منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
کۆمیتەی سلێمانی/ ڕێکخراوی بەدیلی کۆمۆنیستی لە عێڕاق
درۆنێکی تورکیا، جومعە (٢٣-٨-٢٠٢٤) ئۆتۆمبیلێکی کردۆتە ئامانج، لە نزیک گوندی (تەپەڕەش) لەسەر ڕێگای سەرەکی هەڵەبجە-سەیدسادق، کە تیمێکی ڕۆژنامەوانی تێدا بووە و خەریکی کاری میدیایی بوون بۆ کۆمپانیایەک کە خاوەن مۆڵەتی فەڕمییە لە لای وەزارەتی ڕۆشنبیری حکومەتی هەرێم، لە ئەنجامدا دوو ڕۆژنامەنوس لەناو ئەو ئۆتۆمبێلەدا بەناوەکانی (گوڵستان تارا) و (هێرۆ بەهادین) تیرۆرکراون و یەکێکی دیکەش بە سەختی برینداربووە.
ئەنجامدانی تاوانی تیرۆر و تۆپبارانی هەوایی و زەمینی و لەشکرکێشی بۆ ناو قوڵایی هەرێمی کوردستان، لە لایەن سوپای تورکیاوە لە سێ دەیەی ڕابردوودا بەردەوام بووە، بەڵام بە واژۆکردنی کۆمەڵیک گرێبەستی ئەمنی و سەربازی و بازرگانی و ئابووری لەگەڵ سەردانی ئۆردوگان لە (٢٢ی ئەپریلی ٢٠٢٤) بۆ بەغدا و هەولێر، ئەم تیرۆر و لەشکرکێشییە چۆتەناو قۆناغێکی مەترسیدارەوە، بەتایبەت بەپێی لێدوانی وەزیری بەرگری عێڕاق (ثابت العباسي) هەردوو وڵات (ناوەندێکی هاوئاهەنگی ئیستیخباراتی هاوبەش) یان دروست کردووە.
(کۆمیتەی سلێمانی/ ڕێکخراوی بەدیلی کۆمۆنیستی لە عێڕاق)، وێڕای پرسە و سەرەخۆشی خۆی بۆ خانەوادە و کەسوکاری قوربانییەکان، بە توندیش ئیدانەی ئەم تاوانە تیرۆرستییەی دەوڵەتی تورکیا و هەر دەسگرۆییەکی حکومەتی ناوەند و هەرێم بۆ ئەو تاوانانە ڕیسوا دەکات. هەروەها، شانبەشانی جەماوەری ناڕازی هەرێم دژی ئەم تاونکارییانە دەوەستێتەوە، و داوا لە ئازادیخوازان و هەر ڕێکخراوەیەکی جەماوەری و حزب و لایەنێک دەکات کە لایەنگری پاراستنی ماف و ئازادی کاری ڕۆژنامەوانین، دەنگی ناڕەزایەتی خۆیان هەڵبڕن و بەهەر شێوازێک بۆیان گونجاوە بەشدار بن لەو هەوڵ و چالاکییانەدا کە دەیەوێت سنورێک بۆ ئەم تیرۆر و دەستدرێژییانە دابنێت.
٢٤-٨-٢٠٢٤
