منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ڕێکخراوی بەدیلی کۆمۆنیستی لە عێڕق
ئەو ململانێ سیاسیەی چەند مانگێكە بەردەوامە لە نێوان هەردوو باڵی (ڕەوتی سەدر) و (چوارچێوەی هەماهەنگی)ی ئیسلامی سیاسی شیعە، گۆڕاوە بۆ ململانێیەكی خوێناوی و ڕووبەڕووبوونەوەی چەكدارانە لە چەند ناوچەیەكی بەغدا و چەند شارێكی تر، وە تا ئێستا زۆرێک بوونەتە قوربانی و بریندار بوون، و لە ئاکامیشدا ئاسایشی جەماوەر تێکدراوە و کەشوهەوای کۆمەڵگە میلتاریزە بووە و دەروازە کراوەتەوە بەڕووی جەنگی میلیشیایی هەردوو باڵەکەدا.
ترساندن و تۆقاندنی هاوڵاتیان لە ڕێگەی بەکارهێنانی چەکی جۆراوجۆرەوە لە لایەن باڵەکانی ئیسلامی سیاسی، ڕێبازێکی دوژمنکارانەی دژی کۆمەڵگایە و ڕاکێشانیەتی بۆناو ململانێیەک کە هیچ بەرژەوەندییەکی تێدا نییە، وە ئامرازی پاراستنی دەسەڵاتی ئەوانە.
زیاتر لە دە مانگە ململانێی نێوان ئەم دوو باڵە بەردەوامە لەسەر پێکهێنانی حکومەت و تاڵانکردنی سامانی کۆمەڵگا و دابەشکردنی بەسەر خۆیاندا، ململانێیەک کە سیما و تایبەتمەندیە بنەڕەتییەکەی ئەوەیە کام لەم دوو لایەنە پشکی شێر وەردەگرێت لە دەوڵەت و سیستەمی سیاسی و دزینی داهات و قۆرخکردنی بۆ خۆی.
ئەو قەیرانە خنکێنەرەی کە تووشی ئەم دوو لایەنە بووە کە دەستەویەخەی یەکتریبوون و بە پشتیشیانەوە هەموو هێز و حزبەکانی ڕژێمی بۆرژوا ئیسلامی ناسیۆنالیستیش لە عێراقدا تووشی بوون، ئاکامی ئەو ڕاپەڕینە جەماوەرییەیە کە لە ساڵی (٢٠١٩)ەوە دەستی پێکرد و تا ئێستاش ئەم ڕژێمە لەو زۆنگاوەدا نوقمە کە ڕاپەڕینەکە تێی فڕێداوە و لەگەڵ هەموو هەوڵوکۆششێکی یارمەتیدەرە (سپۆنسەرە) ناوچەیی و نێودەوڵەتییەکانی ناتونێت لێی دەربچێت. هەموو هەوڵوکۆششەکانیان شکستی هێناوە، چونکە ئەو ناکۆکییە ناوخۆییانەی ئەم ڕژێمە دەرگیریەتی زۆر توندوتیژ و گەورەترن لە توانای ڕژێمەکە بۆ چارەسەرکردنیان.
ڕەوتی سەدری، دوای ئەوەی چەند هەفتە لەمەوبەر ئەندام پەرلەمانەکانی دەستیان لە کارکێشایەوە، لە ڕێگەی لایەنگرەکانییەوە خۆی کێشایە ناو پەرلەمان و دەستیاندایە مانگرتن لەبەردەمیدا، پاشان هەڵیانکوتایە سەر ئەنجوومەنی دادوەری و ئەمڕۆش (ڕەوتی سەدر) هێرش دەکاتە سەر ناوچەی سەوز لە میانەی پێکهەڵپڕژانی میلیشیاکانی لەگەڵ میلیشیای (چوارچێوەی هەماهەنگی)، بە مەبەستی دەستبەسەراگرتنی دەوڵەت، و لاوازکردنی ڕۆڵی حزب و هێزەکانی لایەنی (چوارچێوەی هەماهەنگی).
لە لایەکی دیکەوە (چوارچێوەی هەماهەنگی) دامودەزگاکانی دەوڵەت و گروپی چەکداری لەدەستدایە و پاڵپشتی بێسنووری ئێرانیشی هەیە، وە بە هەموو هێزی خۆیەوە دەستی بەسەر دەوڵەتدا گرتووە و ئامادە نییە پێگە و دەستکەوت و ئیمتیازاتەکانی لەدەست بدات.
سەبارەت بە لایەنە ئیقلیمی و نێودەوڵەتیەکانیش، بەگشتی پشتیوانیی ڕژێمەکە دەکەن و هەوڵ دەدەن دۆخەکە وەک خۆی بمێنێتەوە، لە میانەی پارێزگاریکردن لەو هاوسەنگیەی کە بەرژەوەندی هەر یەکێکیان لە عێراقدا دابین دەکات.
لە جەرگەی ئەم ململانێیە بەردەوامەی نێوان (چوارچێوەی هەماهەنگی) و (ڕەوتی سەدر)، و ئاڵۆزییە ئیقلیمی و نێودەوڵەتیەکاندا، هیچ بەرژەوەندییەک بۆ جەماوەر لە ئارادا نییە بخزێتە پاڵ ئەم یان ئەو لایەنی دەگیری کێشمەکێشەکە. گەرچی دەبینین زۆرێک لە حزب و هێز و چالاکوان و ڕۆشنبیرانێک کە بانگەشەی چاکسازیەکی ڕووکەش دەکەن، داوا دەکەن پشتیوانی لە جوڵەی ئەم دواییەی (ڕەوتی سەدر) بکرێت، وە خۆشیان هەمان داواکاری ئەویان هەیە لە هەڵوەشاندنەوەی پەرلەمان و ئەنجامدانی هەڵبژاردنی پێشوەختە و چەند داواکارییەکی تری لەم چەشنە کە خۆشباوەڕی لە نێو ڕیزەکانی ئەو خەڵکە ڕاپەڕیووەدا بڵاودەکەنەوە کە سەراپای ئەم ڕژێمەیان ڕەتکردۆتەوە بە خۆی و بە هەڵبژاردنەکانی و بە پەرلەمان و بە دامەزراوەکانی تریەوە.
جەماوەری کرێکار و زەحمەتکێش، لاوان و ژنان و هەموو ئازادیخوازەکان لە سەنگەرێکدان کە جیایە لە سەنگەری (ڕەوتی سەدر) و سەنگەری (چوارچێوەی هەماهەنگی)، وە هەموو بانگەوازێک بۆ دانەپاڵ یەکێک لەم دوو لایەنە، هەوڵدانە بۆ تێکەڵاوکردنی کارتەکان و درێژکردنەوەی تەمەنی ئەم ڕژێمە. جەماوەر زۆر دوورە لە پرۆژەکانی ئەم دوو لایەنە و بژاردەی شۆڕشگێڕانەشیان ئەوەیە کە هێڵی جیاکەرەوەی خۆیان بکێشن لەبەرامبەر ئەو لایەنانەدا کە بۆ ماوەی دوو دەیەیە خەریکی کوشتاری ئەوان و داسەپاندنی هەژاری و بێکارین بەسەریاندا.
جەماوەری شۆڕشگێڕ و ئازادیخواز لە عێراقدا ڕزگارییان دەوێت لە دەست تەواوی ئەم ڕژێمە و حیزب و ڕەوت و میلیشیاکانی. ڕاپەڕینی ئۆکتۆبەر نیوەی ڕێگای گەیشتن بەم ئامانجانەی بڕیووە. ئەرکی سەرەکی ئەم جەماوەرە شۆڕشگێڕەیە لە کرێکاران و زەحمەتکێشان و ژنان و لاوانی ئازادیخواز، بڕینی نیوەکەی تری ئەم ڕێگایە و ڕێکخستنی ڕیزی خەباتیانە بە پێی ئاسۆیەکی سیاسی و پلانێکی کردەیی کە خەباتی ڕزگاریخوازانەیان بەهێز بکات، سەربەخۆ لەم دوو باڵەی ڕژێم کە لە کێشمەکێشدان لەگەڵ یەکتری.
یەکەم هەنگاوی کردەیی بۆ قۆستنەوەی دۆخی قەیراناوی ئێستای ڕژیم و هێزەکانی، لە بەرژەوەندی شۆڕش و جەماوەری هەژار و چەوساوە، بریتییە لە جیاکردنەوەی ڕیزی هێزەکانی شۆڕش و ئەو جەماوەرە لە لایەنەکانی دەرگیری کێشمەکێش.
ئەمە و یەکێک لە ئەرکەکانی سۆشیالیستەکان و شۆڕشگێرەکان، سودوەرگرتنە لە قەیرانی ئێستا، تاوەکو لەناو بەرفراوانترین ناوەندەکانی جەماوەردا، هەڵسن بە بڵاوکردنەوە و خستنەبەردەستی بەدیلی سیاسی جەماوەری شۆڕشگێڕی ڕزگاریخواز بۆ ئەم ڕژێمە سیاسییەی ئێستا، و کاربکەن لەسەر ڕێکخستنی ئەو جەماوەرە و بنیاتنانی تۆڕەکانی خەباتی شۆڕشگێڕانەیان، و بەرزکردنەوەی ئامادەگیی سیاسی و فیکرییان.
ڕێکخراوی بەدیلی کۆمۆنیستی لە عێڕاق
٢٩-٨-٢٠٢٢
