کۆمەڵێک چەکدار هەستان بە ئەنجامدانی تاوانێک لەو زنجیرە تاوانەکانی کە بەرامبەر جەماوەر ئەنجام دەدرێ لە عێڕاقدا، کە ئەویش کوشتنی توێژەر و لێکۆڵەرەوەی بواری ئاسایش (هیشام ئەلهاشمی) بوو، دوێنێ (٦-٧-٢٠٢٠) لەبەردەم دەرگای ماڵەکەیدا، لە ناوەڕاستی بەغدا و بە بەرچاوی دامودەزگاکانی ئاسایشەوە کە بە شەقامەکاندا بڵاو بوونەتەوە.
ئەم تاوانە دوای ئەوە ئەنجامدارا کە چەند جارێک ھەڕەشەی لەناوبردن ئاراستەی ئەلھاشمی کرابوو لەلایەن میلیشیاکانەوە بۆ بێدەنگ کردن و دەستهەڵگرتنی لە ڕەخنەگرتن لە میلیشیاکان و کردەوەکانیان. بەم جۆرە بە ئاشکرا و بە بەرچاوی جیهان و جەماوەری خەڵکی عێراقەوە، تاقمێکی میلیشیایی هەڵدەستن بە ترۆری ئەلھاشمی و دەستدرێژیەکی خوێناوی بێ پەردە و ملهوڕیەکی تاوانکارانەی تر دژ بە جەماوەر و مافەکانی بۆ ژیانێکی ئازاد و پڕ لە ئاساییش و دوور لە چەپۆکی خنکێنەری ئەم ھێزە میلیشیانە.
کوشتنی ھیشام ئەلھاشمی تاوانێکی ئاسایی نیە، بەڵکو تاوانێکی تەواو سیاسیە، وەک ھەموو تاوان و کوشتارەکانی تر کە دەسەڵات و میلیشیاکانی دژ بە خەڵکی ڕاپەڕیوی ئۆکتوبەر ئەنجامیاندا لە کوشتن و فڕاندن و بێ سەروشوێن کردن و دەستگیر کردن، چونکە دەسەڵاتێک کە بە درێژایی حەڤدە ساڵی ڕابردوو بۆ چرکەیەکیش نەوەستا بێت لە تاڵان کردنی سەروەت و سامانی ووڵاتەکە و دڕندانەترین تاوانکاری کردبێت بەرامبەر بە ھەر کەسێک کە دژی وەستابێتەوە، لەبەردەمی داتەپیوی سیستمە ڕزیوەکەیدا جگە لە بەردەوامیدان بە کوشتار ھیچی تری لەدەست نایەت.
ئەلھاشمی قوربانی سیاسەتی پاشقول لێگرتن و کێشمەکێشی ناوخۆی باڵەکانی ڕژێمی تائیفی قەومی فەرمانڕەوایە و تیرۆر کردنەکەشی بەڵگەی دەستبەسەراگرتنی میلیشیاکانە بەسەر ھەموو جومگەکانی ئەو ڕژێمەدا و نیشانەی ڕادەی بێدەربەستیە بەرامبەر بە ژیانی هاوڵاتیان و هەروەها نیشاندەری ئاستی ئاڵۆزکاوی ئەو قەیرانەیە کە ڕژێمی دەسەڵاتدار بەدەستیەوە دەناڵێنێ، بەتایبەتی دوای ئەو کوتەکە گورچوبڕەی کە ڕاپەڕینی ئۆکتوبەر سرەواندیە ئەم دەسەڵاتە سەرکوتگەرە.
کێشمەکێشی نێوان باڵە جیاجیاکانی ڕژێمی ئیسلامی و قەومی فەرمانڕەوا لە ڕاپەڕینی ئۆکتۆبەرەوە تا دێت زیاتر و زیاتر ئاڵۆزکاو دەبێ بە پەیوەندی ڕاستەوخۆشیەوە بە کێشمەکێشی نێوان ئەمریکا و ئێران و توندتر بوونەوەی پێشبڕکێیان لەسەر بەرینکردنەوەی هەژمونی خۆیان لە عێراقدا. وە لەگەڵ دانانی کازمیدا بە سەرەک وەزیران، بە ھاوڕایی نێوانیان، کێشمەکێشی نێوان ئەم دوو دەوڵەتە و لایەنە بەگژیەکداچووەکان پێی نایە قۆناغێکەوە کە توندوتیژتر بۆتەوە لەسەر دیاریکردنی ئاراستە و جێگەوڕێگەی ئەم ڕژێم و حکومەتە، کە ناوبەناویش دەرگیری و بەریەککەوتنی گرتۆتەخۆ و مەترسی ئاسایش هەڕەشەی لە جەماوەرکردوە. لە بنەڕەتدا ئەم کێشمەکێش و بەریەککەوتنانە لەسەر حیسابی داماڵینی ئیرادە و خنکاندنی سیاسی جەماوەر و دوورخستنەوەیەتی لە ئامانجە سەرەکیەکەی کە ڕزگار بوونی هەمەلایەنەیەتی لەم ڕژێمە.
ئێمە لە کاتێکدا لە ناخەوە سەرخۆشی ئاراستەی خێزان و کەسوکار و دۆست و خۆشەویستانی ئەلھاشمی دەکەین، بەتوندیش سەرکۆنەی ئەم تاوانە دڕندانەیە دەکەین و حکومەت بە بەرپرس دادەنێین بۆ دۆزینەوەی تاوانباران و دانیان بە دادگا.
ڕێکخراوی بەدیلی کۆمۆنیستی لە عێراق
٧/٧/٢٠٢٠