منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ئەمرۆ کۆمەڵگەی کوردستان ساتەکانی قەیرانێکی گەورەی کۆمەڵایەتی و سیاسی بەسەردەبات لەژیر سایەی دەسەڵاتی بورژوا ناسیۆنالیستی کورد و هەردوو حزبی میلیشیایی و مافیاییدا. بێزاری و ناڕەزیاتی جەماوەری کرێکاران و زه حمەتکێشان و ڕیزی ملیونی گەنجانی كچ و کوڕی بەتەنگ هەڵاتوو بەدەست بێکاری و نەبوونیەوە هەردەم شەپۆل ئەدا و گەیشتۆتە ئاستێكی ئەوتۆ کە بە سەرکوت و کوشتن و خەڵەتاندن و بڵاوکردنەوەی وەهمی نیشتمانی و ناسیونالیستی بەری پێناگیرێت.
لەم بارودۆخەدایە کە حزب و هێزە ئۆپۆزسیۆنە بورژوا ناسیونالیست و ئیسلامیستەکان و ڕیفۆرمیستەکان، کە خۆیان بەشیکن لە دەسەڵات، کەوتونەتە خۆ تا لە ڕێگەی چەواشەکاریەوە و بە ئەجەندەی “حکومەتی تەکنۆکراتی” بورژوازی و “هەڵبژاردنی پێشوەختی پەرلەمان” بەر بە توژمی نارەزایتەکانی جەماەر و چارەسەری بێکاری و برسیەتی و بێمافیان بگرن. ئەمجارەیان سەرقافڵەی ئەم چەواشەکاریە کەوتۆتە دەست “نەوەی نۆێ”، وه بە هاوئاهەنگی لەگەڵ هیزە ئؤپۆزسیەنە ئیسلامیەکان و ڕیفورمخوازەکاندا سەرقاڵی ئەم کارەن. ئەم هیزانە ئەیانەویت خۆپیشاندانەکان بە دەستپێشخەری خۆیان و بە گوێرەی ئەجەندەیەکی دیاریکراو بەڕێخەن و نەهێڵن هیزی چینایەتی کریکاران و زەحمەتكێشان و لاوانی شۆڕشگێڕ بە ڕیکخراویی و دەستپێشخەری و ڕاپەرینی سەربەخۆی خۆیان بێنە مەیدان.
ڕۆژی چوار شەممە ١٢ی ئاب، لە چەند شار و شارۆچکەیەکی کوردستاندا خەڵکی ناڕازی بەدژی هەژاری و بێکاری و بێموچەیی و بێمافی دەستیاندایە خۆپێشاندان و ناڕەزایەتی نواندن. گەرچی بانگەوازی ئەم ناڕەزایەتیە پێشوەخت لە لایەن (نەوەی نوێ)وە کرابوو، بەڵام خەڵکی برسیکراو، بێکارکراو و گەنجان و لاوانێک کە دەسەڵاتی بورژوا ناسیونالیست ئاسۆی ژیانێکی سادە و ئاسایی لێداخستوون زۆر لەوە واوەتر ناڕەزایەتیەکانیان دەربڕی کە چوارچێوەی ئەجەندای سیاسی ئەو هێزە بۆی دیاریکردبوون.
لە (سلێمانی) و (سەی سایەق) دروشمی (نا بۆ حکومەت … نا بۆ پەرلەمان … هەموو دەسەڵات بۆ خەڵک) کە لەلایەن بەشێک لە هەڵسوڕاوانی ئازادیخواز و چەپ و کۆمۆنیستی کوردستانەوە بەرزکرابۆوە، گوزارشی لەو گیانە ڕادیکاڵەی جەماوەری ناڕازی دەکرد بە دژی ئەو ئەجەندا سیاسیەی بورژوا قەومی ئۆپۆزیسیۆن.
هێزە سەرکوتگەرەکانی (پارتی) لە دەڤەری بادینان بەگشتی و لە شاری (دهۆک) و (هەولێر)یش بەتایبەتی بەپلانێکی داپڵۆسێنەرانەی پێشوەخت ئامادەکراو بەر لە دەستپێکی گردبوونەوەکان دەستیان کردبوو بە ڕەشبگیری تا بە هیچ شێوەیەک ئەو ناڕەزایەتیانە لەو شارانەدا هەم سەرهەڵنەدەن و هەم هیچ دەنگوباسێکیان لێ بڵاونەبێتەوە. ئەمە و هێزە سەرکوتگەرەکانی (یەکیەتی)ش بەتایبەت لە شاری (ڕانیە) هەڵساون بەتەقەکردن و خۆپێشاندەرانیان داوەتەبەر دەستڕێژی گولـلەی پلاستیکی و چەند خۆپێشاندەرێکیشیان دەستگیر کردوە.
ئەو نەهامەتیانەی کە یەخەی جەماوەری کرێکار و زەحمەتکێش و لاوان و ژنان و خەڵکی کەمدەرامەتی گرتووە، هۆکارەکەی نەک کەمی سەروەت و سامان، بەڵکو بەپێچەوانەوە زۆری ئەم سەروەت و سامان و ملیارەها دۆلارەیە کە کەڵەکە بووە لە لای کەمایەتیەکی خاوەن کۆمپانیای مۆنۆپۆل و خاوەن دەسەڵات و میلیشیا و هێزی سەرکوتگەر و خۆی ڕێکخراو کردوە لە (حکومەتی هەرێم)دا. ئەم حکومەتە نەک حکومەتی خەڵکی کوردستان، بەڵکو حکومەتی کەمایەتیەکی چینایەتیە بەدژی زوربەی هەرەزۆری خەڵکی کوردستان و لە دانوسان و کێشمەکێشیشدایە لەگەڵ حکومەتی ناوەندی نەک لەسەر ماف و بەرژەوەندیەکانی ئەو زۆرینەیە، بەڵكو لە پێناو بەرژەوەندیە ئابووری و سیاسی و ستڕاتیژیەکانی کەمینەیەک کە دەسەڵات و هیزەکانی بورژوازی کورد و گەورە سەرمایدارنن.
چارەسەر خەڵەتاندنی خەڵکی ئازادیخواز و کرێکار و زەحمەتکێش نیە بە دانیشتن و چاوەڕوانی کردنی پێکهێنانی (حکومەتێکی تەکنۆکرات) و (هەڵبژاردنێکی پێشوەخت) کە هێچی لی سەوز نابێت جگە لە زیاد کردنی چەند کورسیەکی تر بۆ سەر کورسیەکانی ئۆپۆزیسیۆنی بورژوا قەومی و ئیسلامی لە هەمان ئەو پەرلەمانە کارتۆنیەدا. ئەوە ناوەڕۆکی بانگەوازەکەی (نەوەی نوێ)یە بۆ سواربوونی شەپۆلی ناڕەزایەتیەکان لە کوردستان و بۆ هێز نواندنی خۆی و خۆ ئامادەکردنی بۆ پەرلەمانی داهاتوو.
چارەسەر ڕێکخراوکردنی کرێکاران و زەحمەتکێشان و لاوان و ژنانی ستەمدیدە و خەڵکی بێبەشکراو پەراوێزخراوی کۆمەڵگەیە، هێز لە ڕێکخراوبووندایە بە ئاسۆیەکی ئازادیخوازنەی سۆشیالیستیەوە، هێز لە گرێدانەوەی خەباتیاندایە لە کوردستاندا بە خەباتی سەرجەم کرێکاران و زەحمەتکێشانی عێڕاق و ناوچەکە و جیهانەوە. ئەم هێزە ڕێکخراوەیە کە دەتوانێ هاوڕای هەڵپێچانی ئەم دەسەڵاتە بورژوازیە تەواوی کۆمپانیا و سەروت و سامان و ملیارەها دۆلارەکانیان دەستبەسەرا بگرێت و بیگێڕێتەوە بۆ موڵکایەتی کۆمەڵگە و موچە و خزمەتگوزاریەکانی لێ دابین بکرێ.
ئازادی دەستبەجێ بۆ گیراوەکان
نەنگ و شەرمەزاری بۆ سەرکوتگەریەکانی پارتی و یەکیەتی
بژی سۆشیالیزم
ڕێکخراوی بەدیلی کۆمۆنیستی لە عێڕاق
١٧-٨-٢٠٢٠
