ئایا  هیچ  لایەنێک لە دواڕۆژی نەوەی دوای هەزارەکان خۆی بە بەرپرس دەزانێت؟

جەمال کۆشش

کۆڵانە تەسک و خانووە تەواونەکراوەکانی گەرەکە هەژارنشینەکانی شارەکان، كچ و کوڕە تازە پێگەیشتووەکانی نێو خانووە (١٢٠) مەتری و (١٥٠) مەترییەکان. نەوەیەک کە هەموو ماڵێک (٣) تا (٤) کوڕ و کچی یان زانکۆیان تەواوکردووە، یان لە پۆلی پێنج و سەشی ئامادەییدا وازییان هێناوە و ڕژاونەتە نێو بازاڕیکی شێواو وپڕ گومان، تا نیوەی شەو بە ڕۆژانەیەکی زۆر کەم کار دەکەن و شەوەکەشی بەدیار چامپینز لیگەکانەوە (Champions league) وەنەوز دەدەن.

ئەم نەوەیە، تەماشای برا و خوشکە گەورەکانی دەکات، لە ماڵەوەن و دەرفەتی بەختەوەرییان لەدەستداوە. خۆیانیش کاتێکی کەمی ڕزگاربوونی لەدەست ماوە. لایەنێکی سیاسی و کۆمەڵایەتی جددی نیە متمانەی پێبدات و فەنتازیا و خەون و ئامانجەکانی بۆ فۆڕمۆڵە و ئاراستە بکات و ڕاپەڕین بەرپا بکات، کە هەموو زەمینەکانی وەک ئیران و عێراق ئامادەن.

سەرکێشی دەکات:

– قەرز دەکات و دەچێتە نێو بازاڕی مامەڵەوە و لاوێتی خۆی  بزر دەکات و خەونەکانی لە گۆڕ دەنێت و بەیانی تا ئێوارە هاوار دەکات و خەریکی کارت فرۆشی و بازاڕی لەنگە و کاری سەرپێێ دەکات… دەکەوێتە ژێر قەرزەوە..

– سەرخۆی هەڵدەگرێت و بەرەو ئەوروپا، مان و نەمانی پێوە گرێدەدا.

لە هەموو ماڵێکدا، باوک، دایک، خوشک و برا، داپیرەو باپیرە، گیرۆدەی سەرگەردانی و بزربوونی ئەم نەوەیەن. کێشەیەکی یەکجار گەورەی خێزانی و کۆمەڵایەتی و ئابوری و کلتووریـیە. ئەگەر هەر باوکێک تەنها  چەند چرکەیەک تەماشای فەیس بووکی کوڕەکەی بکات، ئیدی تاقەتی چوونە سەر کاری نامێنێ (هیچ شتێک لەم ژیانە نیە، پێکەنینم پێببەخشێ)، (مەرگم  بەچاوی خۆم دی کە دیپۆرتکرامەوە، بەڵام ئەمجارە بشمرم هەر دەڕۆمەوە). چۆن پەروەردەیان بکات. چۆن هانی خوێندنەوە و سەرکەوتووییان لە قوتابخانە و زانکۆ بدات. چۆن کەشێکی کۆمەڵایەتی هاوسەنگ پەیدا بکات بۆ هەڵدان و گەشەکردنیان. لەدایکەکان بگەڕێن، کە نازانێت لە حەژمەتتان چ بکات؟

هێشتا ساڵ نەسوڕاوەتەوە، کە ئازار و مەرگ و ناڵەی مناڵانی پەنابەرانی عێراقی لە بێلاڕوسیا، وێنەی دەستە وردەکانی ژێر تەلە دڕکاوییەکان، ڕەقبوونەوە لەسەرما و خواردنی ورچی کێوی بووە گەرمترین هەواڵەکان.

لەبەرامبەر ئەم تڕاژیدیایەدا سەرۆکی حوکومەتی هەرێم (مەسرور بارزانی)، بە ڕۆژنامە ئەڵمانیەکانی وەک (فاز) و (ئەلگماینە فرانکفۆرت) دەڵێت ئەوان فریوخواردووی نێو باندە قاچاخچییەکانن. لە واقعدا کۆچ و ڕەوی بە کۆمەڵی لاوانی کوردستان بۆ دەرەوەی وڵات و بەهرەبەرداری قاچاخچییەکان لێیان و دژواری و مەرگەساتێک کە ڕووبەڕووی دەبنەوە هەمووی لەئاکامی سیاساتەکانی دەسەڵاتدارەتی حکومەتی هەرێمە.

نەک هەر ئەوەش دوای ئەم هەموو کارەساتە حکومەتی هەرێم هیچ بەرپرسیارەتییەک لەخۆی نیشان نادات و هیچ پلانێک بۆ چارەسەری ناخاتە دەستوری کارییەوە، بەڕاستی سەیرە کەمتر حکومەتێک لە جیهانی سەرمایەداری ئەمڕۆدا دەبینیت کە وا بێ خەم و بێ دەربەست بێت بەرامبەر هاوڵاتیانی! بۆیە لەژێر سایەی ئەم دەسەڵاتەی هەرێمەدا، تڕاژیدیای کۆچ و ڕەوی بەکۆمەڵی لاوان کاروانێکە کۆتایی نایەت.

حزبەکانی دەسەڵاتدار و حکومەت و دامەزراوە پەروەردەیی و ڕۆشنبیریـیەکانی کوردستان بە هەققەت، شایانی توڕەیی، هەڵشاخانی لاوانی کوردستانن، لەبەرئەوەی بە سیاسەت و پلانە ئابووریی و ئیدارەییەکانیان، ڕێگرن لەدابینکردنی لانی کەمی ژیانی ئەمڕۆی لاوانی کوردستان.

جیاوازی چینایەتی کۆمەڵگای شارە گەورەکانی کوردستان، زۆر ڕۆشن و بەرچاو لە سەرتاپای ژیاندا، لەوپەڕی توندوتیژیدا خۆی دەنوێنێ. ئەوەتا لاوانی كچ و کوڕی کوردستان، ئەوانەی خوێندنیان تەواو کردووە زوربەیان بێکارن، وە بەشێکی بەرچاویشیان بەناوی ئەزموون وەرگرتنەوە بەناچاری بە خۆڕایی کاردەکەن لەژێر ناونیشانی کاری خۆبەشدا، هەم لە ناوەندەکانی کار بۆ خاوەنکار و سەرمایەداران، وەهەم لە فەرمانگەکانی دەوڵەتیدا، بەو هیوایەی کە لە ئایندەیەکی نادیاردا دابمەزرێن. ئەمە لە کاتێکدایە کە ژمارەی ملیۆنەرەکان تادێت لە زیادبووندایە. ئەم ناکۆکیـیە چینایەتیـیە کە لە کیشەی لاواندا یەکجار بەرجەستەیە، کە پەیوەست دەبن بەریزی کرێکارانەوە، دەچنە نێو پرۆسەی دەرگیری خەبات و کێشمەکێشە کۆمەڵایەتیەکانەوە، کێشدەکرێن بەرەو ئاسۆیەکی مەزن. ئاڵتەرناتیڤیش هەر ئەمەیە. لاوان لەناو بزووتنەوەی چینایەتی خۆیاندا وەک وزەیەکی نوێ و خاوەن ئایدیای نوێ و چاونەترس و دەستپێشکەر، هەوڵدەدەن چارەنوسی خۆیان، خۆیان دیاریبکەن.

اضف رد

لن يتم نشر البريد الإلكتروني . الحقول المطلوبة مشار لها بـ *

*

x

‎قد يُعجبك أيضاً

پەیامی هاوسۆزی لەگەڵ کەس وکاری گیانبەختکردوانی کارەساتی تەقینەوەی گازی لەشاری سلیمانی ڕۆژی پێنج شەممە ١٧.١١.٢٠٢٢

 لە ناخی دڵەوە هاوبەشی و هاوخەمی ئەم کۆستە گەورەیەتانین کە دڵ و ویژدانی هەموومانی هەژاند.  ...

مانگرتن لەکار، گرنگترین شێوازی کاریگەری سەرکەوتنی خەباتی ئابووری چینی کرێکار

ئامادە کردنی: جەمال کۆشش دەورەیەکی تری چڕ بوونەوەی سەرمایە، هەڵئاوسان و گرانی، شەپۆلێکی تری ناڕەزایەتی ...

دەسخەڕۆیی ئۆپۆزیسیۆن لە درێژکردنەوەی تەمەنی پەرلەماندا

(ئایندە پەیوەستە بە ئاسۆی سۆشیالیستی و هاتنەمەیدانی چینی کرێکارەوە) نادر عەبدولحەمید ڕۆژی (٦-١١-٢٠٢٢)، دوایین ڕۆژی ...

کوژرانی مەهسا ئەمینی وێستگەیەکی سەرەکییە لە کۆتاییهاتنی ڕژێمی مەلاکان لە ئێراندا

بڵاوکراوەی (ژنانی ڕاپەڕین- نساء الانتفاضة) لە عەرەبییەوە بۆکوردی: شیرین عەبدوڵڵا بۆ پێنجەمین ڕۆژی لەسەریەک، ڕاپەڕینی ...

حوکمدانی ئەو دوو مێرمنداڵە، عەبدوڵا و سابیر، دەبێ دەستبەجێ هەڵوەشێتەوە و ئازادکرێن

(عەبدوڵا هیوا فاتح) و (سابیر ئەحمەد)، دوو گەنجی مێرمنداڵی تەمەن خوار هەژدە ساڵ، کە لە ...

%d مدونون معجبون بهذه: