ئەبێ زیندانیانی خۆپیشاندانەکانی (پیرەمەگرون) دەستبەجێ ئازادبکرێن

شەوی سێ شەمە (٤-١-٢٠٢٢) کەناڵە تەلەفزیۆنەکانی سەر بە دەسەڵاتی پارێزگای سلێمانی لە هەرێمی کوردستان، هەژدە زیندانیی لاوی کرێکار و بێکاریان، بە جلوبەرگی پرتەقاڵیـیەوە نیشاندا، کە زیاتر لە (٢٠) ڕۆژە گیراون لە لایەن دەزگای ئاسیشی ئەم شارەوە. ئەم دەزگایە لە ژێر دەسەڵات و ئیدارەی ڕاستەوخۆی یەکێتی نیشتمانی کوردستان (یەکێتی) دایە.

 

لەم کەناڵانەوە دانپیانانی ئەم زیندانیـیانە بڵاوکرایەوە کە گویا دەوریان هەبووە لە سوتاندنی کتێبخانەی شارۆچکەی پیرەمەگروون لە کاتی خۆپێشاندانە جەماوەریـیەکانی قوتابیان لە (٢٤)ی نۆڤەمبەری (٢٠٢١)دا، کە بۆ چەند ڕۆژ بەردەوام بوو، وە ژمارەیەک شار و شارۆچکەی پارێزگای سلێمانی گرتەوە.

ئەم کردەوەیەی دەزگای ئاسایشی (یەکێتی)، کە هەتا ئێستاش خۆی بە یەکێک لە حزبە سۆشیال دیموکراتەکان ئەزانێ و بەشداری لە کۆڕوکۆبونەوەکانی ئەو حزبانە لە ئەوروپا دەکات، ڕیک هاوچەشنی کردەوەکانی ڕژێمی فاشیستی بەعس و جەلادەکانی داعشە و کارەسەتەکانی دەستی ئەو فاشیستانە ئەهێنێتەوە یادی جەماوەری ستەمدیدەی کوردستان و سەرجەم عیراق. ئەم کردەوەیەیان پێش هەموو شتێک نمایشی دانپیانانی خۆیانە بەلێکترازانی دەسەڵاتیان بەسەر کۆمەڵگەی کوردستانەوە و ڕاگەیاندنی جەنگی دۆڕاویانە بەرامبەر جەماوەری کرێکاران و لاوان و سەرجەم ئازادیخوازانی کوردستان.

بۆ پتر لە دەیەیەکە، بە دیاریکراوی لە (١٧)ی شوباتی (٢٠١١)وە، هەردوو دەسەڵاتی میلیشیایی پارتی دیموکراتی کوردستان (پارتی) و (یەکێتی) و دەزگا سەرکوتگەرەکانیان لە ئاسایش و هەواڵگری و دژە تیڕۆر، دەستیان بە خۆێنی خۆپێشاندەرانی کوردستان سوور بووە، وە دەیانیان کوشتوە و هەزارانیان بریندار و زیندانی کردووە کە تاوانێکیان نەبووە جگە لە خەبات بە دژی هەژاری و بێکاری و گەندەڵی و خەبات بۆ فەراهەمهێنانی ژیانێکی ئاسوودە و ئازاد. هەر لەم ڕاستایەشدا چەندین خۆپیشاندەر بە تۆمەتی جۆراوجۆر لە لایەن دادگاکانی ژێر دەسەڵاتی (پارتی) یەوە حوکم دراون.

بڵاوکردنەوەی دانپیانانی زیندانیانی (پیرەمەگروون)، هەر سوکایەتیکردن نیـیە بە زیندانیـیەکان و کەسوکاریان و ئازیزانیان، بەڵکو سوکایەتیکردنە بە مرۆڤایەتی و سەرجەم دانیشتوانی کوردستان و پێشێلکردنی سادەترین مافەکانی تۆمەتلێدراوانە. سەرباری ئەمەش، ڕیسوایی دەسەڵات و دەزگای ئاسیشەکەی دەردەخات کە چۆن سەرکوت و ئەشکەنجەی فیزیکی و دەرونی کرێکاران و بەهەژارکراوانی کوردستان دەکەن و چۆن بەبێ پاڵپشتی ڕیکخراوە و نەقابە و هاوخەباتیانیان کراونەتە نێچیری دەستی ئاسایشی سلێمانی و دانپێنانیان پێدەکرێ.

کرێکاران، لاوان و جەماوەری ئازادیخواز لە کوردستان

ئەم نمایشە فاشیستانەیەی دەسەڵات زەنگی خەتەرێكی گەورەیە بۆ کۆمەڵگەی کوردستان و مەبەست لێی تۆقاندنی کرێکاران و لاوانی ئازادیخوازی کچ و کوڕ و سەرجەم جەماوەری ناڕازی ئەم کۆمەڵگەیەیە کە بەرامبەر ستەم و گەندەڵی و هەژاری و بێمافی ڕاوەستان، و هەنگاوێکی مەترسیدارە لەڕاستای جێگیرکردنی دەسەڵاتدارییەتی میلیشیایی و ئیستبدادیی ڕەها لەم کۆمەڵگەیەدا. ڕێگەیەک لە بەردەمماندا نیە جگە لە سووربوونی زیاتر لەسەر ئامانج و داواکاریە ڕەواکانمان و بەرەوپێشبردنی خەباتی یەکگرتوومان بەدژی ئەم تاونکاریانە و سەرجەم ئەم دەسەڵاتە میلیشیایەی بۆرژوا ناسیۆنالیستی کورد.

ئەبی دەستبەجێ ئەو زیندانیـیانە و سەرجەم زیندانیانی خۆپیشاندانەکانی هەردوو ناوچەی ژێر دەسەڵاتی (یەکێتی) و (پارتی) ئازاد بکرین، و حکومەتی هەرێمی کوردستان بە فەرمی داوای لێبوردن بکات لە زیندانیانی (پیرەمەگروون) و دانیشتوانی کوردستان بەهۆی ئەم کردەوە ڕیسوایەی هێزەکانی ئاسایش.

ڕیکخراوی بەدیلی کۆمۆنیستی لە عیراق، لە هەمانکاتدا کە بە توندترین شیوە سەرکۆنەی ئەم کردەوەیەی دەزگای ئاسایشی سەر بەدەسەڵاتی (یەکێتی) ئەکات، لە هەمان کاتدا داوای ئازادکردنی دەستبەجێی ئەو زیندانیانە و هەموو زیندانیانی تری خۆپیشاندانەکان ئەکات لەوانەش حوکمدراوانی ناوچەی ژیر دەسەڵاتی (پارتی).

هەروەها، ئەم ڕیکخراوە بانگەوازی هەموو ئازادیخوازن و سۆشیالیستەکان و سەندیکا و فیدراسیونە کرێکاریـیەکان و بەرگریکاران لە مافی مرۆڤ دەکات کە سەرکۆنەی ئەم کردەوە سەرکوتگەرانەیەی دەسەڵات بکەن و هاوکاری خۆیان بۆ ئازادکردنی هەموو زیندانیانی خۆپێشاندانەکانی کوردستان ڕابگەیەنن.

ڕێکخراوی بەدیلی کۆمۆنیستی لە عیراق

٦-١-٢٠٢٢

اضف رد

لن يتم نشر البريد الإلكتروني . الحقول المطلوبة مشار لها بـ *

*

x

‎قد يُعجبك أيضاً

بارودۆخی سیاسی کوردستان و ڕێگەچارە

کێشمەکێشی نێوان هەر دوو حزبی بورژوا دەسەڵاتدار لە هەرێمی کوردستاندا، تاوی سەندووە لەسەر چۆنیەتی پێکهێنانی ...

بەیاننامەی ڕێکخراوی بەدیلی کۆمۆنیستی لە عێڕاق: سەبارەت بە قەیرانی ئۆکرانیا و هێرشی سەربازی ڕوسیا

بەدوای پەرەسەندنێکی خێرای قەیرانی ئۆکرانیا لە چەند مانگی ڕابردوودا، هاوڕای پەرەسەندنی کێشمەکێشی نێوان ڕوسیا لە ...

ڕزگاری ژن، یەکێک لە ئەرکە هەرە گرینگەکانی شۆڕشە لە عێڕاقدا

بە بۆنەی ڕۆژی جیهانی ژن ژنان بوونە نێچیر بەدەست ترۆر و سەرکەوتی خوێناوی بێ پەردە ...

سەبارەت بە جیابوونەوەکانی ناو حزبی کۆمۆنیستی ئێران و (کۆمەڵە)

دوای چەند ساڵ کێشمەکێش، جیابوونەوەی دووباڵ لەناو (حزبی کۆمۆنیستی ئێران) و (کۆمەڵە - ڕێکخراوی کوردستان)ی ...

ڕاگەیاندن

ئێوارەی پێنج شەممە (٩-١٢-٢٠٢١)، هاوڕێ نەوزاد بابان و چەند ڕاگیراوێکی تر لە زیندانی (ئاسایش)ی سلێمانی ...

%d مدونون معجبون بهذه: