منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
هەر ماوە نا ماوەیەک، دەوڵەتی سەرکوتگەر و کۆنەپەرستی جمهوری ئیسلامی ئیران و دەوڵەتی شۆڤێنیستی تورکیا، بەبڕوبیانووی جۆراوجۆرەوە تۆپبارانی هەوایی و زەمینی و لەشکرکێشی دەکەنە سەر هەرێمی کوردستان بۆ لێدانی هێزە ئۆپۆزیسیۆنەکانیان، نەک هەر ئەوەش بەڵکو هەڵدەستن بە ترۆری ڕاستەوخۆی ئەندامان و هەڵسوڕاوانی سیاسی ئەو حزب و هێزانەش.
نوێترینی ئەم هەوڵە تێرۆریستییانە، هێرشێکی فڕۆکەی (دڕۆن) بوو لە (٧-٤-٢٠٢٣) بۆسەر فڕۆکەخانەی نێودەوڵەتی سلێمانی لە لایەن حکومەتی تورکیاوە، کە بەگۆیرەی هەوالەکان سەرکردەی هیزەکانی سوریای دیمکراتیی مەزڵوم عەبدی بە ئامانج گرتووە، ئەمەش دوای ئەوە دێت کە لە سەرەتای ئەم مانگەدا گەشتە ئاسمانییەکانی لەو وڵاتەوە بۆ فڕۆکەخانەکە راگرتووە بەو بیانووە کە هێزە نەیارەکانی سودی لێ وەردەگرن.
هەموو ئەمانەش لە بارودۆخێکدایە کە پەیوەندی نێوان هەردوو حزبی دەسەڵاتدار لە هەرێمەکەدا و لە ئێستادا لەوپەڕی گرژیدایە و هەر لایەش بەرژەوەندییە چینایەتی و سیاسییەکانی کردوویەتییە هاوپەیمانی ستڕاتیژیانەی ناوچەیی یەکێک لەو دوو دەوڵەت کۆنەپەرستە، بۆ پیادەکردن و پەرەپێدانی سیاسەتی پەلهاویشتن و فراوانخوازی لە ڕۆژهەڵاتی ناوەڕاستدا.
ئەزموونی ڕابردووش دەریخستووە کە لە ڕێگەی هاوئاهەنگی دەزگا سیخوڕییەکان و هەتا چاوساغی لەناوخۆی هەرێمی کوردستانەوە، ئەم دوو هێزە ناوچەیـیـیە، توانیویانە ئەم تاوانکاری و ترۆرە دەوڵەتیـیە ئەنجام بدەن، کە ترس و دڵەڕاوکێی هەم بۆ ئەندامان و هەڵسوڕاوانی ئەو هێزە ئۆپۆزیسیۆنانە، و هەم بۆ جەماوەری خەڵکی هەرێمەکەش هێناوەتەوە ئاراوە کە وێڕای زەرەر و زیانی مادی، هەندێ جاریش قوربانیشی لێکەوتۆتەوە.
وێڕای زەرورەتی بەرەنگاری و بەرپەرچدانەوەی ئەو ملهوڕییە میلتاریستانەیە بەڕێزێکی یەکگرتووی جەماوەری زەحمەتکێش و ئازادیخواز، پاشەکشە پێکردنی ڕاستەقینەی ڕەوەندی کۆنەپەرستیی و پوچەڵ کردنەوەی تێرۆریزمی دەوڵەتی، هەم لە هەرێمی کوردستانی عێڕاق و هەم لە ناوچەکەدا بەگشتی، خەباتە بۆ شکڵگیری و هاتنەمەیدانی بزووتنەوەیەکی بەهێزی کرێکاران و زەحمەتکێشانی وڵاتانی ناوچەی ڕۆژهەڵاتی ناوەڕاست بە هەرێمی کوردستانی عێراقیشەوە، بە هاوپشتیەکی ئینتەرناسیونالیستی و ئاسۆیەکی سۆشیالیستیەوە.
ڕیسوایی بۆ تێرۆری دەوڵەتی شۆفێنیستی تورکیا
بژی هاوپشتی و خەباتی نێونەتەوەیی کرێکاران و زەحمەتکێشان لە ڕۆژهەڵاتی ناوەڕاستدا
