منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
پێنج شەممە (٣-١٢-٢٠٢٠) لە شاری سلێمانی، جەماوەرێکی بەرفراوان، لە مامۆستایان و کارمەندان، لە کرێکاران و کاسبکاران و خەڵکی ناڕازی، دژی دواکەوتنی موچەکانیان و بێدەربەستی حکومەتی هەرێم بەرامبەر برسیەتی و بێکاری و نەبونی خزمەتگوزاریەکان و دەسدرێژی بۆسەر ئازادیەکان، بەردەوامیاندا بە خۆپێشاندانەکەی ڕۆژی چوار شەممەیان.
هێزە سەرکوتگەرەکانی دەسەڵات هەڵمەتیان بردەسەر خۆپێشاندەران کە ئاشتیانە ناڕەزایەتیان دەردەبڕی و تەقەیان بەسەراکردن و بە گوللـەی پلاستیک و گازی فرمێسکڕێژیش ڕووبەڕوویان بوونەوە، لە ئەنجامدا چەندین خۆپێشاندەر توشی گرفتی هەناسەدان و تێکچونی باری تەندروستی بوون، و زیاتر لە پانزە کەسیش دەسگیر کراون.
هاوکات لە شاری (ڕانیە)ش بەشێک لە هەڵسوڕاوان، مامۆستایان و فەرمانبەران گردبونەوەیەکی ناڕەزایەتیان ئەنجامدا دژی بێموچەیی و داسەپاندنی برسیەتی و دەسەڵاتی گەندەڵکار، وە پشتیوانی خۆشیان ڕاگەیاند بۆ خۆپێشاندەرانی سلێمانی.
حکومەتی هەرێم بەدرێژایی دوانزە مانگی ئەمساڵ تەنها چوار موچەی خەرجکردوە، بەمەش بێگوزەرانی و دەستەنگی بۆ جەماوەرێکی زۆر هێناوەتەئاراوە و برسیەتی و بێکاری و گرفتە کۆمەڵایەتیەکانی وەک خۆکوژی و کۆچوڕەوی لاوان بەرەو هەندەران لە مەودایەکی بەرفراواندا پەرەیان سەندوە. ئەمە لە حاڵێکدایە کە داهاتێکی زۆروزەوەند لە سامانە سروشتیەکان و گومرگی دەروازە سنوریەکان و باجەکانی ناوخۆ لە ڕێگەی بەرپرسانی پلەباڵای حزبی و حکومی و کۆمپانیاکانیانەوە دەستی بەسەراگیراوە. هەربۆیە ژنانێکی زەحمەتکێش و خەڵکێکی داخ لە دڵ و وەتەنگهاتوو بەدەست نەبوونی و نەداریەوە لەناو ئاپۆرەی خۆپێشاندەران و پێشوازی گەرمی ئەواندا پڕبەدەم هاواریان دەکرد ئەم دەسەڵاتە گەندەڵە، مافیا و دزە، دەبێ بڕوات و یەخەمان بەربدات.
بەدڵنیاییەوە دەبێ ئەم دەسەڵاتە بڕوات، بەڵام ڕۆیشتنەکەی و لەوەش گرینگتر ئەوەی کە دوای ڕۆیشتنەکەی دەسەڵات بکەوێتەدەست ئەم خەڵکە زەحمەتکێشە، پەیوەستە بەوەوە کە هەر ئێستا لە مەیدانەکانی خۆپێشاندان و ناڕەزایەتیەکاندا، لە شوێنی کار و گەڕەکەکانی ژیاندا، خەڵکی ئۆڕگانەکانی ئیرادەی خۆیان بهێننەدی؛ لە کۆمیتەکان و لیژنە و کۆمەڵە هەرەوەزیەکان و شۆراکاندا.
بۆ بەدەستهێنانی موچەکان و چۆکدادان بە حکومەتی هەرێم و چارەسەری کێشەی برسیەتی و بێکاری، پێویستە دەستبەجێ مامۆستایان و کارمەندان، کرێکاران و موچەخۆران، لە ناوەندەکانی کاردا نوێنەرانی خۆیان هەڵبژێرن و لیژنەیەکی باڵاش لەو نوێنەرانە پێکبێت لە سەرتاسەری کوردستاندا تا خواستەکانیان ڕاگەێنێت و بە پشتیوانی هێزی یەکگرتووی ئەو جەماوەرە بتوانێ لایەنێکی چاودێر بێت بەسەر داهات و بودجە و دابەشکردنی موچە و دانوسانەکانی حکومەتی هەرێم لەگەڵ حکومەتی ناوەندیدا.
- نەنگ و ڕیسوایی بۆ توندوتیژی هێزە سەرکوتگەرەکانی دەسەڵات
- ئازادی دەستبەجێ بۆ گیراوەکان
- موچەکان دەستبەجێ و بێ لێبڕین و بەتەواوی دەبێ بدرێن
- بۆ پێشەوە بەرەو هەڵبژاردنی نوێنەرانی ڕاستەوخۆی کریکاران و کارمەندان و مامۆستایان و موچەخۆران
ڕێکخراوی بەدیلی کۆمۆنیستی لە عێڕاق
٤-١٢-٢٠٢٠
