکراوەیەکی پێویست و تەواوکەری ئەم پەیوەندییە چینایەتییە زۆرەملێیەی دەوڵەتی سەردەم و حکومەتی ئێستا و حکومەتی ئایندەیە لە عێڕاقدا، بە کرێکاران و زەحمەتکێشان و ژنانی ستەم دیدەوە.

(تشرینیەکان)ی جۆری (ئیمتیداد) و هاوپەیمانەکانیان لە (نەوەی نوێ)، لە ڕاستیدا ئەمانە ئامڕاز و قەوارەی سیاسین بۆ لەقاڵبدانی بزوتنەوەی شۆڕشگێڕانە و پوچەڵکردنەوەی وزەی  شۆڕشگێڕانە و کەنەڵایزەکردنیان بۆ ناو دامودەزگای ئەم دەوڵەتە سەرکوتگەرە بۆرژوازییە و پەرلەمانەکەی، وە هەموو ئەمانەش بە ناوی چاکسازی و ڕاپەڕین و ئاواتەکانی لاوانەوە.

واقعەکە ئەوەیە کە حکومەت و سیستمی سیاسی بە شێوەیەکی هەمەلایەنە نوێنەری هێز و گروپی بۆرژوازی نەتەوەیی و تائیفەی دینیی جیاوازە، لە ناسیۆنالیستی عەرەب و کورد و سوننە و شیعە و میللەتان و ئایین و تائیفەکانی تریش، هیچ شتێک لەم سیستەمەدا لە ئارادا نیـیە بەناوی بەرژەوەندی جەماوەری کرێکار و زەحمەتکێش و نەدار، وەیا جەماوەر بەگشتی، نە لەسەر ئاستی ناوچەکانی ژێر دەسەڵاتیان و نە لەسەر ئاستی وڵات. ئەمە و شتێکیش لە ئارادا نییە بە ناوی “نیشتمان” و “عێراق” جگە لە هێمایەک بۆ بەرجەستەکردنەوەی بەرژەوەندیـیە بۆرژوا چینایەتییە سیاسی و ئایدیۆلۆژییەکانیان، بۆیە ئەوەی هەیە بەرژەوەندی چینایەتی ناکۆکە لە نێوان کار و سەرمایەدا، لەگەڵ بەرژەوەندی ناکۆکی نێوان گروپ و هێزە جیاوازەکانی بۆرژوا نەتەوەیی و مەزهەبی کە ناکۆکن لە نێوان خۆیاندا، بەڵام لەناو یەکێتیـیە گشتیـیەکەیاندا وەک نوێنەری سەرمایە دژی کرێکاران و زەحمەتکێشان و خەباتیان.

ئەرکی شۆڕشگێڕانەی دەستبەجێی جەماوەری کرێکار و زەحمەتکێشی شۆڕشگێڕ، ڕووخاندنی ئەم دەزگا سەرکوتگەرەی بۆرژوازی و دامەزراندنی دەوڵەتی پرۆلیتاری شۆڕشگێڕە لە شوێنیدا، واتە دەوڵەتی کرێکاران و زەحمەتکێشان و بەهەژارکراوانی ڕێکخراو لە شوورا جەماوەرییەکانیاندا تا بتوانن ئامانجە ئابووری و کۆمەڵایەتیـیە سۆسیالیستیـیەکانی خۆیان بێننەدی.

بەدیلی ئابووری سۆسیالیستی

هێزە بۆرژوازییەکان هەر هەموویان، چ ئەوانەی لە دەسەڵاتدان یان ئەوانەی ئۆپۆزسیۆنن، هیچ بەدیلێکی ئابوورییان نییە بۆ کۆمەڵگا و بۆ ڕێکخستنی ژیانە کۆمەڵایەتی و ئابوورییەکەی، جگە لە بەهێزکردنی زیاتری سەرمایەداری نیولیبراڵیزم، وە هیچ ئاسۆ و ئەجێندایەکیان نییە بۆ دابینکردنی خۆشگوزەرانی بۆ جەماوەر، بەڵکو بە پێچەوانەوە کارنامەکەیان بریتییە لە زیاتر چەوسانەوە و هەژاری بۆ جەماوەری کرێکار و زەحمەتکێش.

سووڕانەوە لە خولگەی بەدیهێنانی چاکسازی لە سەرخانی (سوپەرستراکچەری) سیاسی سیستەمی سەرمایەداری و لە چوارچێوەی گۆڕەپانی سیاسی بۆرژوازیدا، بەبێ گرتنەبەری ئاسۆی گۆڕانی ئابووری سۆسیالیستی شۆڕشگێڕانە، و بەبێ وەڵامدانەوەی بارودۆخی هەنووکەیی وەک تۆتاڵیتیـیەک (کولیـیەتێک)، هیچ کام لە کێشەکانی جەماوەری کرێکاران و زەحمەتکێشان چارەسەر ناکات. ناتوانرێت نە لە چوارچێوەی هەڵبژاردن و بایکۆتدا وەڵامی کێشە و پرسەکانی جەماوەری زەحمەتکێش و خەڵکی هەژار بدرێتەوە، وە نە لە چوارچێوەی گۆڕینی ڕوکەشیانەی ڕژێمی سیاسیدا بە شێوازی بۆرژوازی و چاکسازییەکانی.

لای کرێکارانی سۆسیالیست، خەباتی سیاسی سەربەخۆی چینی کرێکار شتێک نییە جگە لە خەباتێک کە تیایدا ئاڵای سۆسیالیزم بەرز دەکرێتەوە، شتێک نییە جگە لە ئاسۆی گۆڕانکاری شۆڕشگێڕانەی ئابووری و ڕزگاربوون لە نەهامەتیـیەکانی سەرمایە و سەرمایەداری. چینی کرێکار تەنها بە گرتنەبەری ئاسۆی سۆشیالیستی و ئینتەرناسیۆنالیستی دەتوانێت ڕۆڵی خۆی پەرە پێبدات و وەڵامی ئەرکەکانی ئەم قۆناغە لە گۆڕانکاریـیە سیاسی و کۆمەڵایەتیـیەکان بە شێوەیەکی وەها بداتەوە کە لە بەرژەوەندی خۆی و لە بەرژەوەندی هەژاران و زەحمەتکێشان و چەوساوەکاندا بێت.

شۆڕش و دژە شۆڕشی بۆرژوازی، و ڕاپەڕینی ئۆکتۆبەر

مێژووی ململانێی سیاسی و کۆمەڵایەتی لە ڕێی (ڕاپەڕینی ئۆکتۆبەری ٢٠١٩)ەوە گەیشتە قۆناغێک، لە چوونە پێشەوەی هاوسەنگیی هێز و پەیوەندی نێوان چین و توێژەکانی کۆمەڵگەی عێراقی، کە ناتواندرێت بگەڕێندرێتە دواوە. بەڵێ ئەو مێژووە گەیشتە قۆناغێک بەهۆی ئەو گورزەی ڕاپەڕین هەم وەشاندییە هێزەکانی ڕژێم و باڵادەستی فیکری و سیاسییان لەسەر ئاستی کۆمەڵگا، و هەم وەشاندییە سیستەمی بەها کۆنەپەرست و پیاوسالارەکانیان دژی ژنان، کە ئیتر ناتواندرێت بگەڕێندرێتە دواوە.

ئەنجامدانی هەڵبژاردنی پێشوەختە پاش سەرکوتی خوێناوی ڕاپەڕین، و ئەو ململانێیانەش کە ئێستا دەگوزەرێت لەسەر دیاریکردنی شکڵ و شێوەی حکومەت و هەروەها ئاڵوگۆڕەکانی تری ناو ئۆردوی هێزەکانی ڕژێمی بۆرژوا ئیسلامی و ناسیۆنالیستی، … هەموو ئەمانە بەکۆی گشتیـیان، سیاسەت و ڕێکار و تاکتیکێکی کۆنەپەرستانەی ئەو هێزە دژە شۆڕشیانە پێکدەهێنن کە دەسەڵاتی خۆیان داسەپاند بەسەر کۆمەڵگادا لە ڕێگەی هێزی سەرکوتی ئاشکرا و خنکاندنی ئەم ڕاپەڕینەوە.

هەموو ئەم کردە و سیاسەتانە تەواوکەری سەرکوتکردنی ڕاپەڕینەکە و هەوڵدانن بۆ ڕێگرتن لە شۆڕشی داهاتوو لە لایەک و لە لایەکی تریشەوە هەوڵدانن بۆ جێگیرکردنی ڕژێمی سیاسی بۆرژوازی و دەوڵەتی بۆرژوازی لە عێراق لەسەر بنەمای دابەشکردنی کۆمەڵگا بەسەر پێکهاتە ئیتنۆ-تائیفیەکان و جێگیرکردنی ئایدیۆلۆژیای دەوڵەتی بۆرژوازی لە عێراقدا بەوەی کە  ئیسلامی و نەتەوەیییە.

لەگەڵ ڕاپەڕینی ئۆکتۆبەر و پاشان سەرکوتکردنی لە لایەن هێزەکانی دژە شۆڕشەوە، ڕەوتی خەباتی چینایەتی و سیاسی لە عێراقدا چووەناو قۆناغێکەوە کە بە قۆناغی ململانێی نێوان هێزە شۆڕشگێڕەکان و هێزە دژە شۆڕشەکان دەناسرێتەوە، و هەرگیز ناتوانرێت ئەم دوو هێزە یەکیان پێ بگیرێتەوە. نەک هەر دەوڵەت و سیستمی سیاسی بۆرژوازیی ئیستا هیچ شەرعیەتێکی لە نێو جەماوەردا نەماوە، بەڵکو توخمەکانی بارودۆخی شۆڕشگێڕانە ڕۆژ لە دوای ڕۆژ لە قووڵایی کۆمەڵگادا گەشە دەکەن. ئەرکی بەردەم چینی کرێکار و جەماوەری زەحمەتکێش و کۆمۆنیستەکان ئامادەکارییە بۆ گۆڕینی ئەو توخمانە بۆ قەیرانێکی شۆڕشگێڕانە و شۆڕشێکی داهاتوو بۆ ڕووخاندنی هەموو هێزەکانی دژە شۆڕش کە بەزۆر خۆیان سەپاندووە بەسەر جەماوەردا.

ڕاپەڕینی ئۆکتۆبەر و کاراکتەری دژە سەرمایەداری نیولیبراڵ

ئەم ڕاپەڕینە، بەپێی هێزە کۆمەڵایەتیـیە بزوێنەرەکانی و سروشتی چینایەتی کرێکاریـیانە و جەماوەریـیانەی پێکهاتوو لە زەحمەتکێشان و  بیکاران و بێبەشان و لاوان و ژنانی ڕزگاریخواز، … خەباتێکی جەماوەری بوو کە چەندین تایبەتمەندی دژە سەرمایەداری نیولیبراڵی، وەک سیستەمێکی ئابووریی و کۆمەڵایەتی لەخۆگرتبوو، لەگەڵ تایبەتمەندی دژ بە کارەساتە ئابووری و کۆمەڵایەتییەکانی کە دەرهاویشتەی ئەم سیستمەن لە  هەژاری و نەخۆشی و بێکاری و پەراوێزخستن و بێبەشی، ئەمە و هەروەها هەڵگری چەندین تایبەتمەندی بوو دژی سەرخانی سیاسی و فیکری و کولتووری و یاسایی سەرمایەداری.

ئەم ڕاپەڕینە، سەرەڕای کەموکوڕییەکی زۆر تیایدا، خەباتێکی جەماوەریی شۆڕشگێڕانە بوو، لەپێناو گەیشتن بە ئازادی ئینسان و خۆشگوزەرانییەکەی و بەدیهێنانی ئاواتەکانی لاوانی کچ و کوڕ بۆ بەهرەمەندبوون لە ئازادی و لە کار و لە ژیانێکی مۆدێرن و لە داهێنان، هەروەها لەپێناو بەدیهێنانی ماف و ئازادیـیەکانی ژنان و یەکسانییان، و بۆ دەستەبەرکردنی ئازادی ناڕەزایەتی دەربڕین و ئازادی ڕێکخستن بەگشتی و بۆ ماف و ئازادییەکانی ڕێکخستنی سەندیکاییش بوو بۆ کرێکاران، لەگەڵ دابینکردنی ماف و ئازادییەکانی ئەو تۆێژ و کەمینانەی کە دەناڵێنن بەدەست هەڵاواردن و ستەم و پەراوێزخستن لە کۆمەڵگەدا.

بۆیە دەبینین سەرەڕای هەوڵی ڕەوت و حیزب و لایەنی جۆراوجۆر بۆ لەباربردنی ڕاپەڕین و ئیفلیجکردنی وزە شۆڕشگێڕانەکەی لە ڕێگەی سازشکردن و ملکەچی بۆ دەسەڵات و هەوڵی هەندێکیشیان بۆ بەهرەبەرداری لە ڕاپەڕین بۆ ئامانجە سیاسییە بۆرژوازییەکانیان و لە بەرژەوەندی کێشمەکێشی ئەم یان ئەو باڵی ڕژیم، سەر بەم یان ئەو زلهێزی ئیمپریالیستی و نێودەوڵەتی و ناوچەیی، بەڵێ لەگەڵ هەموو ئەمانەشدا هەوڵ و خەباتی جەماوەری زەحمەتکێش و بەهەژارکراو، لەناو ئەو ڕاپەڕینەدا، دژی دەسەڵاتدارانی حیزبە ئیسلامی و ناسیۆنالیستە گەندەڵ و میلیشیاییەکان، قۆناغێکی پێشکەوتووی لە قۆناغەکانی خەباتی سیاسی و ناڕەزایەتی ئەم جەماوەرە هێنایەئاراوە لەگەڵ هاوسەنگییەکی نوێ لە نێوان ئەو جەماوەرە و هێزە فەرمانڕەواکاندا، بەجۆرێک کە ئیتر ناتوانرێ بگەڕێنرێتە دواوە.

ئەوەی کە هەر ڕاپەڕینێکی شۆڕشگێڕانەی داهاتووی جەماوەر لەناو دەبات؛ ئەوە پەرەنەسەندنی سیاسی و ڕێکخراوەیی و فیکری ئەو ڕاپەڕینەیە بۆ بزووتنەوەیەکی شۆڕشگێڕانە، بە دیدگا و بەرنامەیەکی ئابوری و سیاسی و کۆمەڵایەتی سۆشیالیستی ڕزگاریخوازنەی ڕوون و دیاریکراوەوە. ئەوە سستی و نەتوانینی ڕابەران و چالاکوانانی شۆڕشی داهاتووە لە ڕابەرایەتی ملیۆنان کەس لە کرێکاران و نەداران لە ڕێگەی کاری ڕێکخراوەییانەوە لە حزبێکی کرێکاری سۆسیالیستی جەماوەریدا، کە خەبات بەرێتە پێش بۆ ڕزگاری کۆمەڵایەتی و بەدەستهێنانی ژیانێک کە ئازادی و یەکسانی و خۆشگوزەرانی باڵی بەسەرا کێشابێت.

“هیچ بزووتنه‌وه‌یه‌کی شۆڕشگێڕانه‌ نیە بە بێ تیـۆرێکی شۆڕشگێڕانه”، ئه‌م لێدوانه‌ی لینین کوتومت ڕێک دێتەوە لەگەڵ پرۆسه‌ی شۆڕشگێڕانه‌ و هه‌وڵ و خەباتی جه‌ماوه‌ری هه‌ژار بۆ ڕزگاری، لە عێڕاقی ئه‌مڕۆدا. گرتنەبەری تیۆری و بەرنامەی شۆڕشگێڕانەی مارکس و بەکارهێنانی بۆ دۆخی ئێستا، ئەو شتەیە کە سەرکردە و چالاکوانانی بزووتنەوەی کرێکاری و بزوتنەوەی شۆڕشگێڕی جەماوەری لە عێراقدا پێویستیان پێیەتی، واتە تیۆری و بەرنامەی گۆڕانکاری شۆڕشگێڕانەی تەواوی سیستەمی چینایەتی سەرمایەداری لە ڕێگەی سەرکردایەتیکردنی بزووتنەوەی چینی کرێکار و خەڵکی زەحمەتکێشەوە بۆ خەباتی  هەموو جەماوەری بێبەشان لەپێناو  ڕزگاری و بەدەستهێنانی ژیانێکی خۆشگوزەران. خولانەوە لە بازنەیەکی داخراو و ڕازیبوون بە گۆڕانکاری سیاسی ڕوکەشیانە و نەگرتنەبەری ئاسۆی سۆشیالیستی کرێکاری و کەوتنەدوای هەوڵەکانی هێزە دژە شۆڕشیەکان و پڕوپاگەندە دژە شۆڕشی و دژە سۆشیالیستییەکانیان، کە خۆی لە دژایەتیکردنی چینی کرێکار و حزبایەتی و ڕێکخراوبوونی سۆشیالیستی کرێکاردا دەنوینێت، ئەمانە ڕێک ئەو شتانەن کە دەرگای بەدیهێنانی ڕزگاری سیاسی و کۆمەڵایەتی و فیکری دادەخەن لە بەردەم جەماوەری هەژار و بێبەشدا.

(ڕێکخراوی بەدیلی کۆمۆنیستی) ئەم ڕاستییە سیاسی و کۆمەڵایەتییە درەوشاوانە بە ئاشکرا و بەڕوونی ڕادەگەیەنێت و بەپێی ئەمانە کاردەکات، وە بۆ بڵاوکردنەوەشیان لەناو کۆمەڵگا و لەناو جەماوەری کرێکاران و زەحمەتکێشان و هەژاران لە سەراسەری وڵات و لەسەر ئاستی ناوچەکە و جیهانیشدا کاردەکات، هەروەها  وەک ڕێکخراوێکی سۆسیالیستی شۆڕشگێڕی سەرقاڵی خەباتی سۆسیالیستی، بەشێکە لە هەوڵوتەقەلای خەباتی شۆڕشگێڕانەی جەماوەر لە عێراقدا بۆ هێنانەدی کۆمەڵگایەکی ئازاد و یەکسان و خۆشگوزەران بۆ هەمووان، (ڕێکخراوی بەدیل) تاکتیکی سیاسی خۆی لەسەر ئەم بنەمایە دەگرێتەبەر.

تاکتیکی سیاسی ڕێکخراوی بەدیلی کۆمۆنیستی لە عێراق، بەرامبەر بارودۆخی سیاسی ئێستا

پرسی بنەڕەتی و جەوهەری لە هەموو شۆڕشێکدا یەکلاییکردنەوەی دەسەڵاتی دەوڵەتە لە بەرژەوەندی تاکە چینی شۆڕشگێڕ کە دەتوانێت گۆڕانکاری شۆڕشگێڕانە بەدی بهێنێت. دەوڵەت لە عێراقدا دەوڵەتێکی بۆرژوازیـیە کە لەلایەن بۆرژوازی نێودەوڵەتی و دەوڵەتە ئیمپریالیستەکان و دەوڵەت و جەمسەرە ناوچەیـیەکانەوە پشتیوانی دەکرێت.

(ڕێکخراوی بەدیلی کۆمۆنیستی) خەبات دەکات دژی هەموو ئەو بیرۆکانەی کە نکۆڵی دەکەن لە بوونی سیستەمی سەرمایەداری لە عێراق، وە نکۆڵی لە حوکمڕانی دەوڵەتێکی چینایەتی بۆرژوازی دەکەن بەسەر وڵاتدا، هەروەها خەباتیش دەکات دژی هەموو ئەو بیرۆکانەی کە نکۆڵی لە بوونی چینی کرێکار و خەباتەکانی دەکەن، وە بانگەواز بۆ بیرۆکەی “ناحیزبی” کۆمۆنیستی و “ناسیاسیی بوون” دەکەن. هەر لەو کاتەدا کە ئەم ڕێکخراوە ڕووبەڕووی ئەم ئایدیانە دەبێتەوە و بە پڕوپاگەندەی سیاسی ڕەوتە بۆرژوازیە دژە سۆشیالیستی و دژە حیزبی بوونی چینایەتی کرێکاریانەی  سۆشیالیستی دادەنێت، پێ لەسەر ئەوەش دادەگرێتەوە کە ئامانجی ئەو پروپاگەندانە ئەوەیە کە بەر بە گۆڕانکاری شۆڕشگێڕانە بگرێت و شکستیش بهێنێت بەسەر هەر ڕاپەڕینێکی شۆڕشگێڕانەی جەماوەریدا و بیکێشێتە ژێر باڵی بۆرژوازی فەرمانڕەواوە.

لە تاکتیکی سیاسیی دیاریکراوی ڕێکخراوەکەدا هیچ شوێنێک نیـیە بۆ تیۆری قۆناغ بە قۆناغی بورژوازییانە کە پاساو بدات بەوەی چارەنووسی پرۆلیتاریا و جەماوەری بێبەش ڕادەستی ڕەوت و حیزبە بۆرژوازییەکان بکات بە ناوی نائامادەگی خودییانە  و کامڵ نەبوونی سیاسی  کرێکاران و زەحمەتکێشان و هەژارکراوان بۆ گرتنەدەستی دەسەڵاتی دەوڵەت. هەروەها لەم تاکتیکە سیاسییەدا هیچ شوێنێکیش نیـیە بۆ تیۆری دابەشکردنی قۆناغەکان بۆ قۆناغێکی “دیموکراسی جەماوەری” و پاشان گەیشتن بە سۆسیالیزم. ئەوەی لە جەوهەری تاکتیکی سیاسی ئەم ڕیکخراوەدایە، تیۆری شۆڕشی بەردەوام و هەمیشەیی پرۆلیتاریانە و بەرزکردنەوەی ئاستی خۆئامادەکردنی سیاسی و فیکری و ڕێکخراوەیی کرێکاران و زەحمەتکێشان و نەدارانە، لە جەرگەی خەباتێکی شۆڕشگێڕانەی ڕێکخراودا، وە تێپەڕینە لە وەرچەرخانە شۆڕشگێڕییەکان، بەجۆرێک کە وزە سۆشیالیستییە شۆڕشگێڕانە زەبەلاحەکانی چینی کرێکار و جەماوەری زەحمەتکێش و بێبەش بـێـنـێـتەدەرەوە.

تاکتیکی سیاسی دیاریکراوی (ڕێکخراوی بەدیلی کۆمۆنیستی)، کۆتایی هێنانە بە سیستەمی سیاسی و دەوڵەتی بۆرژوازی ئێستا و گرتنەدەستی دەسەڵاتی دەوڵەتە لە لایەن جەماوەری کرێکار و زەحمەتکێش و خەڵکی هەژارەوە، کە لە ئەنجومەنە کرێکارییە جەماوەرییەکانیاندا ڕێکخراون، لەسەر  داروپەردووی دەوڵەتی بۆرژوازی.

کەواتە بەدیلی ئێمە بۆ دەوڵەت و سیستەمی سیاسی ئێستا، دامەزراندنی دەوڵەت و حکوومەتێکی شووراییه کە لە ناخی جەماوەری کرێکار و زەحمەتکێش و هەژارەوە سەرچاوە دەگرێت و لە شوورای جەماوەری شۆڕشگێڕانەی خۆیاندا ڕێکخراون، واتە دەوڵەتی پرۆلیتاری کە هەڵسێت بە دامەزراندنی سۆسیالیزم. لەم ڕێگایەدا و بۆ ئەنجامدانی ئەم تاکتیکە سیاسییە بنەڕەتییە، (ڕێکخراوی بەدیلی کۆمۆنیستی) هەڵدەستێت بە دانانی سیاسەتە ورد و کۆنکرێتییەکانی خۆی لە بەرامبەر بارودۆخە تایبەتەکان و هەر وەرچەرخانێک کە بزووتنەوەی جەماوەریی شۆڕشگێڕانە پێیدا تێدەپەڕێت.

ئه‌و ئه‌رکه‌ عەمەلیانە‌ی له‌ خواره‌وه‌ خراونه‌ته‌ڕوو، بۆ ئاماده‌کردنی هێزه‌کانی چینی کرێکار و جه‌ماوه‌ری ڕەنجدەرە بۆ گه‌یشتن به‌م تاکتیکه‌ سیاسیه‌ بنه‌ڕه‌تییه،‌ له‌م قۆناغه‌ لە ململانێی سیاسی و کۆمه‌ڵایه‌تی لە عێراقدا. هەروەها بەڵگەنامەی (سەرخەتە گشتیەکان بۆ پێکھێنانی شۆرا …) کە لە (٥-١٢-٢٠١٩) لە لایەن (ڕێکخراوی بەدیلی کۆمۆنیستی)یەوە دەرچووە، بەڵگەنامەیەکی تەواوکەری ئەم بڕیارنامەیەیە، کە دەتوانین بۆ بارودۆخە کونکرێتەکان بەکاری بهێنین و کاری پێ بکرێت لەسەر ڕۆشنایی ئەوەی کە لەم بڕیارنامەیەدا هاتووە.

ئەمە و بارودۆخی سیاسیی عێراق و تایبەتمەندی هەموو هێزە سیاسییە فەرمانڕەواکانی، ئەوەیە کە پەلوپۆی پەیوەندی ڕاستەوخۆی ناوچەیی و نێودەوڵەتییان هەیە. ڕژێمی سیاسی و ده‌وڵه‌تی بۆرژوازی له‌ عێراقدا هێشتا دەرگاکانیان کراوه‌ن به‌ڕووی ده‌ستێوه‌ردانی جیۆپۆلیتیکی و ئابووری و جیۆستراتیژیدا، به‌تایبه‌تی لەلایەن زلهێزه‌ ناوچه‌یی و نێوده‌وڵه‌تییه‌کانی وەک؛ ئێران، سعوودیه‌، ئه‌مریکا، تورکیا و ئیمارات. هەروەها لەگەڵ پەرەسەندنی بزووتنەوەی شۆڕشگێڕانە و سۆسیالیستی لە عێراقدا، هەموو هێزە بۆرژوازیـیە نێودەوڵەتی و ناوچەییەکانیش یەکدەگرن و هەوڵدەدەن بۆ تێکشکانی شۆڕشی سۆسیالیستی و خەباتی ڕزگاریخوازانەی جەماوەری بەرینی هەژارکراوان. ئەوەی کە زەمانەتی پووچەڵکردنەوەی ئەم هەوڵە تاوانکاریـیە دەرەکیـیانە دەکات، یەکەم خەبات و خۆڕاگری مەزنی سەدان ملیۆن کرێکار و زەحمەتکێشە، کە ئاواتەخوازن لە چنگی سەرمایە و سەرمایەداری لە ناوچەکە و لەسەر ئاستی جیهانی ڕزگاریان بێت، دووەمیش هاوپشتییە نێودەوڵەتییەکانیانە.

شۆڕشی پرۆلیتاریا سنووردار نیـیە بەو سنوورانەی کە بۆرژوازی لەسەر بنەمای مەزهەب و ناسیونالیزم و نەتەوە و ڕەگەز و شتی تری لەم بابەتانە کێشاویەتی، ئەم شۆڕشە بزووتنەوەیەکی شۆڕشگێڕی کۆمەڵایەتی جیهانیـیە و ئێمە بەشێکی ئەم بزووتنەوەین و شۆڕش لە عێراقیش بەشێکە لێی. بۆیه‌ خه‌باتی نێونەتەوەیی و په‌ره‌پێدانی هاوپشتی نێونەتەوەیی نێوان پرۆلیتاریای سۆسیالیست و شۆڕشگێڕ له‌ ئه‌رکه‌ هەرە هەنوکەییەکانمانە بۆ پیادەکردنی تاکتیکی سیاسی شۆڕشگێڕانه‌مان له‌ عێراقدا.

ئەرکە پراتیکیە دەسبەجێکانمان:

  1. ڕیسواکردنی ڕژێمی سیاسی ئێستا و ئەو حکومەتەی کە لە دوای هەڵبژاردنی پێشوەختەوە پێکدەهێنرێت وەک حکومەتی دژە شۆڕش؛ وەک حکومەتی دوای سەرکوتکردنی خوێناوییانەی گەورەترین ڕاپەڕینی جەماوەریی شۆڕشگێڕانەی مێژووی مۆدێرنی عێراق کە (ڕاپەڕینی ئۆکتۆبەری ٢٠١٩) بوو.
  2. پڕوپاگەندەی سیاسی لە نێو جەماوەری کرێکاران، نەداران، چەوساوەکان، ژنانی ڕزگاریخواز و لاوانی شۆڕشگێر، بۆ زەروورەتی ڕێکخستنی خەباتیان بە شێوەیەکی سەربەخۆ لەپێناو بەدیهێنانی ئیرادەی سیاسی چینایەتی خۆیان لە شێوەی شوورا جەماوەریـیە شۆڕشگێڕەکانیان و وەک حکومەتی شۆڕشگێڕانەی داهاتوویان.
  3. دانەبەر ڕەخنەی کرۆکی چینایەتی سەرمایەداریانەی هێز و ڕەوتە ئیسلامی و ناسیۆنالیستە فەرمانڕەواکان و ڕوونکردنەوەی ئەم ناوەڕۆکە بۆ جەماوەر، کە بە بەرگی ئایدیۆلۆژیی نەتەوەیی و ئایینی و لیبراڵییانە داپۆشراوە.
  4. ڕەخنەی سۆشیالیستی لە سەرمایەداریی نیولیبرالیزمی زاڵ و ڕژێمی سیاسی بۆرژوا ئیسلامی و ناسیونالیستی کە بە شێوەیەکی ڕێکخراو ئەم نیولیبرالیزمە دەپارێزێت. خستنە ڕووی بەدیلی سۆسیالیستی وەک کارێکی دەستبەجێ، و کارکردن بۆ یەکخستنی لایەنە جۆراوجۆرەکانی خەباتی ئابووری و سیاسی و فیکریی کرێکاران و زەحمەتکێشان لە یەک خەباتی چینایەتیدا بۆ گەیشتن بەم ئامانجە.
  5. بەرجەستەکردنەوەی ڕەخنەی سۆسیالیستی و ڕەخنەی ئازادیخوازانەی ژنان لە بەها ئایینی و نەتەوەیی و پیاوسالاریی و خێڵەکییەکانی زاڵ و سەرکوتگەری ژنان.
  6. ڕێکخستنی خەبات و بەڕەنگاری ژنان بەرامبەر زوڵم و پیاوسالاری، لەگەڵ خەبات بۆ دامەزراندنی بزووتنەوەیەکی بەهێزی ئازادیخوازانەی ژنان لە سەرتاسەری وڵاتدا. کارکردن بۆ ئەوەی ئەم بزووتنەوە ئازادیخوازانەیەی ژنان ڕەگ و ڕیشەی داکوتێت لە نێو جەماوەری ژنانی کرێکار و زەحمەتکێشدا بە شێوەیەکی بنەڕەتی، و لەسەر ئاستی کۆمەڵایەتیش لە شارەکان و ناوچە گوندنشینەکان و لە گەڕەک و شوێنە جۆراوجۆرەکانی کاردا.
  7. تەشهیری سیاسی ڕێکوپێک و ڕێکخراو دژ بە هەموو دیاردەیەکی سەرکوت و چەوسانەوە و هەڵاواردن بەرمبەر گروپ و توێژە کۆمەڵایەتییە ستەملێکراوە جۆراوجۆرەکانی کۆمەڵگا.
  8. خەبات لەپێناو ئەوەدا کە چالاکوانان و ڕابەرانی جەماوەری کرێکار و ڕەنجدەر و خەڵکی هەژار و ڕێکخراوەکانیان، لە خەباتی ڕزگاریخوازانەی خۆیاندا، تیۆری مارکسیستی و رێبازی کۆمۆنیستی شۆڕشگێڕانە بگرنەبەر.
  9. هەوڵدان بۆ ڕێکخستنی کرێکاران، زەحمەتکێشان، لاوان، ژنانی کرێکار و ستەملێکراو لە کۆمیتە لۆکاڵیەکانی خۆیان و لە بازنەکانی تایبەت بە خەباتی خۆیان لە گەڕەکەکان و شوێنی کارەکانیان، بۆ ئەنجامدانی چالاکیی کۆمەڵایەتی و سیاسی و فیکری بە شێوەیەکی ڕێکوپێک و ڕێکخراو لەم گەڕەک و شوێنانەدا. وە ئەو کەس و گروپانەش کە ساغبوونەتەوە لەسەر سۆشیالیزم بۆ کارکردنی ڕێکخراو، هەوڵ بدرێت بۆ ڕێکخستن و ئەندام بوونیان لەناو بازنە سۆسیالیستیەکان و (ڕێکخراوی بەدیلی کۆمۆنیستی لە عێراق)دا.
  10. سەپاندنی کاری سەندیکایی سەربەخۆ بەسەر دەسەڵاتدا، چالاککردنی ئەو سەندیکا سەربەخۆیانەی کە هەر ئێستا لە ئارادان، وە دروستکردنی سەندیکای نوێ و پێکهێنانی جۆرەها ڕێکخراوی کرێکاری خەباتکارانەی بەرگریکار لە مافەکانیان، تا کرێکاران و فەرمانبەران و کارمەندان ڕێکخراو بکرێن لە هەموو شوێنەکانی کارکردندا لەم سەندیکا و کۆمەڵە و ڕێکخراوانەدا.
  11. خه‌باتی ڕۆژانه‌ و به‌رده‌وام، بۆ سه‌پاندنی چاکسازییه‌ ئابووری و سیاسی و کۆمه‌ڵایه‌تی و فه‌رهه‌نگییه‌کان به‌سه‌ر ڕژێمدا، وه‌ک به‌شێک له‌ به‌هێزکردنی خه‌باتی سۆسیالیستی، و بۆ هێنانەدی ئازادی و یه‌کسانی ته‌واو بۆ ژنان، بۆ جیاکردنه‌وه‌ی ئایین له‌ ده‌وڵه‌ت و سیستمی خوێندن و په‌روه‌رده‌، بۆ هەڵوەشاندنەوەی سیستمی قەومی و تائیفی و دامەزراندنی سیستەمێکی سیاسی لەسەر بنەمای هاونیشتمانیی یەکسان، وە بۆ باشترکردنی خۆشگوزەرانی جەماوەر، و بەرپاکردنی کولتوورێکی مرۆڤدۆستانە و ڕزگاریخوازانە، و هەڵوەشاندنەوەی یاساکانی سەرکوتکردنی ژنان.
  12. ڕێکخستنی خەباتی جەماوەری لەدژی تاڵانکردنی موڵکی گشتی کۆمەڵگا کە لەلایەن دەسەڵاتدارانەوە لەڕێگەی ڕادەستکردنی کەرتی گشتی بۆ کەرتی تایبەت و چەتەگەری و گەندەڵی و “وەبەرهێنانی” سەرمایەداریەوە ئەنجام دەدرێت.
  13. ڕێکخستنی خەبات بۆ دابینکردنی کارەبا و ئاو و خزمەتگوزارییە گشتییەکانی کۆمەڵایەتی و خۆیندن و تەندروستییەکی پێشکەوتوو و بێبەرامبەر بۆ هەموان، و تێکۆشان و بەشداریکردن لە دامەزراندنی جۆرەها کۆڕوکۆمەڵ و ڕێکخراوەی جەماوەری بۆ ئەم مەبەستە.
  14. هەڵسان بە ئابڕووبردنی سەرجەم سیاسەتی “کاغەزی سپی” کە دەیەوێت ئابوری عێراق بگۆڕێت بۆ ئابورییەک کە لەسەر بنەمای تاڵانکاریی ئاشکرای سەرمایەداری بنیات نرابێت، و دەوڵەت و یاساکانیشی بگۆڕێت بۆ ئامرازی جێبەجێکردنی ئەم پرۆژانە. هەروەها هەوڵدان بۆ بڵاوکردنەوەی هۆشیاری گشتی سەبارەت بەو سیاسەتانە و ڕێکخستنی ناڕەزایەتی بە دژیان.
  15. کۆمەڵگا لە ژمارەی ناڕەزایەتیەکان و قەوارەی لەڕادەبەردەری بێزاری و توڕەیی لە دۆخی ئێستای کەم نییە، بەڵکو ئەوەی کەمی هەیە ڕێکخستنی پێویستە لە ڕیزەکانی ئەم خەبات و ناڕەزایەتیانەدا، و نەبوونی ئاسۆ و ئەجێندای سیاسی سۆشیالیستییە لە نێویاندا. هەوڵدانی بەردەوام بۆ کۆتاییهێنان بە پەرشوبڵاوی، وە هەوڵدان بۆ ڕێکخستنی ئەم خەباتە ڕووەو هێنانەدی ئەم ئامانجە سۆشیالیستییە ئەرکێکی هەنوکەییمانە.
  16. خاڵی لاوازی بنچینەیی بۆ بۆرژوازی له‌ عێراقدا ئه‌وه‌یه‌ كه‌ له‌سه‌ر بنه‌مای نەتەوەیی و ئایین و مه‌زهه‌ب دابه‌ش بووه‌ و ناتوانێت یه‌كگرتوو بێت،‌ چونكه‌ یه‌كگرتنه‌وه‌كه‌ی پڕه‌ له‌ دژایه‌تی و ململانێ و پێکدادان و پاشکۆیەتی بۆ ئه‌م یان ئه‌و ده‌وڵه‌ت و پەلوپۆی پەیوەندیە ناوچه‌یییه‌كانیان. بەپێچەوانەوە، چینی کرێکار، جەماوەری زەحمەتکێش و هەژار، جەماوەری ژنانی چەوساوە و لاوانی بێکار و ئازادیخواز، هەموو ئەوانە بەرژەوەندیی چینایەتی و کۆمەڵایەتی هاوبەشیان هەیە لەسەر ئاستی عێراق و ناوچەکە و جیهان و هێزێکی یەکجار گەورەن، ئەگەر خەباتی شۆڕشگێڕانەی خۆیان یەکبخەن و ئاسۆی سۆسیالیستی نێونەتەوەیی بگرنەبەر و خەباتی یەکگرتوویان لەسەر ئاستی وڵات و ناوچەکە وەڕێخەن.
  17. خەباتی شۆڕشگێڕانە بەگشتی و خەباتی سۆسیالیستی بەتایبەتی، لە سەردەمی جیهانگیری سەرمایەداری هاوچەرخ و ململانێ جیۆپۆلەتیکییەکان، و ستراتیژی ئیمپریالیزم و ئەو جەمسەرە ناوچەییانەی کە هەمیشە لە بەریەککەوتندان، بێ ئەملاوئەولا دەبێ ئاسۆ و ئەجێندایەکی ئینتەرناسیۆنالیستی هەبێت بۆ ئەوەی بە ئاکام بگات و سەربکەوێت.

پلینۆمی بەرفراوانی سێهەم / کۆمیتەی ناوەندی

ڕێکخراوی بەدیلی کۆمۆنیستی لە عێڕاق

٢٥ – ٢٧ی ئایاری ٢٠٢٢

اضف رد

لن يتم نشر البريد الإلكتروني . الحقول المطلوبة مشار لها بـ *

*

x

‎قد يُعجبك أيضاً

جەنگی ئەسڵی لە کوردستاندا، جەنگی نێوان ناسیونالیزم و سۆشیالیزمە

ڕۆژ نیـیە چەند بەش و توێژێکی کۆمەڵایەتی، لە شار و شارۆچکەکانی کوردستانی عێڕاق، ناڕەزایەتی دەرنەبڕن ...

بزوتنەوە کۆمەڵایەتیەکانی چینی کرێکار لە کوردستانی عێڕاق (ئاوردانەوەیەک لە مێژوی سێ دەیەی پێشوو لەڕووی کرداری و ڕێگریەکانی بەردەم بەرەوپێشچوونی)

دڵشاد  محمد عارف یەکەم: بزووتنەوەی شورایی وەک سەرەتا ئەگەر ئاوڕێک لە مێژوی بزووتنەوە کۆمەڵایەتییەکانی چینی ...

مەبەستەکانی پشتی پەردە لە بەرنامەی (لەگەڵ ڕەنج)دا

عەبدوڵا ساڵح ساڵانێکە (ڕەنج سەنگاوی) بەرنامەیەک لەسەر کەناڵەکانی (تی ڤی -TV) حزبە دەسەڵاتدارەکانی کوردستان پێشکەش ...

ڕەوت ژمارە 19

سەربەخۆیی ڕیزی جەماوەری شۆڕشگێر لە کێشمەکێشی باڵەکانی ڕژێم، هەنگاوی یەکەمە بۆ هێنانەدی گۆڕانکاری ڕیشەیی

ڕێکخراوی بەدیلی کۆمۆنیستی لە عێڕق ئەو ململانێ سیاسیەی چەند مانگێكە بەردەوامە لە نێوان هەردوو باڵی ...

%d مدونون معجبون بهذه: