منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
نەوزاد بابان
لە گردبوونەوەیەکی ناڕەزایەتیدا دژ بە گرانبوونی نرخی یەکەی کارەبا، لە ڕۆژی چوارشەمە ڕێکەوتی (٢١-٥-٢٠٢٥) لەبەردەم پارێزگای سلێمانی، وتەیەکم پێشکەش کرد، وەک هەڵسوڕاوێکی کرێکاری کەرتی کارەبا، ئەمەی خوارەوە کورتەیەکی وتەکانمە:
—-
نرخی یەکەی کارەبا لەو خشتەی تازەیەدا کە حکومەتی هەرێم دیاریکردووە جیاوزی زۆری هەیە لەگەڵ نرخە کۆنەکەدا، بۆ نمونە نرخی هەزار (١٠٠٠) یەکەی کارەبا لە خشتە کۆنەکەی پێشوو بیست و سێ هەزار و سەد (٢٣،١٠٠) دینار بوو، لە خشتەتازەکەی ئێستادا سەد و حەوت هەزار (١٠٧،٠٠٠) دینارە، کەوابوو جیاوازیەکە یەکجار زۆرە و چەند بەرابەرە.
ئەمەش ئەوەمان پێ دەڵێ ئەم خشتە تازەیەی ئێستا نەک لە قازانجی خەڵکی کەم دەرامەتە، وەک میدیاکانی سەر بە دەسەڵات بانگەشەی بۆ دەکەن، بەڵکو تاڵانکردنی گیرفانی خەڵکی کرێکار و زەحمەتکێش و هاوڵاتیانی ئەم هەرێمەیە.
ئەوەشمان بیرنەچێت، کێشەکە تەنها بەرز کردنەوەی نرخی کارەبا نـیـیە، ئەوەتا کەرتی خوێندن و پەروەردە و تەندروستی و باقی کەرتە خزمەتگوزارییەکانی تریشیان ڕادەستی کۆمپانیاکانی کەرتی تایبەتی کردووە بۆ ڕووتانەوەی هاوڵاتیان و بوونەتە بارگرانییەکی زۆر بەسەر شانی جەماوەری زەحمەتکێشەوە، لەگەڵ ئەوەشدا لەشکرێک گەنجانی ئامادەبەکارمان هەیە کە زۆربەیان خاوەن بڕوانامەی زانکۆ و پەیمانگاکانن و خانەوادە نیـیە چەند بێکاری ئامادە بەکاری تێدا نەبێت.
لە (٣٣) ساڵی ڕابردودا دوو هێزی سەرمایەداری میلیشیای فەرهودی لە چوارچێوەی ئەم سیستەم و پەڕلەمانەدا درێژەیان داوە بەمانەوەی دەسەڵاتیان. لەولاشەوە ئۆپزسوێنێکی موزەیەف کە بە بەردەوامی لەخزمەتی ئەم سیستەم و دەسەڵاتە هەنگاوی ناوە.
ئەم پرسە پەیوەستە بەژیانی هەموومانەوە کەوابوو نابێت هیچ ئاسۆ و ئامانجێک بەم سیستەم و دەسەڵاتە و ئۆپۆزسیۆنەکەیەوە ببەستینەوە، تەنها ڕێگە دەبێت ئێمەی کرێکار و خەڵکی زەحمەتکێش ئیرادە بکەین لە ناوەندەکانی ژیان و کاردا خۆمان ڕێکخراوکەین، نوێنەرانی خۆمان هەڵبژێرین و بیر لە ئەڵتەرناتیفێکی تر بکەینەوە لەبەرام بەر ئەم سیستەم و دەسەڵاتە.
