منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ڕەزا
تاوانێ کە خۆمان هۆکاری نەبووین، بووە بە بەشێ لە ژیانی ڕۆژانەمان. برسێتی و بێکاری و نەبوونی بەرۆکی گرتووین، بووە بە مۆتەکەی ژیانی ڕۆژانەمان. ئەگەر ئاوڕ لە ژیانی گەنجانی کچ و کوڕ دەینەوە دەبینین لە دۆزەخدان، ئاوات بە مردن دەخوازین کە دەبینین چەندین خوێنکار کە خوێندنیان تەواوکردووە، ناتوانن کارێک لە بواری خوێندنەکەی خۆیاندا بەدەست بهێنن، و ناچار هەندێکیان بەدوای کاری پاسەوانی تایبەتی فڵان سەرکردە و بەرپرسی حزبی دەسەڵاتدا دەگەڕێن بۆ موچە و پەیاکردنی نانەسکییەک و ئەوەی لە زانکۆ و پەیمانگاکان فێربوون دەبێ لەیادی بکەن.
ئەگەر تەماشایی مێژووی ساڵی (٢٠١١) بکەین کە لەبەردەرکی سەرای سلێمانی بەهەزاران هاوڵاتی دژی دەسەڵاتی هەرێمی کوردستان بوون، دژی نادادوەریی و سەرکوتی ئازادی ڕادەربڕین و کوشتنی ڕۆژنامەنوسانی وەک کاوە گەرمیانی و سەردەشت عوسمان و سۆرانی مامە حەمە و چەندی تر بوون، دژی کەمی ساعەتەکانی کارەبا و کەمی خزمەتگوزارییەکان بوون، بەڵام هاوڵاتییان بە ئەندازەی ئێستا خەمی بژێوی ژیانیان نەبوو، خەمی بڕینی موچە و پێنەدانیان نەبوو، بە ئەندازەی ئێستا ترسی بێکاری و هەژاری و برسییەتییان نەبوو.
کەچی بە گرتنەبەری ئابووری سەربەخۆی حکومەتی هەرێم و حزبەکانی دەسەڵات بارودۆخ ڕۆژ لەدوای ڕۆژ بەرەو خراپتر و خراپتر ڕۆیشت بە تایبەت دوای (٢٠١٤) کە سەری کێشا بۆ بڕینی موچەکان بەناوی پاشەکەوتی موچە و پێدانی نیوەموچە و ڕوبعەموچە و وەستانی زوربەی پڕۆژەکان و بێکارییەکی بەربڵاوی گەنجان، و ڕادەستکردنی خزمەتگوزارییەکان بۆ کەرتی تایبەت بارگرانکردنی شانی هاوڵاتییان بە بەرزکردنەوەی نرخی خزمەتگوزارییەکان و دانانی باجێکی زۆر بەسەریاندا، ئەوە لە حاڵێکدا ئەم ئابووری سەربەخۆیە بوو بە خێروبەرەکەت بۆ کۆمپانیاکانی سەربە حزبەکانی دەسەڵات و قۆرخکردنی سەروەت و سامانی کۆمەڵگە.
گەرچی ئەم دەسەڵاتە ڕووبەڕووی ناڕەزایەتییەکی بەرفراوان و شەپۆلی خۆپێشاندانی گەورە بۆوەوە لەم چەند ساڵەی دواییدا، بەڵام ڕێگەی سەرکوت و توندوتیژیی گرتەبەر لە جیاتی وەڵامدانەوە بە خواستەڕەواکانی جەماوەر. ئەوەی کە ئەم دەسەڵاتە ئەمەی بۆچۆتەسەر ئاکامی ناڕێکخراوی و یەکنەگرتوویی جەماوەری کرێکار و زەحمەتکێشە.
بە یەکبووبنمان زۆر شت بە دەست دێنین وەک یەکسانی لە ماف و ئازادییەکانمان، دەبێت خۆمان ڕێکخەین تا ژیانی مناڵەکانمان وەک خۆمان وێران و لەوەش خراپتر نەبێت، پێویستیمان بە یەکە تا ڕۆژێک زووتر بەگژ ئەم دەسەڵاتەدا بێینەوە لە پێناو ژیانێک کە شایستەی مرۆڤی سەردەم بێت و بەدەستی خۆمان بنیاتی بنێین.
