منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
هێرشی سەربازی دەوڵەتی تورکیا بۆ ناو هەرێمی کوردستان، و هەر هەماهەنگیـیەکی حکومەتی ناوەند و هەرێم لەگەڵیدا، سەرکۆنە دەکەین.
لە ناوەڕاستی حوزەیرانی ئەمساڵ (٢٠٢٤)ەوە، سوپای تورکیا، بە هەزار سەرباز و سێ سەد زرێـپۆش و تۆپ و چەکی قورسەوە، جوڵەی کردووە و هاتۆتەناو هەرێمی کوردستانی عێڕاقەوە، لە قەزای ئامێدی سەر بە پارێزگای دهۆک، و ڕۆژانە ڕێگە گشتییەکانى هەرێم بەکار دەهێنێ و هەڵدەستێ بەدانانی خاڵی پشکنین و ڕاگرتنی هاوڵاتیان.
سوپای تورکیا لە (٢٠١٧)ەوە تا ئێستا، لە سەدا هەشتا و شەشی (٨٦.٢٪) درێژی سنوری نێوان عێڕاق-تورکیای دەستبەسەرا گرتووە و لە زۆر شوێنەوە بە قوڵایی (٥) تا (٤٠) کیلۆمەتر، هاتۆتە ناو هەرێمی کوردستان، و (٦٤) بنکە و بارەگای سەربازی تێدا جێگیر کردووە. ئەم ئۆپراسیۆنەشی بەرفراوانکردنی ئەم پێگە سەربازییەیە لەم هەرێمەدا، وە زەمینە خۆشکردن و سەرەتای دەستپێکردنى ئۆپراسیۆنێکى سەربازیـیە بۆ داگیرکرنی چیای (گاره)، و لێدان و سنوردارکردنی جموجۆڵی هێزە چەکدارەکانی (پەکەکە)یە لە ناوچەکەدا.
تا ئێستا و لە قۆناغی ئامادەکاری ئەم هێرشە بۆسەر چیای (گاره)، لە گوندەکانی دەوروبەریدا، (٤) هاوڵاتی بە تۆپبارانەکان کوژراون، بەمەش کۆی گشتی کوژاروەکانی ئەو دەڤەرە لە سەرەتای ئەمساڵەوە بووە بە (٨) کەس، و ژمارەیەکی زۆریش لە گوندەکان چۆڵکراون و گوندنشینان ئاوارەبوون، ئەمە جگە لە زیانی ماڵی و وێرانکردنی سروشت و ژینگەی ناوچەکە.
سێ هەفتە زیاتر بەسەر ئەم لەشکرکێشیی و کوشتوبڕی و وێرانکارییەدا تێپەڕیووە، نە حکومەتی هەرێم و نە حکومەتی ناوەند، تا ئێستا هیچ پەرچەکردارێکیان نەبووە و هیچ ڕاگەیاندنێکی فەڕمی و ڕوونکردنەوەیەکیشیان نیە لەسەری. ئەمەش بۆخۆی ڕیسوایی سیاسی و زەبوونی هەردوو حکومەت نیشان دەدا لەبەرامبەر زلهێزە ناوچەییەکان و ئەم داگیرکاریـیەی تورکیادا، و ئاماژەیەکە بۆ ڕێکەوتن و هاودەنگی و پلانێکی ژێربەژێری نێوانیان لەگەڵ ڕژێمی ئوردوگاندا.
ئامانجی دەوڵەتی شۆفێنیستی تورکیا و حکومەتی ئۆردووگان لەم هێرشەدا، واوەترە لەو بیانوانەی کە گوایە لەناوبردن وەیا سنوردانان بێت بۆ ئەو هێزە چەکدارانەی کە لە دەرەوەی سنورەکانییەوە ئاسایشی وڵاتەکەی دەخەنە مەترسییەوە. ئەمە بەشێکە لە سیاسەت و پلانی ستڕاتیژی تورکیا وەک دەوڵەتێکی زلهێزی ناوچەیی، کە بەرژەوەندیـیەکانی سەرمایە و سیستمی سەرمایەداری گەشەکردووی تورکیا بە سیاسەتی ئیمپریالیستی، و بە دەسەڵاتێکی نەتەوەپەرستانەی شۆفێنیستییەوە، و بە پەلهاویشتن و بەرفراوانکردنی سنوری بەرژوەندییە ئابووری و جیۆسیاسییەکانی لە ڕۆژهەڵاتی ناوەڕاستدا، ئەنجام دەدات. دیارە ئەمەش لە سەردەمێکدایە کە ئیمپریالیزمی ئەمریکی ئەو توانایەی جارانی نەماوە لە ناوچەکەدا و بۆشاییەکی جیۆسیاسی هاتۆتەئاراوە، کە تیایدا نەک هەر تورکیا، بەڵکو ئێران و سعودیەش چالاکانە لە هەوڵی پەلهاویشتندان بۆ پڕکردنەوەی.
ئێمە لە (ڕێکخراوی بەدیلی کۆمۆنیستی) هاتنەناوەوەی سوپای تورکیا و جێگیرکردنی بارەگا سەربازییەکانی لە هەرێمی کوردستان، و خۆئامادەکردنی بۆ ئۆپراسیۆنێکی سەربازی کە ژیان و گیانی هاوڵاتیان دەخاتە مەترسی تیاچوون و ئاوارەییەوە، بە توندی سەرکۆنە دەکەین.
هەروەها بێ هەڵوێستی و هەر هاوئاهەنگیـیەکی حکومەتی ناوەند و حکومەتی هەرێم لەگەڵ دەوڵەتی تورکیادا بۆ ئەم هێرشە سەربازیەی، سەرکۆنە دەکەین، وە ڕایدەگەێنین کە سەلامەتی ژیان و پاراستنی گوندنشینان و ماڵ و باری ئابوری و گوزەرانیان لە ئەستۆی ئەواندایە.
بەرگرتن بەم ملهوڕی و سەرکێشییە سەربازییەی دەوڵەتی تورکیا، پێویستی بەهاتنەمەیدانی جەماوەری ئازادیخواز و ڕیزی ڕێکخراوی کرێکاران و زەحمەتکێشانە، نەک هەر لە هەرێـمی کوردستان و سەرجەم عێراق، بەڵکو لە وڵاتانی ڕۆژهەڵاتی ناوەڕاستیشدا، بە تایبەت لە تورکیا و سوریه.
ئەم لەشکرکێشی و تاوانانە تەنها بە ڕیزێکی یەکگرتووی ئینتەرناسیونالیستی سۆشیالیستی، و دژە سەرمایەداری و دژە ئیمپریالیستی و ڕیزی یەکگرتووی جەماوەری ئازادیخواز لە ڕۆژهەڵاتی ناوەڕاستدا، وەڵام وەردەگرێتەوە.
نا بۆ لەشکرکێشی و سیاسەتی فراوانخوازی و میلیتاریستی دەوڵەتی شۆفێنیستی تورکیا.
بژی ئینتەرناسیونالیزمی پڕۆلیتاری و سوشیالیستی لە ڕۆژهەڵاتی ناوەڕاستدا.
ڕێکخراوی بەدیلی کۆمۆنیستی لە عێڕاق
١٢/٧/٢٠٢٤
