منظمة البديل الشيوعي في العراق تنظيم شيوعي عمالي منهجه الفكري والسياسي ماركسي مستنبط من “البيان الشيوعي”
ڕێکخراوی بەدیلی کۆمۆنیستی لە عێڕاق
هێزە میلیشیا شۆفێنیست و سەلەفیـیەکانی سەر بە سوپای ڕژێمی تیرۆریستی (ئەحمەد شرع) و بە پشتیوانی هێزە ئیمپریالیست و ناوچەییەکان، پاش ئەوەی لە (٦-١-٢٠٢٦)دا گەمارۆی هەردوو گەڕەکی (ئەشرەفیە) و (شێخ مەقسود)یان دا لە شاری حەلەب، هاوکاتی تۆپاببارانی شوێنە مەدەنییەکان هێرشێکی خوێناویشیان کردە سەر خەڵکی ئەو دوو گەڕەکە، بە مەبەستی کۆنترۆڵکردنیان و دوورخستنەوەی “هێزەکانی سوریای دیمکرات”، کە پاراستنی ئاسایشی ئەم دوو گەرەکەیان لە ژێر دەستدا بوو، و بەزۆری کوردنشینن و بەشێکیشیان ئەو خانەوادانەن کە لە عەفرینەوە پێشتر لە ئەنجامی هێرشی باندە تیرۆریستە ئیسلامیـیەکان و لەشکرکێشی و داگیرکاری تورکیا بۆ عەفرین ئاوارە بوون و لە حەڵەب جێگیر بوون.
بەهۆی ئەم شەڕ و تۆپباران و لەشکرکێشی و ڕەشەکوژیـیەوە، دەیان هەزار کەس ئاوارە بوون و ژمارەیەکی زۆر کوژراو و برینداریش هەیە، ئەمە جگە لە بڕینی کارەبا و ئازووقە و ئاو لەو دوو گەڕەکە.
ئەم کۆمەڵکوژیـیە کە هێزە تیڕۆریستە ئیسلامی و قەومیـیەکانی دەسەڵاتداری ئیستای سوریا دەستیان بۆبردووە لە پشتیوانی تەواوی ئەمریکا و ئیسرائیل و تورکیا بەهرەمەندە. وە ئەم تاوانە لەو چوارچێوە سیاسیـیەدا ڕوودەدات کە پیادەکردنی ستڕاتیژی ئیمپریالیستانەی ئەمریکی و ئەوروپیـیە بە هاوکاری تورکیا و ئیسڕائیل و بەکارهێنانی دەسەڵاتی نوێی سوریا (حکومەتی ئەحمەد شەرع)، لە کێشمەکێش و پێشبڕکێی قوتبە ئیمپریالیستییەکانی جیهان لە ڕۆژهەڵاتی ناوەڕاستدا، کە ڕووخاندنی ڕژێمی (بەشار ئەسەد) خاڵێکی وەرچەخان و دەستپێکێکی تازەی بوو، بۆ دابینکردنی بەرژەوەندییە درێژماوەکانی ئەو دەوڵەتانە.
دەسەڵاتی خوێناوی و تێرۆریستی هیزەکانی حکومەتی ئەحمەد شەرع کە هێزی سەرکوتگەری جەماوەری کرێکار و زەحمەتکیش و گەنجان و ژنانی ئازادیخوازی سوریان ئەم تاوانکاریەیان ئەنجامداوە، و بە دەمارگیری ئاینی و نەتەوەیی و ئایدیای یەکپارچەیی خاکی سوریا پاساوی دەدەن. ئەمەش لە کاتێكدا لەدەرەوەی ویست و ئیرادەی جەماوەری ئازادیخوازی سوریا و لە پەیوەند بەپیادەکردنی ستراتیژی ئیمپریایستانە و تاوانکارانەی ئەمریکا و ئیسرائیل و تورکیاوە خۆیان سەپاندووە بە سەریاندا، و ئەو هێز و ڕژێمە کۆنەپەرستە تیرۆریسییەن کە دەبێ وەلابنرین نەک ئاسایش و سەقامگیری و خۆشگوزاەرانی وڵاتیان بدرێتە دەست و شەرعیەتیان پێ بدرێت.
وەڵامدانەوەی تاوانی کۆمەڵكۆژیی هێزەکانی سوپای سوریا، لە هەردوو گەڕەکی حەلەب، بە بڵاوکردنەوەی ژەهراوی دەمارگیری نەتەوەیی لەلایەن ناسیونالیستە کوردەکانەوە جگە لە زەربەدان لە ئامانجی ڕزگاریخوازانەی خودی کرێکاران و زەحمەتکێشانی کوردستانی سوریا، و زەربەدان لە هاوچارەنوسی و خەباتی هاوبەشی هەموو جەماوەری زەحمەتکێشی سوریا، شتیکی دیکەی لێ بەدەست نایەت.
ڕاکێشانی کێشە سیاسیـیەکان بۆ باری عەسکەری و ملهوڕی میلیشایی دەبێ بە خەباتی هاوبەشی جەماوەری سوریا بەری پێبگیرێت. ئەوە ئەرکی کۆمۆنیستەکان و کرێکارانی هوشیار بە بەرژەوەندی هاوبەشی چینایەتێیانە کە دەنگهەڵبڕن بەڕووی میلیتاریزەکردنی بارودۆخۆی سوریا و لە هەوڵی پەرپێدانی هێزی ساسی سەربەخۆی چینایەتی خۆیان بن لە نێو هەلومەرجی ئاڵۆز و پڕ کێشەی سوریادا.
ئێمە لە کاتێکدا ئەو تاوانە سەرکۆنە دەکەین و هاوسۆزی خۆمان ڕادەگەێنین بۆ ئاوارەکان و خانەوادەی قوربانیان، ڕایدەگەێنین کە هەنگاوی یەکەم وەستانەوەی ئازادیخوازانە بەرامبەر بەم دەسەڵاتە شۆفێنست و خوێناویـیە، وە نەبوونە بە پارسەنگ لەناو ستڕاتیژی ئیمپریالیزمی ئەمریکی و هاوپەیمانەکانیدا، هاوکات لەگەڵ خۆ بەدوورگرتنە لە کەوتنە ناو دەمارگیری نەتەوەیی و شەڕی قەومی. ئەمەش لە گرەوی هاوخەباتی کرێکاران و زەحمەتکێشان، ژنان و لاوانی ئازادیخوازی سەراسەری سوریا و هاوپشتی نێونەتەوەیـیە لە ڕۆژهەڵاتی ناوەڕاستدا.
١٠-١-٢٠٢٦
