منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ڕۆژی (٩-١٠-٢٠١٩) و پاش هەڵکردنی چرای سەوز لە لایەن ترامپی سەرۆکی وڵاتە یەکگرتوەکانی ئەمریکاوە، ئۆردوگان لە ڕێگەی سوپای تورکیاوە هەڕەشەکانی خۆی بۆ سەر باکوری ڕۆژهەڵاتی سوریا عەمەلی کردەوە. ئەم هێرشە سەربازیەی ئۆردوگان و دەوڵەتی شۆڤینیستی تورکیا بە تۆپبارانی زەمینی و هەوایی و وەپێشخۆدانی گروپە ترۆریستە ئیسلامیەکانی سەر بەخۆیان، خەڵکی ئەو ناوچانەی کردەۆتە ئامانج و ئاوارەیی و کوشتوکوشتاری بەڕێخستووە.
ئەم هێرشەی ئێستای دەوڵەتی کردارفاشیستی تورکیا لایەنیکی تری هەمان ئەو کێشمەکێش و ستڕاتیژە کۆنەپەرستانەیەتی کە لەبەرامبەر قەیران و جەنگی ناو سوریادا بەکاریهێنا و تاقمە تێررۆریستە ئیسلامیستەکانی پێ بەهێز کرد.
ئەم هێرشە سەرباری بەهێزکردنی تاقمە ترۆریستەکانی سەر بەتورکیا دەشبێتە مایەی گۆڕینی دیموگرافیای ناوچە کوردنشینەکانی سوریا و ئاوارەیی و دروستبوونی قەیرانێکی دیکەی ئینسانی پەنابەران، ئەمە جگە لە دوبارە ئەگەری بەهێزکردنەوەی (داعش) کە دەوڵەتی تورکیا هەردەم پاڵپشتی بووە.
بیانوەکانی ئۆردوگان هەر چیەک بن بۆ ئەم هێرشە، هەر لە پاراستنی ئاسایشی خواروی ڕۆژهەڵاتی وڵاتەکەی و دەرپەڕاندنی “ترۆریستان”ی (یە.پە.گە) تا جێگیرکردنی ئاوارە سوریەکانی ناو خاکی تورکیا لە کوردستانی سوریادا، ناتوانی ئەو ڕاستیە بشارێتەوە کە ئەم هێرشە سەربازیە درێژەی سیاسەتی ئیمپریالیستگەرایانەی ناوچەیی دەوڵەتی تورکیایە، سیاسەتی دووهەمین هێزی سەربازی دەوڵەتێکی ئەندامی ناتۆیە و لە گەمەی جیۆسیاسی ناوچەکەدا بەدوای ئەنجامدانی بەرژوەند و ستراتیژە کۆنەپەرستەکانی خۆیەوەیەتی.
لە دەروونی قەیرانی دەوڵتی ئیمپریالستی ئەمریکا و هاوپەیمانەکانی لە ناوچەی ڕۆژهەڵاتی ناوەڕاستدا بۆشکڵدان بە ڕەوندە سیاسی و سەربازیەکانی ئەم ناوچەیە و بەتایبەت لە سوریادا، و لە دەروونی کێشمەکشی توند و تیژیان لە بەرامبەر ڕوسیا و ئێراندا، زەمینەی ماددی بۆ تورکیا فەراهەم هاتووە کە ئەم هیرشە بکات؛ و بەرژەوەندە جیۆسیاسی و جیۆ ئابووریەکانی و ئامانجە شۆڤینیستە نەتەوەییەکانی لە ڕێگەی ملهوڕی سەربازی و داگیرکاریەوە بەروە پێش بەرێت.
سەرباری ئەوەش، ئەم دەوڵەتە کە بەدەست قەیرانە ناوخۆییەکانی خۆیەوە دەناڵێنێت و ڕووبەڕوی نارەزایەتی کرێکاران و زەحمەتکێشان و ئازادیخوازان بۆتەوە بە بەڕێخستنی کوشتوکوشتار و ماڵوێرانی و ئاوارەیی خەڵکی کوردستانی سوریا دەیەوێت ئەم قەیرانە ناوخۆییەی دامرکێنێتەوە و پشک و بەشێکی زورتری هەبێت لە دانوسانەکاندا لەسەر ئایندەی سوریا.
ئەم بارودۆخە تراژیدیەی ئێستا بۆ چەندەمین جار ئەوەی سەلماندوە کە پشتبەستن بە هێزە ئیمپریالیستەکانی جیهان و دەوڵەتە کۆنەپەرستەکانی ناوچەکە و سەواوماڵەی حزبەکانی بزوتنەوەی ناسیونالیستی کورد کارەسات و تراژیدیا بەدیاری دەهێنێت بۆ خەڵکی ستەمدیدەی کوردستان. لابردنی ستەمی نەتەوەیی لە سەر دانیشتوانی کوردستانی سوریا و بەردەوامی بە حوکمی خۆجیی لەسەر بنەمای ئیرادەی ڕاستەوخۆی جەماوەری بەندە بە بەرەوپێشجوونی خەباتی سۆشیالیستی – نێونەتەوەیی کریکاران و زەحمەتکێشان و بەهێزبوونی بەری ئازادیخوازی لە ناوچەکەدا نەک خۆ گریدانەوە بە سیاسەتی بورژوا ئیمپریالیستی ئەمریکا و نەیارەکانیەوە.
ڕێکخراوی بەدیلی کۆمۆنیستی لە عێراق، ئەم لەشکرکەشی و ملهوڕیە میلیتاریستەی دەوڵەتی بورژوا ناسیونالیست و شۆڤێنیستی تورکیا بەتوندی سەرکۆنە دەکات و هاوسۆزی وپشتیوانی خۆی ڕادەگەیەنێ بۆ هەموو دانیشتوانی ستەمدیدەی کوردستانی سوریا بەدەر لە هەر زمان و ئینتیمایەکی نەتەوییان وە بۆ وەستانەوەی جەماوەریان بەرامبەر ئەم داگیرکاریە.
بانگەوازی چینی کریکار و وزحمەتكیشان و هەموو سۆشیالیست و ئازادیخوازان لە ناوخۆی تورکیادا ئەکەین بۆ وەستانەوە بەرامبەر ئەم داگیرکاری و مل هوڕیە و بۆ فشارخستنە سەر ئەردوگان و حکومەتەکەی تا دەست هەڵگرن لەم هیرشە تاوانکارانەیان.
هەروەها کریکاران وئازادیخوازانی جیهان و لایەنە چەپ و کۆمۆنیست و پێشکەوتنخوازاەکان بانگەواز ئەکەین بۆ فشار خستنە سەر دەوڵەتاکانیان بۆ ڕاگرتنی ئەم هێرشە وەحشیگەریە. دەبێ ئەم سەرکێشیە میلیتاریستیەی دەوڵەتی فاشیستی تورکیا بوەستێنرێت.
نەنگ و شەرمەزاری بۆ دەوڵەتی شوڤینیستی تورکیا
ڕێکخراوی بەدیلی کۆمۆنیستی لە عێڕاق
١١-١٠-٢٠١٩
