منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
(١٨-٤-١٩٩٨) ڕۆژی تیرۆری هاوڕێیان شاپور و قابیلە، کە لە شاری هەولێر و لە ژێر سایەی دەسەڵاتدارانی ئەو کاتە و دوای فتوای بانگخوازێکی ئیسلامیی لە مزگەوتێکی هەولێر و بە دەستی باندێکی ئینسانکوژی ئیسلامی ئەنجامدرا. ئەمڕۆ (٢٠٢٥)دا بیست و حەوت ساڵ بەسەر ئەو تاوانەدا تێدەپەڕێت.
ئەو دوو هاوڕێیە لەنێو جەرگەی خەبات وتێکۆشانی ئاوارەکاندا، دەستیانبرد بۆ دامەزراندنی (کۆمەڵەی ئاوارەکانی کوردستان)لە ساڵانی نەوەتەکانی سەدەی بیستدا،بەسەدان کەس بەژن وپیاوەوە، ئاوارەی هەژاروبێکارو دەربەدەر لەکۆبونەوە جەماوەرییەکاندا بەشدارییان دەکرد وسیاسەتیان دادەڕشت کە چی بکەن ویەخەی کێ بگرن؟ قابیل وشاپور، ڕابەری بەرجەستەی ئەم خەباتە بوون. لە هەڵسوڕاوانی بزووتنەوەی بێکاری و بزووتنەوەی ژنانی یەکسانخواز و ڕزگاریخواز بوون لەو سەردەمەدا. لە ڕێکخەرانی مەراسیمەکانی یەکی ئایار و هەشتی مارس بوون، لە ڕابەرانی کۆمۆنیست و ڕووخساری بەرجەستەی بزوتنەوەی کۆمۆنستی ئەو سەردەمە بوون.
هەر ئەمەش هۆکاری هەراسانبوونی بزووتنەوە کۆنەپەرست و فاشیستەکانی ئیسلامی سیاسی ئەو کاتە و چاوپۆشی دەسەڵاتدارانی حزبە ناسیونالیستەکان بوو کە بەجۆرێک ڕێگەخۆشکەری ئەنجامدانی تاوانەکە بوو، هەر بۆیەش دواتر بانگخوازە ئیسلامییەکە پلە و پۆست و ئیمتیازی وەرگرت لە ڕیزەکانیاندا.
خەباتی کۆمۆنیستی و چالاکی ناو بزووتنەوە ئازادیخواز و یەکسانخوازەکانی ئەو هاوڕێیانە و سەرجەم هاوڕێیانێک کە گیانیان لە پێناو سۆشیالیزمدا بەخت کرد، ئەمڕۆ وەک کەلەپور و میراتێک، دەستمایەی کۆمۆنیستەکانە تا لە کۆمەڵگەی سەرمایەداری هەرێمی کوردستان و ڕیسوایی دەسەڵاتدارەتی بورژوا ناسیونالیست و ئیسلامی سیاسیدا، هەرچی زیاتر لە هەوڵی بەهێزکردنی کۆمۆنیزم و بەرجەستەکردنەوەی بزووتنەوەی کرێکاری و بزووتنەوەی ژنانی سۆشیالیست و نارەزایەتییە جەماوەریەکانی خەڵکی ڕەنجدەر و زەحمەتکێشدا بن بەو ئاسۆیەوە.
یاد و یادەوەریەکانیان بەرز و شکۆدار بێت
ڕیسوایی بۆ تیرۆریزمی ئیسلامی سیاسی
ڕەوت
١٨-٤-٢٠٢٥
