منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
پەلاماری هۆڤیانەی باندێکی لاوان بۆسەر کچێک لە گەڕەکی (هوانە)ی شاری سلێمانی
ڕەوت: خوێندنەوەتان بۆ ئەم ڕوداوەی گەڕەکی (هوانە)ی شاری سلێمانی چیـیە؟، کە کۆمەڵێک گەنج ئابڵوقەی کچێک دەدەن، هوهای لێدەکێشن و دەیخەنە ژێر فشارەوە، ڕۆڵی ئیسلامی سیاسی لەم ئاشوبەدا چیـیە؟ ئایا چی بکرێت بۆ ڕێگری و دوبارە نەبوونەوەی؟
نادر عەبدولحەمید: ئەم پەلامارە وەک ڕووداوێک، گەرچی ئاماژەیە بۆ چالاکبوونی ڕەوتی کۆنەپەرستی بەگشتی و ئیسلامی سیاسی بەتایبەتی لە کۆمەڵگەی کوردستانی عێڕاقدا، بەڵام ئەم ڕووداوە گوزارش لە واقعی گشتی کۆمەڵگەکە ناکات، ئەم کۆمەڵگەیە لەوە مۆدێرنترە کە ئەم ڕووداوە زمانحاڵی بێت.
ئەڵبەتە کۆنەپەرستییەتی پیاوسالاری و دژە ژن، نەک هەر واقعییەتێکی مێژوویی کۆمەڵگە چینایەتییەکانی وەک کۆیلایەتی و دەرەبەگایەتی بووە و ئێستا پاشماوەکانی ماوەتەوە، بەڵکو واقعییەتی هەر ئێستای کۆمەڵگەی چینایەتی سەرمایەداریشە و لەسەر بنەمای خودی پەیوەندییە ئابووری و چینایەتییەکانی دووبارە بەرهەم دەهێنرێتەوە و لەوە دەرچووە کە هەر پاشماوە بێت. بەم پێیە ئەم ڕووداوە بەشێکە لە واقعی چینایەتی کۆمەڵگەی سەرمایەداری لە کوردستان و بەرهەمی دەسەڵاتی بورژوا ناسیونالیستی کورد و هاوپەیمانە چینایەتییەکەیەتی لە ئیسلامی سیاسی.
لە واقعدا ئەم ڕووداوە، هیستریای بەرەی کۆنەپەرستی هاوبەشی ناسیونالیزم (ی بەتایبەت دەسەڵاتدار) و ئیسلامی سیاسیـیە لە کوردستانی عێراقدا و هەڵقوڵاوی بارودۆخێکی تڕاژیدیایـیە، کە دەسەڵاتدارەتی ئەم هەرێمە خوڵقاندوویەتی، ئەمە لە لایەک، وە لە لایەکی تریشەوە پەرچە کردارێکی شێتگیرانەیە، بەتایبەت لە لایەن ئیسلامی سیاسیـیەوە، بەرامبەر بەو شەپۆلە لە ئازادیخوازی و ڕاپەڕین و کاری شۆڕشگێڕانە کە لە ناوچەی ڕۆژهەڵاتی ناوەڕاستدا لە ئارادایە، هەر لە هاتنەمەیدانی ژنان و لاوانی ئازادیخواز و کرێکاران و زەحمەتکێشانی ئێرانەوە بیگرە لە دژی دەسەڵاتی بورژوا ئیسلامی و نێرسالاری دەوڵەتی جمهوری ئیسلامی ئێران، تا هاتنەمەیدانی ژنانی ئازادیخوازی ئەفغانستان و هاوپشتی و هاوسۆزی ژنان و ئازادیخوازانی عێراق و کوردستانەکەی، ئەڵبەتە لەسەراسەری جیهانیشدا ئەم هاوسۆزی و هاوپشتییە دەبینین.
نەک هەر ئەم ڕووداوە، بەڵکو پەنابردنی خودی دەسەڵاتیش بۆ بەرتەسکردنەوەی ئازادییە مەدەنییەکان و خوڵقاندنی کەشێکی لەبار بۆ گەشەی کۆنەپەرستی لە چەشنی هێرشکردنەسەر یانە شەوانەکان و ئاواڵاهێشتنەوەی دەستی ئیسلامی سیاسی لە وروژاندنی هەست و نەستی ئایینیانەی خەڵکی دژ بە باسەکانی یەکسانی جێندەری و چالاکی هەڵسوڕاوان لەو بوارەدا، هەموو ئەم ڕووداوانە، ئەگەر دروست بێت وەک دیاردە ناویان بەرین، گورزێکی پێشوەختەی (ضربة إستیباقية) بەرەی کۆنەپەرستی هاوبەشی ئیسلامی سیاسی و ناسیونالیزمی دەسەڵاتدارە و دەیسرەوێنێتە بەرەی یەکسانخوازی و ئازادیخوازی ژنان، تا بەربگرێت بە هاتنەمەیدانی کرێکاران و زەحمەتکێشان و ژنانی ئازادیخوازی ئەم کۆمەڵگەیەی کوردستانی عێڕاق و نەبنە بەشێک لەو شەپۆلی هاتنەمەیدانە لە ڕۆژهەڵاتی ناوەڕاستدا بۆ ڕاماڵینی کۆنەپەرستییەتی بورژوا ئیسلامی و بۆرژوا ناسیونالیستی و دەسەڵاتەکانیان.
سەبارەت بە بەشی دووەمی پرسیارەکە کە چی بکرێت لەبەرامبەر ئەم هەڵمەت و پەلامارەی کۆنەپەرستیدا؟ بەدڵنییاییەوە نابێت بێدەنگەی لێ بکرێت؛ هەر لە ڕۆشنگەری فەرهەنگی و چوونە جەنگی فکریـیەوە بیگرە دژ بە کۆنەپەرستییەتی کۆمەڵایەتی لەناو کۆمەڵگە و دژی ڕەوتە چالاکەکانی ئەم کۆنەپەرستییەتە لە ئیسلامی سیاسی و ناسیونالیزمی دەسەڵاتدار و ئۆپۆزیسیۆن، تا هەوڵدان بۆ ڕێکخراوبوون و وەڕێخستنی بزووتنەوەیەکی ئازادیخوازانە و یەکسانخوازانەی ژنان بۆ بەرەنگاربوونەوەی ئەم دەستدرێژی و پەلاماردانانە، ئەمانە لە ئەرکە هەرە دەستبەجێیەکان و پێویستیـیەکی هەنوکەیین، بەڵام ئەوەی کە کاری کۆنەپەرستی لە ناو کۆمەڵگە یەکلا دەکاتەوە و دەستدرێژییەکانی ناسیونالیزم و ئیسلامی سیاسی بەتەواوی کۆتایی پێ دەهێنت و ڕێگر دەبێت لە دووبارە بوونەوەیان، کارکردنە بۆ شکڵگیری و وەڕێخستنی بزووتنەوەیەکی چینایەتی لە ناڕەزایەتیـیە کۆمەڵایەتیـیەکانی توێژ و بەشە جۆراوجۆرەکانی چینی کرێکار و لەوانەش ژنانی کرێکار و زەحمەتکێش بە ئاسۆیەکی سۆشیالیستییەوە.
سازدانی مەراسیمی سێ ساڵەی کوژرانی (قاسم سڵیمانی) لە شارەکانی سلێمانی و هەولێر
ڕەوت: بە بەشداری زوربەی حزبە ئیسلامی و نەتەوەیـیەکانی کوردستانی عێڕاق، بۆ یادی سێ ساڵەی کوژرانی (قاسم سلیمانی) و (مەهدی ئەبو موهەندیس)، لە شارەکانی هەولێر و سلێمانی مەراسیم سازدرا. ئەمە لە ئێستا چ دەگەێنێت، کە تیایدا ئەو دوو تاوانبارە وەک پاڵەوانی پاراستنی کوردستانی عێراق ناسێندران لە شەڕی دژی داعشدا؟
نادر عەبدولحەمید: ئەمە لە ئێستا ئەوە دەگەێنێت کە ئەو حزبە قەومی و ئیسلامیـیانە لە کوردستانی عێڕاقدا هاوپەیمان و هاوبەرژەوەندی خۆیان بە ئاشکرا ڕادەگەێنن بۆ کۆماری پەت و سێدارەی (جمهوری ئیسلامی ئێران)، ئەمەش لە کاتێدایە کە ژنان و جەماوەری ئازادیخواز و زەحمەتکێش ڕاپەڕیوون دژ بە دەسەڵاتی بورژوا ئیسلامی لە ئێراندا و ئەم ڕژێمەش درێغی نەکردووە نەک هەر لە گرتن و ڕاوەدوونان و سەرکوت، بەڵکو بە بڕیاری یاساییش تا ئێستا و هەر لەم ڕۆژانەدا کە ئەم یادەی تێدا دەکرێتەوە، چەندین کەسیان لە خۆپێشاندەران لە سێدارە داوە، لەوانە دوو لاوی ناڕازی و خۆپێشاندەری خەڵکی کوردستانی ئێرانیش.
ئەم مەراسیمە ڕووداوێکی زۆر ئەرێنییە لەو ڕوانگەوە کە دەریدەخات ئەم حزبە قەومی و ئیسلامییانە و هەروەها حکومەتی هەرێمیش لە چ بەرەیەکدان؟ ئەوان ڕاشکاوانە ڕایانگەیاند کە لە بەرەی ڕژێمی سەرکوتگەر و کۆنەپەرستی جمهوری ئیسلامی ئێراندان دژ بە ڕاپەڕینی جەماوەری ئازادیخواز و زەحمەتکێش لەو وڵاتە.
بۆرژواژی لە هەرێمی کوردستانی عێڕاقدا و لە ڕێگەی نوێنەرە سیاسییەکانییەوە لە ڕەوت و حزبە قەومی و ئیسلامییەکانەوە دەرک بە بایەخی پەیوەندیـیە ستڕاتیژە ئابووری و سیاسیـیەکانی دەکات لەگەڵ وڵاتانی بۆرژوا کۆنەپەرستی دراوسێ لە ئێران و تورکیا، ئەم مەراسیمە ڕواڵەتێکی دەرخەری ئەم پەیوەندییە ستڕاتیژیـیەیە و مەسەلەیەک نییە بەوە پاکانەی بۆ بکرێت کە ئەمە کارێکی دپڵۆماسییە و حکومەتی هەرێم و حزبەکانی دەسەڵات و باقی حزبە قەومی و ئیسلامییەکانی تریش بۆ ڕاگرتنی پەیوەندی لەگەڵ ئەم وڵاتە ناچارن بەشداری لە مەراسیمێکی لەو چەشنەدا بکەن.
ئەوەش کە بەشان و باڵی (قاسم سولەیمانی)دا هەڵیانخوێندووە لە شەڕی دژی (داعش)دا، ڕوون و ئاشکرا دیارە کە مەبەستییان ڕۆڵی (قاسم سولەیمانی)یە لە پاراستن و هێشتنەوەی دەسەڵاتی سەرکوتگەری هەرێمەکە و وجودی ئەم حزب و ڕەوتە قەومی و ئیسلامیـیانەی کە ئەمنییەت و بەرژەوەندیـیە ستڕاتیژەکانی (جمهوری ئیسلامی ئێران) لە کوردستانی عێڕاقدا دابین دەکەن. ئەمەش واتا ڕۆڵی (قاسم سولەیمانی) هەروەک لە ئێراندا کۆڵەگەیەکی پاراستن و مانەوەی ئەو ڕژێمە بورژوا ئیسلامییە سەرکوتگەر و کۆنەپەرستە بووە، لە دەرەوەی وڵاتیش و لە هەرێمی کوردستانیشدا هەمان ڕۆڵی خۆی بینیووە لە پاراستن و هێشتنەوەی دەسەڵاتی بورژوا ناسیونالیستی کورد و هاوپەیمانەکەی لە بەرەی کۆنەپەرستی ئیسلامی سیاسی لە هەرێمەکەدا، بەدژی جەماوەری ئازادیخواز و ژنانی یەکسانیخواز و کرێکاران و زەحمەتکێشان.
