منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ئێمە، ئەمڕۆ لێرە بەدڵێکی پڕ پڕ لە خەم و ئازارەوە کۆبووینەتەوە، بۆ بەڕێوەبردنی ڕێوڕەسمی ناشتنی تەرمی هاوڕێ ئازیزەکەمان یەنار حەسەن محەمەد، یەکێک لە مەزنترین ژنانی خەباتکاری شۆڕشگێڕی بزووتنەوەی ڕزگاریخوازی ژنان لە سەردەمی ئێمەدا، کە لە پێناو ئازادی و یەکسانی و ڕزگاری ژنان گیانی لەدەستدا، خەباتکارێکی کۆمۆنیستی سەربەرز و بەتوانا لە پێناو بنیاتنانی جیهانێکی بێ هەر جۆرە چەوساندنەوە و سەرکوت و هەڵاواردنێک.
هاوڕێ ئازیزەکەمان یەنار، ئێمە ئەمڕۆ لێرە کۆبووینەتەوە بۆ بەخاکسپاردنی تۆ، کە بەدەستی تاوانکارانی وەحش و تیرۆریست لە دووی ئەم مانگەدا تیرۆریان کردی.
ئەی خەباتکاری شۆڕشگێڕی بوێر، ئەی ئایکۆنی خەباتی ڕزگاریخوازی ژنان و خەباتی کۆمۆنیستی، بەناوی هەموو ئازیزانت؛ لە کەسوکار و هاوڕێیان و خۆشەویستان و هاوکارانت لە ڕێکخراوی ئازادی ژن لە عێراق، بە ناوی هەموو ئەو ژنانەی کە لە ماوەی بیست و سێ ساڵدا بە خەباتی پەیگیرانەت ڕزگارت کردوون لە توندوتیژی و کوشتن و بازرگانی کردن پێیانەوە، وە بەناوی سەدان ملیۆن ژن و ڕەنجدەر و منداڵ و ئازادیخواز و مرۆڤـدۆستەوە لە سەراسەری جیهاندا، لەناخی دڵمانەوە ئەوپەڕی ڕێز و پێزانین و خۆشەویستیمان پێشکەش بە تۆ دەکەین.
ئەمڕۆ مەراسیمی بەخاکسپاردنەکە لەم شارەدا بەڕێوەدەبەین، ئەویش لە کەشێکی خنکێنەردا بەهۆی شەڕ و چەپۆکی تیرۆر و میلیشیاکان، وە لە کەشێکی پڕ لە مەترسیدا کە دەوری خەباتکارانی ئازادیخوازی داوە.
گەورەترین دڵسۆزی بۆ تۆ، درێژەدانە بە ڕێگای خەباتەکەت و بەرزکردنەوەی ئەو ئاڵا ڕزگاریخوازە ئینسانییەیە کە تۆ بە خۆڕاگری و بەهێزەوە هەڵتگرتبوو.
هاوڕێ یەنار، ئێمە هاوڕێیانت لە ڕێکخراوی بدیلی کۆمۆنیستی، شان بە شانی هەموو خەباتکارانی ڕێگای ڕزگاری ژن و مرۆڤایەتی لە چنگی سیستەمی چینایەتی سەرمایەداری و هێز و دەسەڵاتە سیاسییە کۆنەپەرست و تیرۆریستەکانی، بە خۆڕاگری و پەیگیرانەوە سورین لەسەر درێژەدان بەڕێگای خەباتەکەت ئەی هاوڕێ یەنار.
یادی هاوڕێی خەباتکاری مەزن یەنار محمد بۆ هەتا هەتایە زیندوو دەمێنێتەوە.
نەنگ و شەرمەزاری بۆ بکوژانی یەنار محەمەد، ئایکۆنی خەباتی ڕزگاریخوازی ژنان.
بژی خەباتی ژنان بۆ ڕزگاربوون لە کۆیلایەتی سیستەمی سەرمایەداری پیاوسالارانە.
بژی کۆمۆنیزم
ڕێکخراوی بەدیلی کۆمۆنیستی لە عێراق
٤-مارسی-٢٠٢٦
