منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
یەکەم
دانیشتوانی گوندی گۆجاڕێ سەر بە قەزای ئاکرێ، ڕۆژی ٧/٨-٢٠١٩ ناڕەزایەتیان دەربڕی دژ بە کۆمپانیایەکی نەوت، بەشێوەی گردبونەوە و خۆپێشاندان لەبەردەم ئەو کێڵگە نەوتیەی کە لە سنوری گوندەکەیاندا نەوتی لێدەردەهێنرێت، ئەویش دوای چەندین هەوڵی ئارام بۆ دامەزراندنی دانیشتوانی بێکاری ناوچەکە و وەڵام نەدانەوەیان لەلایەن ئەو کۆمپانیایە و نەهاتن بەدەم داخوازیەکانیانەوە.
دانیشتوانی ناڕازی گوندەکە ڕایانگەیاند کە تا وەڵام بە خواستەکانیان نەدەنەوە دەستبەرداری ناڕەزایەتیەکانیان نابن و ڕێگەنادەن کە کارکردن و دەرهێنانی نەوت لە سنوری گوندەکەیان کە تا ئێستا جگە لە ئاڵودەیی و پسکردنی ژینگەکەیان هیچ سودێکی نەبووە بۆیان.
هێزەکانی ئاسایش ڕوبەڕووی خەڵکی ناڕازی گوندەکە بوونەتەوە و بەدار و کوتەک کەوتوونەتە لێدانیان و شکەنجەدان و لە ئاکامدا سی و شەش (٣٦) کەسیان بریندار کردوە کە لەوانە چەندین ژن و منداڵ سەریان شکاوە و قاچ و دەستیان بریندار بووە. ئەمە جگە لەوەی کە دە (١٠) کەسیشیان گرتووە لە خەڵکی ناڕازی گوندەکە.
دووەم
لەژێر دروشمی (موچەکانمان مەخۆن، کوا مافی هەژاران) کرێکارانی پاکژکاری شارۆچکە (ناحیە)ی سەنگەسەر سەر بە یەکەی بەڕێوەبەرایەتی (قەزا)ی قەڵادزێ لە دەڤەری پشدەر، ڕۆژی ٧/٨-٢٠١٩ گردبونەوەیەکی ناڕەزایەتیان ئەنجامدا دژ بە دواکەوتنی موچەکانیان بۆ چەند مانگێک لە لایەن کۆمپانیای (گارێس)ەوە.
شایەنی باسە ئەوە بۆ چەندەمین جارە کە ئەو کرێکارانە هەر بەچەند مانگ جارێک دوای دواکەوتنی موچەکانیان ناچار دەبن ناڕەزایەتی دەرببڕن و مانبگرن تا کۆمپانیاکە ناچار بێت موچەی چەند مانگ دواکەوتوەکەیان پێبدات، وەک ئەوەی کە لە ٢٤ ئازاری ٢٠١٨دا وێڕای ناڕەزایەتی دەربڕین مانگرتنیان ڕاگەیاند و کۆمپانیای (گارێس) گەرچی سەرەتا هەڕەشەی دەرکردنی لە کرێکارەکان کرد کە کرێکاری تر لە شوێنیان دادەمەزرێنێت وە کرێکارە مانگرتووەکان بە گرت دەدات لە حاڵەتێکدا لێدوان و ڕاگەیاندن دەربکەن، بەڵام دواتر ناچار بوو کە موچە دواکەوتووەکانیان پێبدات.
سێهەم 
دوێنێ دووشەممە ٢٩/٨-٢٠١٩ بۆ چواردەهەمین جار دەرچوانی پلە یەکەمی زانکۆ و پەیمانگاکانی کوردستان لە بەردەم ئەنجومەنی وەزیران گردبونەوەیەکی ناڕەزایەتیان ئەنجامدا، بەڵام ئەمجارەیان وێڕای گردبوونەوە و ناڕەزایەتی دەربڕین بریاریاندا کە مانیش بگرن لەبەردەم ئەنجومەنی وەزیران و چادریان هەڵدا بەڵام درەنگانێکی شەو لەلایەن هێزەکانی چالاکیە مەدەنیەکان بڵاوەیان پێکراوە.
