لە یادی بیستەمین ساڵەی تیرۆری هاوڕێیانمان لەلایەن هێزەکانی یەکیەتی نیشتمانی کوردستانەوە

لە ڕۆژی (١٤ تەموزی ٢٠٠٠)دا هیزە چەکدارەکانی “یەکیەتی نیشتمانی کوردستان” تاوانێکی تیرۆریستیان لەناو شاری سلێـمانیدا ئەنجامدا کە بووە هۆی گیان لە دەستدانی پێنج هاوڕێی خەباتکار لە پیناوی سۆشیالیزم و ئازادی  و یەکسانی ئینسانەکان، کە ئەندامانی (حزبی کۆمۆنیستی کرێکاری عێراق) بوون.

بە گۆیرەی پلانێکی پێشتر داڕێژراو لەلایەن سەرکردایەتی “یەکیەتی”وە، پاش گەمارۆدانی بنکەی ئەو حزبە و گرتنی دەیان لە کادر و ئەندامانی، سەر لە ئێوارەی ١٤ تەموز هاوڕێیان [عەبدول باست موحسن، محەمەد موستەفا (کەریم) و ئیبراهیم موحمەد (هاوکار) و هاوڕی لەتیف] کەوتنە بەر گولـلەبارانی کەمینێکی هێزەکانی “یەکیەتی” لەناوجەرگەی شاردا و گیانیان لە دەستدا، لە هەمانکاتیشدا بە گولـلەی قەناسی هەمان ئەو هیزە هاوڕێ (ئومێد نیکبیین) گیانی لە دەستدا.

هەندی لە ‌هاوڕێیانی ئێمە، (ڕێکخراوی بەدیلی کۆمۆنیستی)، کە پێشتر ئەندام و کادر و ڕابەری ئەو حزبە بووین، لەناو گەرمەی هەموو ئەو ڕوودا و ڕووبەڕووبوونەوانەدا بووین و کەوتینە بەردەم ئەو هێرش و پەلامارە تیرۆریستییەی “یەکیەتی”. هەروەها هەندێکیشمان لە دەروەی ووڵات لە کەمپێنی دژی “یەکیەتی”دا لێبڕاونە ڕووبەرووی نوینەران و ئیۆفیسەکانیان بوینەوە.

ڕۆژ لەدوای ڕۆژ ڕووی ڕاستەقینەی ئەم حزبانە دەردەکەوێت کە حزبی بورژوا میلیشی گەندەڵ وتاسەر ئێسقان دژە بەرژەوەندی جەماوەرن. ئەو بارودۆخە ئابوری و کۆمەڵایەتی و سیاسیە کارەساتبارەی کە ئەمڕۆ دەیبینین و جەماوەری خەڵکی کوردستان بەدەستیەوە دەناڵێنێ، شتێک نیە جگە لە ئاکامی کەڵەکە بوونی سیاسەتەکانی پێشویان و ئەو تاوانانەشیان کە دەرحەق بە جەماوەر ئەنجامیانداوە، تاوانی تیرۆری هاوڕێیانی ئێمە یەکێک لە نمونەکانیەتی.

ئەم تاوانەی “یەکیەتی” لەناو شارێکدا کە خۆی دەسەڵاتدار و حوکمڕانی بوو تەنها ئەتوانرێ لە خانەی کردەوەکانی دەوڵەتە فاشییستەکان و هێزە ترۆریستەکان تۆمار بکرێت لە میژوودا و هیچی تر. لە واقعدا  ئەم کارە نە تاکە کاری تیڕۆریستانەی ئەوان بووە، وە نە کردەوەیەکی دەرەوەی سیستمی کاری سیاسی و عەسکەری “یەکیەتی” و‌ هیزە چەکدارەکانی ناسیۆنالیزمی کوردە، بەڵکو بەشیکە لە سیاسیەت و تاکتیکیان لە کوردستاندا. ڕەگ و ڕیشە و بناغەی ئەم تاوانانە لە جەوهەری چینایەتی بۆرژوازیانەی بزوتنەوەی ناسیونالیزمی کورد و دوژمنایەتی سەرسەختیدایە لە بەرامبەر بزوتنەوەی کریکاری و پرۆلیتاریای سۆشیالیست و هەر بزووتنەوەیکی چەپ و ڕادیکاڵ و ئازادیخوازی ناو کۆمەڵگەی کوردستان.

مێژووی ڕابەرانی “یەکیەتی” و سەرکردەی هێزە چەکدارەکانیان، بە ڕابەری ئەو باڵەشییەوە کە “گۆڕان” یان پێک هێنا، پڕە لە کوشتوبڕی نەیاران و پڕە لە تاوانکاری شەڕی ناوخۆیی و تیروری کەسانی ڕادیکاڵ و چەپ و کۆمۆنیست. هێزەکانی ناسیۆنالیزمی کورد دەستیان بە خوێنی هەڵسوڕوانی سۆشیالستی و چەپ و ئازادیخواز سوورە. تاکە ڕێگەی ڕزگاری کۆمەڵگە لە دەستیان کۆتایی هینانە بە دەسەڵاتدارەتیان لە ڕێگەی بەرەو پێشبردنی خەباتی سوشیالیستی و ئینتەرناسیونالیستی چینی کرێکار و خەباتی ئازادیخوازانەی سەرجەم کریکاران و زەحمەتكێشان و خەڵکانی ڕزگاریخواز.

یادی ئەم هاوڕێ گیان بەخت کردووانەی ڕێگای کۆمونیزم و یەکسانی و ئازادی ئێنسانەکان، هەمیشە بەرز ڕائەگرین و زیندووە لە دڵماندا. وە فاداری و دڵسۆزی بۆیان دریژەدانە بە مارشی خەباتی چینایەتی کرێکاری و کۆمۆنیستی لەپیناو ڕزگاری بەشەریەت لە نیزامی چینایەتی سەرمایەداری.

ڕێکخراوی بەدیلی کۆمۆنیستی لە عێڕاق

١٣-٧-٢٠٢٠